काठमाडौं- नेपाली बजारमा १ लाख ५२ हजारदेखि १ करोड ४१ लाख ९० हजार रुपैयाँसम्मका मोटरसाइकल उपलब्ध छन्। १ लाख ५२ हजार रुपैयाँको मोटरसाइकल बंगलादेशी रनर कम्पनीको बाइक आरटी हो। यो मोटरसाइकलमा ८० सिसी इन्जिन क्षमता छ। त्यस्तै १ करोड ४१ लाख ९० हजार रुपैयाँ पर्ने मोटरसाइकल इटालियन कम्पनी एमभी अगस्टाको हो। यो मोटरसाइकलमा ९ सय ९८ सिसी क्षमताको इन्जिन छ।
नेपाली बजारमा दुई दर्जनभन्दा बढी ब्रान्डका मोटरसाइकल बिक्री हुँदै आएका छन्। नाडा अटोमोबाइल्स एसोसिएसन अफ नेपालले बिहीबार सार्वजनिक गरेको सवारीसाधनको अधिकतम खुद्रा बिक्री मूल्य (एमआरपी) सूचीमा सबै ब्रान्डको मूल्य भने समावेश छैन। तर सबै सवारी आयातकर्ताले हरेक ४/४ महिनामा एमआरपी छाप्नु पर्ने व्यवस्था सरकारले गरेको छ।
होन्डाका मोटरसाइकल स्याकार ट्रेडिङले बिक्री गर्दै आएको छ। होन्डाको १ लाख ५४ हजार ९ सय रुपैयाँदेखि ३१ लाख ५० हजार रुपैयाँसम्मका मोटरसाइल नेपाली बजारमा उपलब्ध रहेका छन्। १ लाख ५४ हजारको होन्डा नाभी १ सय १० सिसीको र ३१ लख ५० हजारको ६ सय सिसीको होन्डा सिबीआर६०० मोटरसाइकल हो। यो मोटरसाइकल जापानमै बनेको हो। होन्डाका २७ मोडलका मोटरसाइकल उपलब्ध छन्।
यामाहाका मोटरसाइकल तथा स्कुटर गरी १ लाख ९५ हजार ९ सयदेखि ४ लाख ६४ हजार रुपैयाँसम्मका मोटरसाइकल उपलब्ध रहेका छन्। एमएडब्लू इन्टरप्राइजेजले उपलब्ध गराएको यामाहाका १६ वटा मोडल नेपाली बजारमा उपलब्ध छन्।
बजाजका मोटरसाइकल भने नेपालमै एसेम्बल हुन थालेको लामै समय भइसकेको छ। मूल्यसूचीमा उत्पत्ति मुलुकमा नेपाल लेखिएको भए पनि हंसराज हुलासचन्द एन्ड कम्पनीले हालसम्म यसको औपचारिक घोषणा भने गरेको छैन। बजाजका १ लाख ६७ हजार ९ सयदेखि ५ लाख २९ हजार रुपैयाँसम्मका मोटरसाइकल उपलब्ध छन्। बजाजका मोटरसाइकल नेपालमै एसेम्बल भएपछि आयातित भन्दा सस्तो हुने अनुमान गरिएपनि त्यस विपरीत महंगो मूल्यमा बिक्री भइरहेका छन्।
त्यस्तै जगदम्बा मोटर्सले बिक्री गर्दै आएका टिभिएसका मोटरसाइकल १ लाख ८१ हजारदेखि ७ लाख ७९ हजार ९ सय रुपैयाँसम्ममा उपलब्ध छन्। टिभिएसको १ सय सिसीको मोपेससमेत नेपाली बजारमा पाइन्छ। यो मोपेटको एमआरपी १ लाख १५ हजार ९ सय रुपैयाँ तोकिएको छ। टिभिएसका मोटरसाइकल, स्कुटर, मोपेड गरी २१ मोडल उपलब्ध छन्।
एनजिएम हिरोले उपलब्ध गराउँदै आएको भारतमा सबैभन्दा धेरै बिक्री हुने हिरोका मोटरसाइकल तथा स्कुटर गरी २० मोडल उपलब्ध छन्। हिरोका १ लाख ६६ हजार ५ सयदेखि ३ लाख ८५ हजार रुपैयाँसम्मका मोटरसाइकल पाइन्छ। नाडाले प्रकाशित गरेको मूल्यसूचीमा उपलब्ध मोटरसाइकलको मूल्य मात्र यसमा समावेश गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
