काठमाडौ- ललिता निवास प्रकरणमा मालपोत विभागका तत्कालीन महानिर्देशक मुकुन्दप्रसाद आचार्यदेखि युक्तप्रसाद श्रेष्ठसहित पाँच कर्मचारीले बदनियतपूर्ण रुपमा सरकारी जग्गा व्यक्तिको नाममा पास गरिदिएवापत त्यहीँको जग्गा आफन्तको नाममा बकसपत्रमार्फत् पास गरेको खुलेको छ।
काम गरिदिएवापत उनीहरु कसैले बुहारीको नाममा त कसैले श्रीमती, बहिनी र साढुभाइको नाममा जग्गा पास गरेका थिए। अख्तियार दुरुपयोग अनुसन्धान आयोगको आरोपपत्र अनुसार सार्वजनिक जग्गा किर्ते गर्ने कार्यमा सहयोग गरेवापत प्राप्त भएको जग्गालाई उनीहरुले लुकाउने प्रयोजनका लागि आफन्तको नाममा जग्गा पास गरिदिएका हुन्।
महानिर्देशकद्वारा बुहारीलाई बकस
पदको अधिकार दुरुपयोग गर्दै तत्कालीन मालपोत विभागका महानिर्देशक मुकुन्द आचार्यले ललिता निवासको जग्गा आफ्नै कार्यकक्षमा लिखत तयार पार्दै पास गराएका थिए।
तत्कालीन महानिर्देशक आचार्यले आफ्नै छोरीज्वाईं बैकुण्ठ शर्मा रेग्मीलाई बकसमार्फत ललिता निवासको जग्गा दिलाए। अख्तियारमा बैकुण्ठले दिएको बयानमा मालपोत विभागका महानिर्देशक रहेका बेला कार्यकक्षमा बोलाएर सही छाप गराएको र उक्त कागजातका बारेमा प्रश्न गर्दा ससुराको विश्वास छैन भनेको बताएका छन्। उक्त जग्गा सार्वजनिक भएको बारे सञ्चार माध्यममा सार्वजनिक भएपछि मात्र आफूले जानकारी पाएको उनको तर्क छ ।
साढुदाजु मालपोत अधिकृत हुँदा बकस
मालपोत कार्यालयका अधिकृत कलाधर देउजाले बालुवाटारको सार्वजनिक जग्गा आफ्ना साढुभाइ इन्द्रबहादुर क्षेत्रीको नाम पास गरिदिए। बकसको रुपमा उनले बालुवाटारको सार्वजनिक जग्गा आफ्नो नाममा पास गरेका थिए। क्षेत्रीले अख्तियारलाई दिएको बयानमा राणा परिवारलाई आफुले नचिनेको तर साढुदाइ देउजाले बालुवाटारमा एउटा जग्गा छ तपाईको नाम राखिदिउँ भन्दै पास गरिदिएको अख्तियारमा बयान दिएका छन्। उनले उक्त जग्गा दुई वर्षपछि १० लाखमा बिक्री गरेका थिए ।
काकाससुरा मालपाेतमा हुँदा बकस
यसरी जग्गा बकसमा पाउने मध्येका एक प्रतिवादी शान्ति मल्ल प्रधानले आफ्नो काकाससुरा मालपोत कार्यालयमा कार्यरत हुँदा बकसमा प्राप्त गरेकी थिइन्। उनलाई मालपोत कार्यालयमा कार्यरत रहेका नाताले काका ससुरा सुरेन्द्रमान कपालीले बालुवाटारको जग्गा ८१ हजार मुल्य राख्दै उनको नाममा बकस गरिदिएका थिए । उक्त जग्गा उनले ४/५ वर्षपछि ८ लाखमा विक्री गरेकी थिइन्।
श्रीमान मालपोतमा हुँदा श्रीमतीलाई जग्गा
अख्तियारको बयानमा युक्तप्रसाद श्रेष्ठकी श्रीमतीले पनि मालपोत कार्यालयमा कार्यरत रहेका श्रीमानको पहुँचका आधारमा बालुवाटारको जग्गा प्राप्त गरेको बयान अख्तियारलाई दिएकी छन् । उनी डिल्लीबजार मालपोतमा कार्यरत रहेको समयमा २०४९ सालमा ८५ हजार मोठ राखेर बकसपत्र गरिएको थियो। श्रेष्ठकी श्रीमती सरस्वतीकुमार श्रेष्ठले दिएको बयानमा जग्गा कारोबारी मिठुराम चापागाईंबाट बकसपत्रमार्फत प्राप्त भएको खुलाएकी छिन्।
बहिनीलाई वकस
युक्तप्रसाद श्रेष्ठले श्रीमतीमात्र नभई बहिनी निर्मलादेवी श्रेष्ठलाई पनि बकसमा जग्गा पास गराएका थिए। अख्तियारको बयानमा निर्मलादेवीले दाजु डिल्लीबजार मालपोत कार्यालयमा खरिदार रहँदा आफ्नो नाममा एउटा जग्गा पास गर्न बोलाएको र पछि उनैले ऋण लाग्यो वेच्न पर्याे भनेपछि आफूले पास गरिदिएको बयान दिएकी छन् ।
'जग्गाको पुर्जा नै देखेको छैन'
मुख्य दलाली रामकुमार सुवेदीले राणा परिबारको जग्गा ठेक्कामा लिए। सबै मोहीहरुलाई खडा गर्दै सुवेदीले नै सबै जग्गाको पुर्जा लिएका थिए । अख्तियारको बयानमा एक मोही बिलबहादुर महर्जनले आजसम्म जग्गाको पुर्जा नदेखेको बयान दिएका छन्। उनले मोही कायम भएवापत नौ लाख अठासी हजार रुपैया आफूले बुझेको भने सकारेका छन्।
...मोही नै बेपत्ता
बालुवाटार जग्गा प्रकरणमा जग्गा माफियाहरुले राखेका नक्कली मोहीमध्ये ५६ जना अख्तियारको बयानमा भेटिएनन्। रामकुमार सुवेदी र शोभाकान्त ढकालले नक्कली मोहीको नाम राखेका उनीहरुको नाममा गोरखापत्रमा सार्वजनिक सूचना प्रकाशित गर्दासमेत फेला नपरेका हुन्।
.JPG)
उनीहरुलाई अख्तियारले बेपत्ता भएका मोहीको नाम राखेर आरोपपत्र विशेष अदालतमा पेश गरेको छ । यसरी फर्जी मोही खडा गरिएका अधिकांश महर्जन र डंगोल थरका छन् । २०७६ असार ११ गते उनीहरुको नाममा अख्तियारले हाजिर हुन आउने सार्वजनिक सूचना गरेको थियो । उनीहरुको स्थायी ठेगाना अनुसार खोजी गर्दा नभेटिएपछि अख्तियारले सार्वजनिक सुचना जारी गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770365800.png)
-1764146706.png)
