काठमाडौं- इंग्लिस क्लब टोटनह्यामले क्लबमा खेलाडीबाहेकका ५ सय ५० कर्मचारीको तलब २० प्रतिशतले कम गर्ने भएको छ। कोरोना भाइरस (कोभिड १९) कारण बढिरहेको आर्थिक संकटका कारण तलब कम गर्ने निर्णयमा क्लब पुगेको हो।
टोटनह्याममा प्रमुख ड्यानियल लेभीले अवस्थाको लेखाजोखा गर्दै आवश्यक अरु निर्णयहरु लिइने बताएका छन्।
सोमबार इंग्लिस क्लब न्युक्यासल युनाइटेडले खेलाडीबाहेकका कर्मचारीलाई बिदामा बस्न भनेको थियो।
युरोपभर नै कोरोना भाइरसका कारण अप्ठ्यारो परिस्थिति सिर्जना भइरहे पनि खेलाडीबाहेकका कर्मचारीको तलब कम गर्ने निर्णय इंग्ल्याण्डमा मात्र देखिएको छ। केही देशले खेलाडीको नै तलब कम गरिरहेका छन् भने केहीले ढिला तलब दिने गरी सहमति गरेका छन्।
स्पेनिस क्लब बार्सिलोनाका खेलाडीहरु सोमबार मात्रै ७० प्रतिशत तलब कम गर्न राजी भएका थिए। इटालियन क्लब युभेन्टसका खेलाडीले चार महिनासम्म तलब रोक्न सहमति जनाएका थिए।
कोरोना संक्रमणकै कारण युरोकप फुटबल सरेको छ, च्याम्पियन्स लिग, युरोपा लिगसँगै क्लब विश्वकप जस्ता ठूला प्रतियोगिताहरु सरेका छन्। खेल गतिविधि बन्द हुँदा क्लबको आयको माध्यम पनि कमजोर भएको छ। फुटबल जगतमा कल्पना गरिएभन्दा खराब स्थिति देखिएका छन्। विश्व फुटबलको प्रशासकीय निकाय फिफाले क्लबहरुलाई समेत सहज हुनेगरी केही नियम ल्याउने तयारी पनि गरिरहेको छ।
इंग्लिस प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्।
प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ। अप्रिल ३० सम्मका लागि खेल स्थगित भनिए पनि त्यसपछि पनि सुरु गर्न कठीन छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781621001.png)
-1781591850-1781592603.jpg)
-1764146706.png)
