कोरोना अपडेट

मिस इङ्गल्याण्ड फर्किइन् चिकित्सा पेशामा, कोरोना संक्रमितको उपचारमा खटिँदै

नेपाल लाइभ मंगलबार, चैत २५, २०७६ ०४:२०

एजेन्सी-बेलायतमा कोरोना भाइरसको संक्रमण बढेपछि मिस इङ्गल्याण्ड भाषा मुखर्जी मोडलिङको दुनियाँ छाडेर चिकित्सा पेशामा फर्किएकी छिन्। मिस वर्ल्ड २०१९ मा बेलायतको प्रतिनिधित्व गरेकी उनी जुनियर चिकित्सकको रुपमा काममा फर्किएको सीएनएनले जनाएको छ।

उनी चिकित्सा पेशामा फर्कनुअघि आफैं १४ दिनको होम आइसोलेसनमा बसेकी थिइन्। त्यसपछि उनी चिकित्सा पेशामा काममा फर्किएकी हुन्।

विश्वभर च्यारिटी कार्यक्रममा सहभागी हुने क्रममा भारत आइपुगेकी उनी कोरोना संक्रमणका कारण स्वदेश फर्किएकी थिइन्। उनले पहिला काम गरेको अस्पतालका साथीहरुले बिरामीको अवस्थाबारे जानकारी गराएपछि अस्पताल प्रशासनसँग सम्पर्क गरेर काम गर्ने ईच्छा व्यक्त गरेकी थिइन्। उनी पहिला जुनियर चिकित्सकको रुपमा काम गरेको पिलिग्रिम अस्पताल व्यवस्थापनले सहमति जनाएपछि उनी काममा फर्किएकी हुन्।

उनले सीएनएनलाई विश्व नै संकटमा परेको र आफ्ना साथीहरु मानिसहरुको ज्यान जोगाउन खटिइरहेका बेला आफूलाई मिस इङ्गल्याण्डको ताज लगाएर हिँड्न नसुहाउने प्रतिक्रिया दिएकी छिन्। मुखर्जी भारतीय मुलकी बेलायती नागरिक हुन्। उनको परिवार उनी नौ वर्षको हुँदा भारतबाट बेलायत पुगेको थियो।