स्पोर्टस लाइभ

रञ्जितको फ्रि किक उत्कृष्ट कि सामान्य?

जहाँ हार्ने र जित्ने दुवै टिम दुःखी

काठमाडौं- रञ्जित धिमालको गोललाई छाडेर हेर्दा नेपाल पुलिस क्लब र मछिन्द्रबीचको खेलमा खास जोश थिएन। सहिद स्मारक ‘ए’ डिभिजन लिगमा पुलिस क्लबसँग यस्तो अपेक्षा हुँदैन। अहिलेको मछिन्द्रसँग त झनै यस्तो अपेक्षा राख्नै मिल्दैन।

मछिन्द्रले पुलिसलाई १-० ले जितेर पनि खुसी हुन नसक्नुको कारण त्यही अपेक्षाअनुसारको खेल हुन नसक्नु नै हो। पराजित पुलिसको त कमजोर खेलमा अपेक्षा पूरा हुने कुरै रहेन।

विराज महर्जन, सुजल श्रेष्ठ, विशाल श्रेष्ठ, विशाल राई, दीपक राई, हेमन गुरुङ, एडिलजा सोमिडे, अभिषेक रिजाल र देवेन्द्र तामाङ जस्ता खेलाडीलाई मनाङ मर्स्याङदीबाट यसैसिजन क्लब भित्र्याएको मछिन्द्रको लिग जित्ने योजना यत्तिको खेलले कठीन हुने प्रशिक्षक प्रवेश कटुवाललाई पनि लाग्छ।

‘आज हामीले तीन अंक त जोड्यौँ तर सोचेअनुसार खेल भएन। हाम्रो हेभिवेट टिम भएर पनि केही राम्रा मौकाहरु गुमाउन पुगेका थियौँ। सिनियर खेलाडीहरुले सामान्य गल्ती गर्नु राम्रो देखिएन’ मछिन्द्रका प्रशिक्षक कटुवालले भने।

मछिन्द्र र पुलिसको खेलको पहिलो हाफ त निरश नै थियो। दोस्रो हाफमा केही राम्रा मुभहरु देखिए। त्यसमा ५४औँ मिनेटमा कर्नरबाट दुई याड नजिकैको फ्रिकिक बलमा मछिन्द्रका रञ्जित धिमालले हानेको फ्रि किक गोल विशेष थियो। खेलभर सम्झनलायक अवस्था त्यति नै हो।

तर त्यसलाई रञ्जितको उत्कृष्ट गोल भन्दा पनि आफ्ना गोलकिपर शत्रुधन कुमार चौधरीको गल्तीको परिणाम मान्छन् पुलिस क्लबका प्रशिक्षक अनन्त थापा।

‘त्यो फ्रि किक साधरण फ्रि किक हो। त्यसमा केही अचम्म मान्नु पर्दैन त्यो गोलकिपरको गल्तीले मात्रै गोल भएको हो। त्यो कुरा स्वीकार गर्नै पर्छ। उसले बचाउनै पर्ने गोल हो’ खेलपछि निराश देखिएका प्रशिक्षक थापाले भने।

मछिन्द्रविरुद्धको हारले पुलिस क्लबलाई उपाधिमा दाबेदारी दिन कठीन हुने भएको छ। पुलिसको ८ खेलमा ११ अंक छ। ३ खेलमा जित २ बराबरी र ३ हार भएको पुलिसले बाँकी ५ खेलमा मछिन्द्रसँगै आर्मी क्लब र मनाङ मर्स्याङ्दी जस्ता टिमलाई पछि पार्नुपर्ने हुन्छ।

पुलिसविरुद्धको खेल जितेको मछिन्द्रको ८ खेलमा १६ अंक छ। ५ खेल जितेको मछिन्द्रले २ खेल बराबरी र १ खेल हारेको छ। गएको वर्ष रेलिगेसनबिनाको लिगमा पुछारबाट दोस्रोमा रहेकाले एन्फाको नियमअनुुसार जारी लिगमा मछिन्द्रको एक अंक घटाइएको हो।

मछिन्द्रभन्दा अघि शीर्ष स्थानमा रहेको आर्मी क्लबको पनि १६ अंक नै छ। तर आर्मीले ७ मात्र खेलेको छ। उता मनाङ मर्स्याङ्दी क्लबको पनि ७ खेलमा १३ अंक पुगिसकेको छ। यसले पनि लिग उपाधि जित्न आउँदो खेलमा गल्ती गर्ने छुट मछिन्द्रलाई छैन।

के भन्छन् प्रशिक्षक?

गोलकिपरको गल्तीले हार्न पुग्यौँ - अनन्त थापा (पुलिस क्लब)

आजको खेल जितेको भए हामी उपाधिको दौडमा भइराख्थ्यौँ। मछिन्द्र राम्रो टिम भएकाले हामीले त्यहीअनुसार योजना बनाएर बढीरहेका थियौँ। तर अब कर्नर नजिकको त्यो ठाउँबाट गोल हुनु त दुर्भाग्य नै हो। त्यो सिधा सिधा गोलकिपरको गल्ती हो। खास गरी भन्ने हो भने फुटबलमा यस्ता कुराहरु हुनु हुँदैन।

हामीले उनीहरुलाई फ्रस्टेट गरेर काउन्टरमा गोल गर्ने भन्ने योजनामा बढीरहेका थियौँ, त्यस्तो हुन सकेन। त्यो फ्रि किक साधरण फ्रि किक नै हो। त्यसमा केही अचम्म मान्नु पर्दैन त्यो गोलकिपरको गल्तीले मात्रै गोल भएको हो। त्यो कुरा स्वीकार गर्नै पर्छ। उसले बचाउनै पर्ने गोल हो। यति सजिलै गोल हुन थाल्यो भने त कसैसँग पनि खेल जित्न सकिँदैन। त्यस्तो गल्तीहरुले विजेता हुन सकिँदैन।

सोचेअनुसार खेल भएन - प्रवेश कटुवाल (मछिन्द्र क्लब)

आज हामीले तीन अंक त जोड्यौँ तर सोचेअनुसार खेल भएन। हाम्रो हेभिवेट टिम भएर पनि केही मौकाहरु गुमाउन पुगेका थियौँ। त्यो सुजलले हानेको बल पनि रिबाउन्डमा आएपछि हान्दा अफसाइड थियो जस्तो लाग्दैन। पछाडिबाट नै कुदेर गएको जस्तो लाग्छ।

अब मैले के भन्ने, दुई अफसाइड गोलले पनि सोचेजस्तो नतिजा हुन सकेन। बाँकी खेलहरु पनि कठिन नै छ। धेरै टिमहरु नै विजेताको हकदार छन्। पुलिसविरुद्धको तीन अंक त्यसैले पनि महत्वपूर्ण भने हो। सिनियर खेलाडीहरुले सामान्य गल्तीहरु गर्नु भने राम्रो देखिएको थिएन। हिमालयन शेर्पासँगको हारपछि केही मोमेन्टम बिग्रिएको हो कि जस्तो लाग्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।