काठमाडौं- नेत्रविक्रम चन्द 'विप्लव' नेतृत्वको नेकपाका सर्लाही जिल्ला इन्चार्ज कुमार पौडेलमाथि फेक इन्काउन्टर गरी हत्या गरेको आरोप लागेका तीन प्रहरी अधिकारीलाई प्रहरी प्रधान कार्यालय (हेडर्क्वाटर) तानेर सोधपुछ गरिएको छ।
पौडेल हत्यामा संलग्न भएको आरोप लागेका प्रहरी निरीक्षक कृष्णदेव (केडी) साह र हवल्दारद्वय सत्यनारायण मिश्र र विनोद साहलाई हेडक्वाटर तानेर सोधपुछ गरिएको स्रोतले जानकारी दिएको छ।
यसबारे प्रहरी प्रवक्ता डिआइजी शैलेश थापा क्षत्रीले भने अनविज्ञता प्रकट गरेका छन्। ‘खै मलाई त थाहा भएन। मैले पनि बुझ्नै पर्छ,’ डिआइजी क्षत्रीले नेपाल लाइभसँग भने।
तत्कालीन प्रहरी महानिरीक्षक सर्वेन्द्र खनालको कार्यकाल सकिए लगत्तै उनीहरू तीनै जनालाई हेडक्वार्टर तानिएको थियो। खनालले उनीहरूलाई प्रदेश २ मा घुमुवा प्रहरीका रूपमा खटाएका थिए।
हत्या आरोप लागेका र कारबाहीको समेत साफारिसमा परेका व्यक्तिलाई 'फिल्ड'मा खटाउँदा थप विवाद हुने भन्दै उनीहरूलाई हेडक्वार्टर तानिएको बताइएको छ। उनीहरूसँग भएको हतियारसमेत संघीय प्रहरी कार्यालय, धनुषामा बुझाउन निर्देशन दिइएको थियो।
हेडक्वार्टरमा तानिएका तीनै जना प्रहरीमाथि पौडेल हत्याबारेमा सोधपुछ गरिएको स्रोतले जानकारी दिएको छ।
विशेष ब्युरोमा दरबन्दी रहेका उनीहरू तत्कालीन आइजी खनालकै निर्देशनमा सर्लाहीमा खटिएका थिए। पछि उनीहरूकै टोलीले गत असार ५ गते पौडेलको हत्या गरेको आरोप लागेको छ।
पौडेल दोहोरो मुठभेडमा मारिएको भनिए पनि राष्ट्रिय मानव अधिकार आयोगको टोलीले 'समातेर हत्या गरिएको' भन्दै गत मंसिर ३ गते प्रतिवेदन सार्वजनिक गरेको थियो। उनीहरू तीनै जनालाई कर्तव्य ज्यान मुद्दामा कारबाही गर्न भन्दै प्रतिवेदनमा उल्लेख भए पनि कुनै कारबाही भएको थिएन। कारबाही नै नभएपछि गत माघ १७ गते आयोगले गृह मन्त्रालयलाई लिखित निर्देशन दिँदै पौडेल हत्यामा संलग्न प्रहरीलाई कारबाही गर्नु भनेको थियो। आयोगको उक्त पत्र गृह मन्त्रालयबाट हेडक्वार्टर, प्रदेश २ प्रहरी कार्यालय हुँदै जिल्ला प्रहरी कार्यालय सर्लाही पुगेको थियो।
उक्त पत्र सर्लाही पुगेँसँगै उनीहरूलाई हेडक्वाटर झिकाएर सोधपुछ गरिएको स्रोतले जानकारी दिएको छ।
यता 'कारबाही गर्नू' भनेर निर्देशन दिएको आयोगलाई भने उनीहरूमाथि कारबाही भयो भएन भन्ने जानकारी अहिलेसम्म आएको छैन। यसबारे आयोगका प्रवक्ता वेद भट्टराईले भने, ‘गृहले कारबाहीका लागि हेडक्वार्टरलाई पत्र पठाएको भन्ने जानकारी आएको छ। त्योभन्दा बढी कारबाही भयो/भएन भन्ने जानकारी अहिलेसम्म आएको छैन।'
प्रहरी प्रधान कार्यालयमा रहेको विशेष ब्युरोको टोलीले पौडेललाई ९ राउन्ड गोली हानेर हत्या गरेको आयोगको निष्कर्ष छ।
पोस्टमार्टममै शंका
गत असार ५ गते सर्लाहीको लालबन्दी नगरपालिका–१ लखनदेवीस्थित जंगलमा विप्लव नेतृत्वको पार्टीका सर्लाही इन्चार्ज पौडेल मारिएका थिए।
‘अन टेस्ट’ मोटरसाइकलसहित २ वटा मोटरसाइकलमा आएका कुमार पौडेलसहित ४ जना व्यक्तिको समूहले प्रहरीमाथि आक्रमण गरेपछि जवाफी कारबाही गर्दा पौडेलेको ज्यान गएको प्रहरीको दाबी थियो।
तर घटनास्थलको प्रकृति, उपस्थित मानिस, पौडेलको शरीरमा गोली लागेका ठाउँको विवरण, पोस्टमार्टम रिर्पोटलगायतका आधारमा आयोगले गरेको छानबिनमा पौडेलको मृत्यु आकस्मिक मुठभेडका कारण नभई प्रहरीको योजनाअनुसारै भएको पुष्टि भएको थियो।
आयोगले पटकपटक ताकेता गर्दा पनि जिल्ला अस्पताल सर्लाहीले पौडेलेको पोस्टमार्टम रिपोर्ट पठाएको थिएन। रिपोर्ट नपठाएपछि आयोगले अस्पतालका डाक्टर वीरेन्द्रकुमार मण्डलसँग पनि बयान लिने तयारी गरेपछि मात्र रिपोर्ट आयोगले पाएको थियो। पोस्टमार्टम रिपोर्टमा पनि शंका गर्ने ठाउँ प्रशस्त देखिएको आयोगले बताएको थियो।
नयाँ नजिर बन्ने संकेत
पौडेल इन्काउन्टरमा संलग्न प्रहरी अधिकारी कारबाहीमा परे इन्काउन्टरमा नयाँ नजिर बन्न सक्ने देखिएको छ। यसअघि विभिन्न आवरणमा प्रहरीको गोली लागेर आपराधिक पृष्ठभूमिका गुन्डा नाइके दिनेश अधिकारी (चरी), कुमार घैंटे, मनोज पुन, केदार सहनीदेखि लिएर शंकाकै आधारमा भक्तपुर इन्काउन्टरमा अजित तामाङ र गोपाल तामाङ, लागुऔषध दुर्व्यसनी प्रवीण खत्री मारिएका थिए।
यी इन्टकाउन्टर विवादित बनेपनि विस्तृत छानबिन सकिएको छैन। यी सबै इन्टकाउन्टरबारे आयोगले छानबिन गरिरहेको छ। तर प्रतिवेदन सार्वजनिक गरेको छैन। पौडेल मृत्यु प्रकरणपछि अन्य इन्काउन्टरका घटना पनि आकस्मिक भन्दा नियोजित भएको शंका बढेको छ। (कभर तस्बिर : सञ्चार केन्द्र)
थप समाचार
कुमार पौडेलकाे हत्यामा संलग्नलाई कारबाहीकाे माग गर्दै हुलाकमार्फत् किटानी जाहेरी
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।