कोरोनाको प्रभावमा खेलकुद : धमाधम खेल स्थगित गर्ने निर्णय

फुटबल

ऋग्वेद शर्मा शुक्रबार, फागुन ३०, २०७६ १८:०८

काठमाडौं- कोरोना भाइरसको संक्रमण बढ्दै जाँदा विश्व खेलकुद गतिविधिहरु प्रभावित भएका छन्। बन्द रंगशालामा खेल गर्नेदेखि खेलहरु सार्ने गतिविधि बढिरहेका छन्। अहिले त्यसरी प्रतियोगिताको मिति सार्ने र स्थगित हुने खेलहरुको संख्या निकै बढेको छ।

इटालियन क्लब युभेन्टस, स्पेनिस क्लब रियल मड्रिड, इङ्लिस क्लबहरु आर्सनल र चेल्सीलगायत अन्य केही क्लबका खेलाडी र प्रशिक्षक क्वारेन्टाइनमा छन्। बार्सिलोनाले आउने मंगलबारसम्म सबै खेल गतिविधि बन्द गर्ने निर्णय गरेको छ। यसले विश्व फुटबलको गतिविधि पछाडि धकेलिएको छ।

पाकिस्तान सुपर लिग क्रिकेटबाट विदेशी खेलाडीहरु घर फर्कंदै छन्। इंग्ल्याण्ड र श्रीलंकाबीचको टेस्ट क्रिकेट सिरिज सरेको छ। अमेरिकामा सबै खेल गतिविधिहरु बन्द भएका छन्। फर्मुला वानका खेलहरु पनि स्थगित भएका छन्। स्कटल्याण्डमा पनि लिग फुटबल स्थगित गरिएको छ।

२०२० मा हुने युरोकप फुटबल के हुने भन्ने विषयमा युइएफको बैठक मंगलबार बस्दै छ। २०२० मा नै जापानमा हुने तय भएको ओलम्पिक खेलहरु पनि अन्योलमा परेको छ।

भिडियोमा एक रिपोर्ट

च्याम्पियन्स लिग
च्याम्पियन्स लिग र युरोपा लिगसहित युरोपियन फुटबलको सर्वोच्च निकाय युइएफएद्वारा सञ्चालन हुने सबै प्रतियोगिता स्थगित भएका छन् । फ्रेन्च लिग वान र टू, इंग्लिस प्रिमियर लिग लगायतका प्रतियोगितासमेत सारिएका छन् । कोरोना भाइरसको संक्रमण फैलँदै गएकाले यस्तो निर्णय गरिएको बताइएको छ।

च्याम्पियन्स लिगमा आउँदो मंगबलार राति म्यानचेस्टर सिटी र रियल मड्रिड, युभेन्टस र लायोन साथै बुधबार राति बार्सिलोना र नापोली, बायर्न म्युनिख र चेल्सीबीच खेल हुने तय थियो।

यस्तै गरी युरोपा लिगका खेलहरु पनि हालका लागि स्थगित गरिएको युइएफएले जनाएको छ। युइएफए युथ लिगका खेल पनि स्थगित भएका छन्।

स्थगित भएका खेलहरु कहिले गर्ने भन्ने निर्णय कोरोना भाइरसका कारण आउने अवस्थापछि निक्योल गरिने बताइएको छ।

इंग्लिस प्रिमियर लिग
इंग्लिस प्रिमियर लिगसहित इंग्ल्याण्डमा सबै ठूला प्रतियोगिताहरु स्थगित गरिने निर्णय भएको छ। कोरोना भाइरसको संक्रमण बढ्दै जाँदा कम्तिमा अप्रिल ३ सम्मका खेलहरु स्थगित गरिने र त्यसपछि बाँकी निर्णय हुने बताइएको छ।

प्रिमियर लिगसँगै, इएफएलका खेलहरु, एफए महिला सुपर लिग, महिला च्याम्पियनसिप जस्ता सबै खेलहरु नयाँ मितिमा गरिने बताइएको छ।

यसका साथै मार्च २७ मा हुने इटाली र इंग्ल्याण्डबीचको खेल साथै त्यसको चार दिनपछि इंग्ल्याण्ड र डेनमार्कबीच हुने खेल पनि स्थगित गरिएको छ।

खेलहरु स्थगित गर्नुका साथै क्लबहरुका समर्थक भेटघाट, ठूला जमघट, सामूहिक खेल अभ्यास लगायतका गतिविधि नगर्न पनि भनिएको छ।

फ्रेन्च लिग वान
फ्रान्समा माथिल्ला दुई फुटबल डिभिजन लिग वान र लिग टू का खेलहरु स्थगित भएका छन्। कोरोना भाइरसको संक्रमण बढ्दै गएकाले अर्को सूचना नआउँदासम्मका लागि खेलहरु स्थगित गरिएको बताइएको छ।

फ्रान्समा यसअघि नै खेलहरु बन्द रंगशालामा गरिएको थियो। अहिले भने खेलाडीहरुमा नै संक्रमण देखिन थालेपछि खेल स्थगित नै गर्ने निर्णय भएको हो।

इन्डियन प्रिमियर लिग
इन्डियन प्रिमियर लिग (आइपिएल) १८ दिन पछि सर्ने भएको छ। यसअघि चैत १६ गतेदेखि गर्ने भनिएको प्रतियोगिता अहिले वैशाख ३ गतेका लागि नयाँ मिति तोकिएको हो।

बन्द स्टेडियममा खेल गर्ने कि प्रतियोगिता सार्ने भन्ने विषयमा भएको छलफलपछि मिति सार्ने निर्णय भएको हो। भारत सरकारले खेल स्थगित नगर्ने तर मानिसहरु

धेरै जम्मा हुने काम नगर्न भनेपछि बन्द स्टेडियममा खेल गर्ने गरी सम्बन्धितहरु लागिपरेका थिए। तर अवस्था गम्भीर हुँदै गएकाले प्रतियोगिता सारिएको हो।

शनिबार आइपिएलसम्बद्धहरुको बैठक बस्ने र प्रतियोगिताका अन्य विषयमा निर्णय गरिने बताइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।