विप्लवले आक्रमण बन्द गरेकै बखत शर्मा पक्राउ

राजनीति

वीरेन्द्र ओली मंगलबार, वैशाख २३, २०७७ १४:५४

काठमाडौ- नेत्रविक्रम चन्द ‘विप्लव’ नेतृत्वको नेकपाले कोरोना भाइरसको संक्रमणका कारण आफ्ना गतिविधि बन्द गरेकै बखत केन्द्रीय सदस्य अनिल शर्मा ‘विरही’ पक्राउ परेका छन्। विप्लवले गत चैत १० गते कोरोना संक्रमणले मुलुक आक्रान्त भएकाले आफ्ना सम्पूर्ण गतिविधि बन्द गरेको घोषणा गरेका थिए।

विप्लवले आफ्ना सबै गतिविधि बन्द गरेका बखत शर्मालाई आज चितवनबाट पक्राउ गरिएको छ। विप्लवले कोरोना भाइरसको संक्रमण कम भएपछिमात्रै आफ्ना गतिविधि सुरु गर्ने बताएका थिए। शर्मालाई प्रहरीले पक्राउ गरेपछि विप्लवलाई ठूलो क्षति पुगेको छ। यसअघि हेक्टक्वाटर सदस्य हेमन्तप्रकाश ओली ‘सुर्दशन’ सहित केन्द्रीय सदस्य माइला लामा, बन्धु चन्दलगायत केन्द्रीय नेताहरु पक्राउ परिसकेका छन्। विप्लव नेतृत्वका नेकपाका एक हजारभन्दा धेरै नेता कार्यकर्तालाई प्रहरीले पक्राउ गरिसकेको छ।

शर्मा केन्द्रीय प्रकाशन विभागको जिम्मेवारीमा थिए।

विप्लव नेतृत्वको नेकपाका शर्मा पार्टी केन्द्रीय सदस्यसँगै केन्द्रीय प्रकाशन विभाग प्रमुखको जिम्मेवारी निर्वाह गर्दै आएका थिए। पार्टीको प्रचार प्रसारको भूमिका निर्वाह गर्नेगरी गुणराज लोहनीलाई हटाएर शर्मालाई प्रकाशन विभागमा ल्याइएको थियो।

प्रकाशन विभागको जिम्मेवारीमा आउनुअघि शर्मा पार्टी पालिटब्यूरो र पूर्वी कमाण्डको इन्चार्जको भूमिकामा थिए। उनी पार्टीमा लेख रचना कविता लेख्ने वैचारिक नेताको रुपमा स्थापित छन्। शर्मा राजनीतिमा लामो समय लागेपनि सांसद र मन्त्री कुनै लाभको पद नपाउने नेतामा पर्ने नेकपाका पूर्व केन्द्रीय सदस्य गुणराज लोहनीले बताए। पार्टीमा लामो समय संघर्ष गरेपनि शर्माले कम विवादित र वैचारिक नेताको रुपमा छवि बनाएको लोहनीले बताए।

रुपलाल विश्वकर्मा समूहबाट माओवादीमा
२०४८ सालमा एकता केन्द्रको विद्यार्थी संगठनको अध्यक्ष हितमान शाक्य अध्यक्ष हुदा शर्मा सचिवको जिम्मेवारीमा थिए। २०५१ सालमा तत्कालीन माओवादीले दीर्घकालीन जनयुद्धमा जाने घोषणा गरेपछि रुपलाल विश्वकर्माले नेतृत्व गरेको सर्वहारा श्रमिक संगठन पार्टीतिर लागेका थिए। माओवादीले जनयुद्ध सुरु गरेको दुई वर्षपछि विश्वकर्मालाई छोडेर २०५४ सालमा तत्कालीन माओवादीमा प्रवेश गरेका थिए।

जनयुद्धमा लागेका शर्मा २०६१ सालमा लोकेन्द्र विष्टमगरसँगै पटनामा पक्राउ परेका थिए। माओवादी शान्ति प्रक्रियामा आएपछि २०६३ सालतिर मात्रै शर्मा जेलबाट छुटेका थिए। शर्मालाई पार्टीले २०६५ सालमा मात्रै पार्टीको केन्द्रीय सदस्यको जिम्मेवारीमा ल्याएको थियो। २०६९ सालमा मोहन वैद्यले पार्टी अलग भएको घोषणा गरेपछि विप्लवसँगै गएका थिए।

विप्लवले आफ्नो नेतृत्वको नेकपा माओवादी घोषणा गरेपछि शर्मा उतै गएका थिए। विप्लवले २०७१ सालमा दाङमा भएको राष्ट्रिय सम्मेलनबाट शर्मालाई पोलिटब्यूरोको जिम्मेवारीमा ल्याएका थिए। विप्लव भूमिगत भएपछि उनलाई पूर्वी कमाण्ड र पोलिटब्यूरोको जिम्मेवारीमा ल्याइएको थियो। शर्मा हाल पार्टी केन्द्रीय सदस्य र केन्द्रीय प्रकाशन विभाग प्रमुखको जिम्मेवारीमा थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।