काठमाडौं- यातायात व्यवस्था विभागले स्मार्ट लाइसेन्स वितरण सुरु गरेको ५० महिनापछि ट्राफिक प्रहरीलाई स्मार्ट कार्ड रिड गर्ने मेसिन उपलब्ध गराएको हो। शुक्रबारदेखि विभागले सातवटै प्रदेश प्रहरीलाई स्मार्ट लाइसेन्स रिडर उपलब्ध गराएको जनाएको छ।
४० वटा ह्याड रिडर मेसिन सबै प्रदेश प्रहरी, ट्राफिक प्रहरी निर्देशनालय तथा महानगरीय ट्राफिक प्रहरी महाशाखालाई उपलब्ध गराइएको यातायात व्यवस्था विभागका महानिर्देशक गोगनबहादुर हमालले जानकारी दिए। ‘प्रदेशहरुलाई ४ देखि ६ वटासम्म उपलब्ध गराइएको छ भने बाँकी रहेका ट्राफिक निर्देशनालय र महानगरीय ट्राफिक प्रहरी महाशाखालाई दिइएको हो,’ हमालले भने, ‘अब ट्राफिक प्रहरीले स्मार्ट लाइसेन्सको विवरण आफै मेसिनबाट हेर्न सक्ने छन्।’
यातायात व्यवस्था विभागले २०७२ मंसिर १४ गतेदेखि साविक यातायात व्यवस्था कार्यालय सवारी चालक अनुमतिपत्र, बागमतीबाट स्मार्ट लाइसेन्स वितरण सुरु गरेको थियो। यातायात क्षेत्रलाई ३ देखि ५ वर्षभित्र उच्च प्रविधियुक्त (हाइटेक) बनाइने उद्घोष गरेको विभागले लाइसेन्स रिड गर्ने मेसिन उपलब्ध गराउनै ४ वर्ष ३ महिना लगाएको छ।
स्मार्ट लाइसेन्समा प्वाल पार्ने व्यवस्था छैन। लाइसेन्स बाहकको विवरण र उसले गरेका गल्ती सफ्टवेयरमा अंकित गर्ने व्यवस्था रहेको छ। यसका लागि विभागले ट्राफिक प्रहरीलाई सफ्टवेयरको लिङक र स्मार्ट लाइसेन्स रिड गर्ने मेसिन उपलब्ध गराउनुपर्ने व्यवस्था हो। हालसम्म ट्राफिक प्रहरीले पत्रमार्फत कारबाहीको विवरण उपलब्ध गराउँदै आएको छ। कुन सवारी कति पटक कारबाहीमा पर्यो भन्ने जानकारी लिन सफ्टवेयर नै हेनुपर्ने अवस्था कम भएको छ।
अब भने ट्राफिक प्रहरीले स्मार्ट लाइसेन्समा भएको चिप्समार्फत रिडरले लाइसेन्स बाहकको कारबाहीको विवरण तत्काल थाहा पाउने छ। तीन वर्षअघिदेखि देशभर स्मार्ट लाइसेन्स लागू भएको थियो। एसियाली विकास बैंक (एडीबी)को १५ करोड रुपैयाँ सहयोगमा अक्टोबार २०१३ मा सुरु भएको इन्फर्मेसन कम्युनिकेसन टेक्नोलोजी (आसीटी) प्रोजेक्ट अन्तर्गत स्मार्ट कार्ड ड्राइभिङ लाइसेन्स लागू भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
