लम्की- लम्कीचुहा नगरपालिकाका नगर प्रमुख महादेव बजगाईं राहत सामाग्री लिएर कोरोना संक्रमितको घरमा पुगेका छन्। चैत २२ गतेदेखि सुनसान रहेको उनको घरमा एक्कासी नगर प्रमुखलाई देखेपछि युवककी आमा दंग परेकी थिइन्।
नगर प्रमुखलाई घरकै आँगनमा देखेपछि उनले खुशी व्यक्त गरिन्। उनले भनिन्‚ ‘यस विपतको घडीमा जनप्रतिनिधिका त कुरै छोडौं। हाम्रो वरपर समाजका समेत यहाँ आउदैनन्।’
युवकको घरमा नगर प्रमुख राहात सामाग्री लिएर पुगेका थिए। राहत सामग्री बुझ्दै संक्रमित युवककी आमाले राहतभन्दा पनि सरकार साथमै रहेको आभास गराएकोमा धन्यवाद व्यक्त गरिन्। उनले भनिन् ‘अहिले हामी ठूलो पीडामा छौं, राहातको आवश्यकता एकातिर भएपनि साथको आवश्यकता ठूलो रहेको थियो।’
उनले छोरामा कोरोना संक्रमण भएको थाहा पाएपछि समाजबाट पनि एक्लो महसुस गरेको बताइन्।
उनले भनिन्‚ ‘तर तपाईं आएर हामीसँगै उभिदिनु भयो‚ यो नै सबैभन्दा ठूलो कुरा हो। यसका लागि तपाईंलाई धन्यवाद साथै मेरो छोरा चाँडै निको बनाएर पठाउनुहोला।’
राहत सामग्री कोरोना संक्रमित युवकको परिवारलाई दिँदै नगर प्रमुख बजगाईंले युवकको राम्रोसँग उपचार भइरहेको र नगरपालिका परिवारको साथमा रहेकोले चिन्ता नलिन आग्रह गरे। बजगाईंले भने‚ ‘कोरोना संक्रमित युवकको राम्रोसँग उपचार भइरहेको छ, चिन्ता लिनुपर्ने अवस्था छैन। तपाईंहरुलाई सकिने जति सहयोग गर्न नगरपालिका तयार छ। नगरपालिका तपाईंहरुको साथमा छ।’
नगर प्रमुख बजगाईं खाद्यान्न राहत सामग्री लिएर आफ्नो आँगनमा आइपुगेको देख्दा कोरोना संक्रमित युवककी आमाले आफ्नो छोरोको अवस्थाबारेमा बुझ्न खोजिन्। नगर प्रमुख बजगाईंले उनलाई युवकको अवस्था सामान्य रहेको र उपचार भइरहेकोले चिन्ता नलिन आग्रह गरे। भारतको मुम्बईबाट आएका २१ वर्षीय युवकलाई यही २३ गते कोरोना संक्रमण भएको पुष्टि भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
