काठमाडौं- कोरोना भाइरस (कोभिड १९) का कारण इंग्लिस प्रिमियर लिग फुटबल अनिश्चित समयसम्मका लागि स्थगित भएको छ। लिगका २० क्लबसँग भिडियोमार्फत भएको बैठकले यस्तो निर्णय गरेको हो।
साथै प्रिमियर लिगले खेलाडीहरुलाई आफ्नो जागिर बचाइराख्न केही समयका लागि ३० प्रतिशत तलब कम लिनका लागि पनि आग्रह गरेको छ। लिग सुरु गर्न सुरक्षित समयको पर्खाइ रहने बताएसँगै आर्थिक संकटमा परिरहेका क्लबलाई सहयोग गर्न तलब कम गर्न आग्रह गरिएको हो।
अहिले ३० अप्रिलमा सुरु हुने भनिएको खेल कोरोनाको संक्रमण बढ्दै गएकाले सम्भव नहुने निश्कर्ष प्रिमियर लिगले निकालेको हो। प्रिमियर लिग सम्बन्धी गरिने निर्णयले क्लबको स्टेडियम र स्वास्थ्यकर्मी राष्ट्रिय स्वास्थ्य सेवाका लागि सहयोग गर्न सकिने बताइएको छ। त्यसले खेलाडीदेखि कर्मचारीसम्मको तलब कम गरिरहेका क्लबहरुले समर्थकको मन जित्न सक्ने अनुमान गरिएको छ।
इंग्लिस प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्।
हुन पनि ३० वर्षपछि लिग उपाधि जित्न लागेको लिभरपुल जति निराश यो समय अरु क्लब सायदै होला। प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ।
युरोपियन फुटबलको प्रशासकीय निकाय युइएफएले च्याम्पियन्स लिग र युरोपा लिग फुटबल अर्को सूचना जारी नभएसम्मका लागि स्थगित गर्ने निर्णय गरिसकेको छ। युरोपकै अरु लिगहरुको अवस्था पनि नाजुक बनिरहेको छ। कहिले सुरु गर्न सकिन्छ भन्ने यकिन छैन। जहाँ बेल्जियमले भने लिगको यो सिजन अन्त्य भएको घोषणा नै गरिसकेको छ।
फ्रेन्च लिग वान र स्पेनिस ला लिगा अनिश्चित समयका लागि स्थगित भइसकेको छ। इटालियन सिरी ए मे महिनाको अन्तिममा सुरु गर्ने भनिए पनि त्यो असम्भव जस्तो देखिइरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।