काठमाडौं- सोमबार भएको सहिद स्मारक ‘ए’ डिभिजन लिगमा च्यासल युथ क्लबका छिरिङ गुरुङले पेनाल्टी क्षेत्रमा त्रिभूवन आर्मी क्लबका सुमन अर्याललाई लडाएपछि पेनाल्टी पायो आर्मीले। धैरेको अनुमान थियो, अब पेनाल्टी आर्मीका कप्तान भरत खवासले हान्नेछन्। तर सन्तोष तामाङ पो अघि सरे।
केहीबेर बल भरतसँगै थियो। अन्तिममा उनले बल सन्तोषलाई दिए। सन्तोषले दाहिनेतर्फ चेपेर हानेको बल च्यासलको किपर एलन न्यौपानेको हातमा लागेर पोस्टभित्र पुग्यो। त्यो आर्मीको तेस्रो गोल थियो।
.jpg)
च्यासलविरुद्ध खेलको ५८औँ मिनेटमा भरतले पहिलो गोल गरेर आफ्नो टिमलाई अग्रता दिलाइसकेका थिए।
‘ए’ डिभिजन लिगमा त्यो गोल भरतको ४७औँ थियो। यदि सन्तोषको साटो उनले पेनाल्टी हानेर गोल गरेको भए उनी ५०औं गोलको अझ नजिक पुग्थे।
विश्वकप फुटबलको छनोटमा कुवेतसँगको खेल खेल्न भुटान जानुअघि ‘डिस्को काण्ड’मा परेर ४५ दिनको प्रतिबन्ध भोगेका सन्तोषको मनोबल बढाउन भरतको पेनाल्टी हान्ने मौका दिएका थिए। उनलाई लागेछ, सन्तोषले अहिलेसम्म गोल गरेकै छैनन्। मौका दिऔं। तर सन्तोषले यस अगाडि नै थ्री स्टारविरुद्धको खेलमा सम्झनायोग्य गोल गरेर आफ्नो खाता खोलिसकेका थिए। तर त्यो गोल टिमका क्याप्टेन खवासले नै बिर्सिएका रहेछन्।
लिगमा नेपाल आर्मी क्लबको चौथो खेल सन्तोषको पहिलो खेल थियो। थ्री स्टारविरुद्ध मैदान उत्रिएका उनले खेल सकिन ११ मिनेट बाँकी रहँदा उत्कृष्ट फ्री-किक गोल हानेका थिए।
‘नढाँटी भन्ने हो भने पहिलो पेनाल्टी पाउँदा आफै हानौँ भन्ने लागेको थियो। त्यति नै बेला सन्तोष भाइले म हान्छु नि त भनिहाल्यो। मलाई पनि लाग्यो- उसको गोल भएको छैन, एक गोल हान्यो भने उसको मनोबल उच्च हुन्छ,' खेलपछि भरतले भने, ‘तर उसले यसअघि नै थ्री स्टारविरुद्धको खेलमा गोल गरिसकेको थियो भन्ने मैले भुलेछु। त्यो सम्झिएको भए पेनाल्टी आफै हान्थेँ।’
सन्तोषले गोल हाने लगत्तै आर्मीका प्रशिक्षक नवीन न्यौपानेले भरतका स्थानमा जितेन्द्र कार्कीलाई मैदान छिराए। थप समयमा आर्मीले दोस्रो पेनाल्टीको मौका पायो। आर्मीले पाएको दोस्रो पेनाल्टीको मौकामा भरत मैदानमै थिएनन्। दोस्रो पेनाल्टी नवयुगले हाने र पोस्टमा लागेर फर्कियो।
३–० ले जितेको खेलमा म्यान अफ दि म्याच बनेका भरतलाई खेलपछि सोच आयो- ‘त्यो पहिलो पेनाल्टी मैले नै हानेको भए हुने रहेछ।’ ५० गोलको आँकडा पूरा गर्न उनलाई त्यसले सघाउने थियो। फुटबलको सुरुवाती दिनमा पेनाल्टी हान्न लाग्दा ‘गोलकिपर त पहाड जत्रो लाग्ने’ भन्दै अघि नसर्ने भरतले च्यासलविरुद्ध भने चाहेको पेनाल्टी पनि हानेनन्।
सोमबारको मौका चुकाए पनि जारी लिगमा बाँकी रहेको ६ खेलभित्र आफूले ५० गोलको आँकडा पार गर्नेमा विश्वस्त देखिन्छन् भरत। ‘यो पटक त्यही सोचमा नै बढिरहेको छु, ५० गोल पूरा गर्नेछु भन्ने नै लागेको छ,’ उनले भने।
.jpg)
च्यासलको स्टार टिम, कमजोर खेल
