तिलोत्तमामा मिर्गौलाको डायलाइसिस सेन्टर स्थापना हुने

समाज

दीपक घिमिरे शुक्रबार, वैशाख १९, २०७७ ०५:०६

बुटवल- गौतम बुद्ध सामुदायिक मुटु अस्पताल बुटवलले रुपन्देहीको तिलोत्तमामा नेपालकै सबैभन्दा बढी क्षमता र सुविधा सम्पन्न मिर्गौलाको डायलाइसिस सेन्टर स्थापना गर्ने भएको छ। तिलोत्तमा नगरपालिकामा स्थापना गरिने उक्त सेन्टरमा ७५ वटा डायलाइसिस मेसिन जडान गरिनेछ।

बिगत पाँच वर्षदेखि मिर्गौलाका बिरामीहरुको उपचार र डायलाइसिस गर्दै आएको अस्पतालले हाल २० वटा मेसिनबाट चाैबीसै घन्टा सेवा प्रदान गरिरहेको छ। अस्पतालमा रुपन्देहीका मात्र नभई नवलपरासी, कपिलवस्तु, अर्घाखाँचीलगाएतका जिल्लाबाट समेत डायलाइसिस गर्नुपर्ने बिरामीहरु आउने गर्दछन्।

टाढाबाट आउनुपर्ने बिरामीहरुलाई रातिको समयमा डायलाइसिस सेवा लिन आउन र जान समस्या भएकोले तिलोत्तमामा नयाँ डायलाइसिस सेन्टर स्थापना गर्ने प्रक्रिया अगाडि बडाइएको अस्पतालका अध्यक्ष एजाज आलमले जानकारी गराए। सेन्टरको स्थापनापछि एचआईभी र हेपाटाइटीसका बिरामीहरुले समेत यहीबाट डायलाइसिस सेवा प्राप्त गर्ने छन्। हाल एचआइभी तथा हेपाटाइटिसका बिरामीहरुको मिर्गौलाको डायलाइसिस गर्नुपरेको अपस्थामा काठमाडाैं जानुपर्ने बाध्यता छ।

नयाँ निर्माण हुने डायलाइसिस सेन्टरमा जडान गरिने ६० वटा मेसिनबाट सामान्य अवस्थाका बिरामी र १० वटा मेसिनबाट एचआईभी र हेपाटाइटीसका बिरामीको डायलाइसिस गरिने अस्पतालका वरिष्ठ मिर्गौलारोग विशेषज्ञ डा. रजत कायस्थले जानकारी दिए। त्यस्तै ३ वटा मेसिन संस्थापक सदस्य तथा विशिष्ट व्यक्तिका लागि छुटयाइनुको साथै २ वटा मेसिन इमरजेन्सी कक्षमा जडान गरिने छ।

अन्तर्राष्ट्रिय मापदण्डअनुसार निर्माण गरिने उक्त सेन्टरबाट स्तरीय र भरपर्दो सेवा प्रदान गर्नुको साथै बिरामीको सुविधा तथा मनोरञ्जनकाे लागि विशेष ध्यान दिइएको छ। एकपटकमा डायलाइसिस गर्दा कम्तीमा ४ घन्टा समय लाग्ने भएकोले बिरामीहरुलाई सुविधायुक्त इलेक्ट्रिक बेड र हरेक बेडमा टेलिभिजन र वाइफाई जडान गर्ने गरी योजना बनाइएको छ।

करीब २५ करोडको लागतमा निर्माण गरिने उक्त सेन्टरका लागि प्रदेश ५ सरकार, तिलोत्तमा नगरपालिका, रोटरी क्लब अफ सेन्ट्रल बुटवल र अन्य सहयोगी संघसंस्थाहरुको सहकार्य र स्थानीयवासीको सहयोगमा निर्माण कार्य सम्पन्न गरिने अध्यक्ष आलमले जानकारी दिए।

मुटु अस्पतालले बुटवलको साथै दाङको लमहीमा १० र पाल्पाको तान्सेनमा १० वटा मेसिन जडान गरी सेवा प्रदान गर्दै आएको छ। केही समयभित्र स्याङ्जाको वालिङमा पनि १० वटा मेसिन जडान गरी सेवा संचालन गर्ने तयारी रहेको अस्पतालले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।