नयाँ दिल्ली (एजेन्सी)- बक्स अफिसमा यतिबेला जादू देखाइरहेको बलिउडको एक्सन फिल्म 'बागी २' लाई टाइगर श्राफको सबैभन्दा हिट फिल्म भन्न थालिएको छ। फिल्मले पाँच दिनमा ९५ करोड भारुभन्दा बढी कारोबार गरिसकेको छ। योसँगै चर्चा भइरहेको छ, आखिर 'बागी २' को लागि कस्तो सूत्र अपनाएको छ? समीक्षक र दर्शकले आखिर किन फिल्म मन पराए? फिल्म सफल हुनुमा यस्ता ५ कारण विश्लेषण गरिएको छ:
एक्सन : सबैभन्दा मुख्य कारण फिल्मको एक्सनलाई मानिएको छ। 'बागी २' को एक्सन सिक्वेन्स यति आकर्षक छ, अक्षय कुमारले पनि यसको तारिफ गरिसकेका छन्। यससँगै टाइगर श्राफलाई बलिउडको नयाँ एक्सन हिरो भन्न थालिएको छ।
संवाद : फिल्ममा एक्ससँगै संवाद पनि प्रभावशाली छ। फिल्मको एक दृश्य र संवाद सामाजिक सञ्जालमा भाइरल भइरहेको छ। उक्त दृश्यमा हिरोले भिलेनलाई जिपको अगाडि बाँधेर भन्छन्, 'ढुंगा हान्दासम्म त ठीकै थियो, झन्डा जलाएर गलत गरिस्।' यस्तै सशक्त संवाद फिल्ममा बाक्लै छन्।
कलाकार : समीक्षकले टाइगरसँगै फिल्मका अन्य कलाकारको कामको पनि प्रशंसा गरेका छन्। मनोज बाजपेयी प्रहरीको भूमिकामा रहेको यस फिल्ममा अर्का प्रभावशाली अभिनेता रणदीप हुड्डा अन्डकभर एजेन्टका रुपमा देखिएका छन्। यस्तै, कार डिलरको भूमिकामा देखिएका दीपक ढोबरियालले हैदराबादी चरित्रमा आफूलाई खरो रुपमा प्रस्तुत गरेका छन्।
संगीत : 'बागी २' को प्रशंसनीय पाटो यसको संगीत पनि हो। फिल्मको बीचबीचमा आउने आतिफ असलमको गीतले कथालाई चाखलाग्दो बनाउँछ। कतिपय दृश्यमा दर्शकको मुहारमा अनायास मुस्कान छाइदिन्छ। 'मुन्डिया तु बचके रही' बोलको गीत सुमधुर लाग्छ।
'बागी'को सफलता : दुई वर्षअघि आएको 'बागी'को सफलताको फाइदा पनि यसको सिक्वलले लिएको छ। किनभने यस फिल्मबारे बताउन निर्माताले धेरै मिहिनेत गर्नुपरेन। दर्शकले पहिल्यै हिट भएको फिल्मको सिक्वलको रुपमा यो फिल्म हेरिदिए। योसँगै टाइगरको फ्यान फलोइङले पनि फिल्मको व्यापार उकास्न सघायो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
