- राजेन्द्र अाचार्य
चितवन– गृहमन्त्री रामबहादुर थापा ‘बादल’ले जेल सानो नेपाल भएको बताएका छन्। ‘जेल सानो नेपाल हो। बाहिर जे समस्या छ, त्यो जेलमा पनि छ।’, उनले भने, ‘त्यो सुधार गर्ने पद्धति बसाउन हामी लागेका छौँ।’
गृहमन्त्री भएपछि पहिलो पटक गृह जिल्ला चितवन आएका उनले भरतपुरस्थित जिल्ला कारागारको अवलोकन गर्दै जेलभित्र शोषण र अपराध नहोस् भनेर नयाँ योजना तथा निति बनाउन आफुहरु लागि परेको बताए।
आफु पनि भरतपुरको जिल्ला कारागारमा ६ महिना बसेको स्मरण गर्दै मन्त्री बादलले जेल भित्रका समस्या थाहा भएको भन्दै जेल सुधार कार्यक्रम लागु गर्ने बताएका छन्।
नयाँ सरकारले कारागारलाई अपराधीहरुका लागि सोच तथा चिन्तन बदल्ने सुधार गृहको रुपमा विकास गर्ने विभिन्न योजनाहरु तयार पारिरहेको जानकारी दिए। ‘जेलमा दुई थरिका कैदी छन्। एउटा अपराध गरेर र अर्को विना कसुर फसाइएका कैदी’, उनले भने,‘कारागारलाई सरकारले सुधार गरेर सभ्य नागरिक बनाउनेतर्फ अग्रसर गराउँछ।’
जनताले जनताको नयाँ सरकार पाएको जिकिर गदै गृहमन्त्री बादलले अधिकतम ४० प्रतिशत सजाय भोगेका कैदीबन्दीलाई मुक्त गर्ने ऐन संशोधनबारे गृहकार्य भइरहेको खुलासा समेत गरे।
साथै सरकारले कैदीबन्दीको सिदा वृद्धिको निर्णय गरिसकेको जानकारी दिँदै मुलुकभरमा रहेका १९ हजार कैदीबन्दीको सिदा वृद्धि गर्न समस्या नहुने समेत स्पष्ट पारेका छन्।
उनले कैदीबन्दीलाई समयमै उपचारसँगै कामसित जोड्ने, उद्योग व्यवसासमा संलग्न गराउने बारेमा विभिन्न योजनाहरु छिटै सार्वजनिक गर्ने घोषणा पनि गरे।
करीब आधा घण्टा कारागारको स्थलगत अवलोकनका क्रममा गृहमन्त्री बादलले कैदीबन्दीका समस्याहरु सुनेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
