काठमाडौं– गृहमन्त्री रामबहादुर थापा ‘बादल’को निर्देशनमा कारागार व्यवस्था विभागले जेलहरुमा शुद्धिकरण अभियान सुरु गरेको छ। जेलहरुमा लामो समयदेखि कब्जा जमाएर बसेका चौकीदार र नाइकेका रुपमा रहेका कैदीहरुलाई विभागले स्थानान्तरण सुरु गरेको छ।
विभागले शुक्रबार मोरङ जिल्ला कारागारमा चौकीदार रहेका अभिषेक गिरीको सरुवा गरेको छ। विराटनगरका गुन्डा नाइके गिरी अपहरणमा मुद्दामा जेल परेका हुन्। मोरङ जिल्ला कारागारमा उनको ‘राज’ चल्दै आएको थियो।
गत सोमबार गृह मन्त्रालयमा आयोजित एक कार्यक्रमम मन्त्री थापाले गिरीको नाम नलिई जेलमा मर्जिडिज चढ्ने कैदीहरु रहेको बताएका थिए। आर्थिक चलखेलका आधारमा चौकीदार र नाइके रहेकाहरुलाई सरुवा गर्न उनले निर्देशन दिएका थिए।
गिरीलाई मोरङबाट केन्द्रीय कारागारमा पठाइएको मोरङका प्रहरी प्रमुख एसपी अरुणकुमार बिसीले बताए।
उनको स्थानान्तरणको क्रममा मोरङ कारागारमा तनाव भएको थियो। गिरीका सहयोगीहरुले जेलभित्रै नाराबाजी गरेका थिए। कैदीहरुलाई नियन्त्रणमा लिन ठुलो संख्यामा प्रहरी परिचालन गरिएको थियो। उच्च सुरक्षाका साथ उनलाई काठमाडौं पठाइएको छ।
कारागारभित्रको व्यापार गिरीले चलाउदै आएका थिए। कारागार प्रशासनलाई समेत प्रभावमा पारेर उनी मर्सिडिज गाडिमा जेलबाहिर सपिङ गर्न र घुम्न निस्कने गरेको सूचना गृहमन्त्री थाापाले पाएका थिए। सोही आधारमा उनलाई त्यहाँबाट हटाइएको हो।
विभागले अन्य जेलका चौकीदारहरुको समेत लगत संकलन गरी स्थानान्तरणको प्रक्रिया सुरु गरेको छ। मन्त्रालयको निर्देशनअनुसार अन्य जेलको अध्ययनको काम भइरहेको कारागार व्यवस्था विभागका महानिर्देशक कृष्णचन्द्र घिमिरेले बताए।
जेलमा असल चालचालन भएको कैदीलाई आन्तरीक व्यवस्थापन मिलाउन चौकीदार, नाइके र भाइ नाइके बनाउने प्रावधान छ। चौकीदार सबै कैदीहरुको इन्चार्ज हुन्छ। जेल व्यवस्थापनलाई सहज बनाउने उदेश्यले यस्तो प्रावधान राखिएपनि आर्थिक चलखेलका आधारमा चौकीदार र नाइकेहरु चयन हुने गरेको छ। उनीहरुले कारागार प्रशासनसँग मिलेर अन्य कैदी÷बन्दीहरुलाई शोषण गर्ने भएकाले बेला बेलामा जेलमा आन्दोलन समेत हुने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
