रत्ननगर– शंकास्पद रोगका कारण चितवनको रत्ननगर नगरपालिका–१५ माधवपुरको लामिछाने पोल्ट्री फार्मका ३ हजार ५ सय लेयर्स कुखुरा मरेका छन्।
करीब एक हप्ताको अन्तरालमा यती ठूलो संख्यामा कुखुरा मरेका हुन्। यही चैत १५ गतेदेखि कुखुरा मर्न थालेको फार्मका सञ्चालक द्रोणप्रसाद लामिछानेले जानकारी दिए। उनका अनुसार कुन रोगका कारण कुखुरा मरेका भन्ने पहिचान भने भएको छैन।
‘एक्कासि कुखुरा झोक्राउने र मर्ने भयो,’ लामिछानेले भने,‘ल्याबमा चैत १६ गते र २० गते नमूना पठाए पनि अहिलेसम्म केही जानकारी आएको छैन।’ उनका अनुसार फार्ममा बाँकी रहेका १ हजार ६ सय कुखुरासमेत मर्ने अवस्थामा पुगेका छन्।
सो जानकारी आएपछि बिहीबार जिल्ला पशुसेवा कार्यालय, चितवनले फार्मको स्थलगत निरीक्षण गरेको छ। पशुसेवा कार्यालयका पशु चिकित्सक डा विकास श्रेष्ठले कुखुराको मृत्युदर धेरै रहेको जानकारी दिँदै परीक्षणको रिपोर्ट नआएसम्म यसै भन्न नसकिने बताए।
चैत २० गते भरतपुरस्थित पंक्षीरोग अन्वेषण प्रयोगशालाबाट नमूनाको थप परीक्षणका लागि काठमाडौँ पठाइएको श्रेष्ठ बताउँछन्। उनले बर्डफ्लूसँग मिल्ने लक्ष्य भने नदेखिएको दाबी गर्दै कुन रोग भनेर यसै भन्न नसकिने बताए।
अण्डा दिन थालेको ३ महिना नहुँदै अचानक रोग लागेर कुखुरा मरेपछि अहिलेसम्म ४० लाख रुपैयाँभन्दा बढी क्षति भइसकेको जनाइएको छ। सुरुमै पशुसेवा कार्यालयलाई जानकारी दिँदा चासो नदिएको आरोप कुखुरापालक किसानको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
