विशेषज्ञको चेतावनी-भारतमा कोरोनाको 'सुनामी' आउँदैछ तयार रहनू [भिडियोसहित]

कोरोना अपडेट

नेपाल लाइभ आइतबार, चैत ९, २०७६ १५:१०

एजेन्सी- एक भारतीय विशेषज्ञले भारतमा कोरोना भाइरसको 'सुनामी' आउने चेतावनी दिँदै त्यसका लागि तयार रहन सुझाव दिएका छन्। विश्वका अन्य देशमा कोरोना संक्रमण बढिरहेका आधारमा भारत सबैभन्दा धैरै प्रभावित हुने बताउँदै उनीहरुले त्यसका लागि तयार रहन सुझाव दिएका हुन्।भारतमा आइतबारसम्म कोरोना भाइरसका ३ सय ३२ केस आइसकेको छ।

भारतको सेन्टर फर डिजिज् डायनेमिक्सका निर्देशक डा रामानन लक्ष्मीनारायणले चीनपछि इटाली र स्पेन कोरोना भाइरसको चपेटामा परेजसरी भारत पनि चपेटामा पर्ने बताएका हुन्। उनले भारतमा तीब्र गतिमा कोरोना भाइरसको संक्रमण बढ्ने बताउँदै विश्वका अन्य देश जस्तै भारतमा पनि रोकथामका लागि अपनाइने उपाय प्रभावकारी नहुने बताएका हुन्।

उनले तत्काल अन्य देशका तुलनामा भारतमा कोरोना संक्रमितको संख्या कम देखिए पनि केही हप्तामा चीन र स्पेनमा जस्तै देखिने ठोकुवा गर्दै कोरोनाको सुनामीका लागि तयार रहनुपर्ने बताए।

भारतको जनघनत्वका कारण कोरोनाजस्तो भाइरस छिट्टै फैलने बताउँदै उनले आगामी दिनमा जति परीक्षणको काम अगाडि बढ्छ त्यति नयाँ बिरामी देखिनेसमेत बताए।

भारतमा कम्युनिटी ट्रान्समिसनका आधारमा कोरोना भाइरस बढ्ने उनले बताएका छन्। उनले भारतमा ४० देखि ५० लाख ब्यक्ति गम्भीर अवस्थामा पुग्ने र उनीहरुलाई उपचारका लागि अस्पतालमै भर्ना गर्नुपर्ने बताए।

उनले अन्य देशको तुलनामा भारतको स्वास्थ्य अवस्था त्यति राम्रो नभएकाले चीनले जस्तै गरी तीब्र गतिमा तयारी गर्नुपर्ने, आइसियुको संख्या बढाउनुपर्ने र स्टेडियमहरुमा अस्थायी रुपमा भए पनि अस्पताल बनाउनु पर्ने बताए।

उनले भारतका लागि तीन हप्ता समय रहेको र जे-जस्तो तयारी गर्ने हो यही अवधिमा तयारी गर्नुपर्ने बताउँदै उनले भने' हामी अहिले सुनामी आइरहेको हेरिरहेका छौ‌‌। यदि समयमै तयारी नगर्ने हो भने सुनामीको चपेटामा परेर समाप्त हुन्छौ।'