जारी लिगमा च्यासल अनुभवी खेलाडी भएको टिम हो। टिमका सदस्यमध्ये अधिकांश अनुभवी खेलाडी छन्। तर जारी लिगमा अब उसले रेलिगेसनबाट बच्नकै लागि प्रतिस्पर्धा गर्नुपर्ने छ। ७ खेलमा १ खेल मात्रै जितेको च्यासलले ३ खेल हारेको छ, ३ खेल बराबरी गरेको छ। ६ अंक भएको च्यासल भन्दा तल एपिएफको ५ अंक र सरस्वती क्लबको १ अंक मात्र छ।
टिम हेर्दा सन्तुलित देखिए पनि च्यासलका खेलाडीले मैदानमा त्यसअनुरूप खेल देखाउन सकेका छैनन्। एलन न्यौपाने, सुनील बल, सन्तोष साहुखलजस्ता खेलाडीको कमजोर प्रदर्शनका कारण टिम रेलिगेसनबाट जोगिने संघर्षमा उत्रन बाध्य बनेको छ।
आर्मीविरुद्धको खेलमा मैदानमा च्यासल कुनै समय पनि सन्तुलित हुन सकेन। ६४औँ मिनेटमा सुनील घाइते भएपछि त च्यासलको खेलको लय पूरै बिग्रियो। मिडफिल्डमा नितिन थापाले केही राम्रा ‘मुभ’ बनाए पनि गोल लाइनमा पुग्दा अवसर बिग्रिसकेको हुन्थ्यो।
के भन्छन् प्रशिक्षक?
दोस्रो हाफमा खेल बिग्रियो : बालगोपाल साहुखल, च्यासल युथ क्लब
हाम्रो खेल असाध्यै निराशाजनक भयो। जतिजति खेल अघि बढ्दै गएको छ टिममा झन्झन् समस्या देखिँदै गएको छ। आर्मी धेरै राम्रो टिम थियो। सामूहिक रूपमा खेल्ने टिम पनि आर्मी नै देखिएको छ। हाम्रो टिममा भने समस्या नै छ। एक दुई जना खेलाडीमा मात्रै पूरा खेल निर्भर हुने भयो, अरु खेलाडी मैदानमा उभिने जस्तो मात्रै देखियो।
टिमका रूपमा अघि नबढ्ने र योजनाअनुसार नखेली आफ्नै तरिकाले खेल्ने समस्या देखिएको छ। चौथो खेलबाट देखिएको समस्या अझैसम्म त्यही छ। टिम ‘सेटअप’ नै थिएन। यसरी त आर्मी जस्तो टिमसँग गाह्रो भई नै हाल्छ। पहिलो हाफमा भन्दा दोस्रो हाफमा त निकै बिग्रियो। आफ्नो पक्षमा खेल नहुँदा खेलाडी आत्तिने गरेको देखियो। सुनीलको आँखा नजिक सानो चोट लागेको छ। अर्को खेलसम्म ठीक होला। अंक तालिका हेर्दा हामी रेलिगेसन नजिक नै देखिएका छौँ। अब टिमको खेलले पनि त्यही देखाइरहेको छ। जबसम्म हामीले खेल जित्दैनौँ योजना मात्रै बनाएर केही हुँदैन। अब हरेक खेल निकै महत्वपूर्ण छ।
पहिलो हाफमा खेल बिग्रिएको थियो : नवीन न्यौपाने, त्रिभुवन आर्मी क्लब
समग्रमा पहिलो हाफ बिग्रिएको थियो। आज मैदानमा धेरै चिसो महसुस भएकाले पनि खेलाडीहरुलाई केही बेर गाह्रो भयो। हाम्रो खेलमा जुन तीव्रता हुन्थ्यो त्यो पहिलो हाफमा भएन। दोस्रो हाफमा खेल धेरै सुधारियो।
भरतको राम्रो गोलबाट अग्रता लिएपछि हामीलाई सजिलो भयो। विपक्षीहरू अघि बढेर खेल्दा हामीले ‘काउन्टर’मा राम्रो गरिरहेका थियौँ। खेलको अवस्था नै त्यस्तै हुन्छ। एक गोल पहिले हान्दा खेल नै यताउता पुग्छ। च्यासलले राम्रो नै खेलेको हो। हामीले पहिले गोल गर्न सक्दा नै उनीहरूलाई दबाबमा राख्न सकेका हौँ। हामीले तीन अंक जोडेर शीर्ष स्थानमा बस्न सकेका छौँ। शीर्ष स्थानमा पुग्न पनि निकै गाह्रो हुन्छ र त्यो स्थानलाई जोगाइराख्न पनि गाह्रो नै हुन्छ।
अहिलेको अंक तालिका हेर्दा हामीले अरुको खेल हेरेर योजना बनाउन पाइरहेका छौँ। थ्री स्टार र मनाङको बराबरी र मछिन्द्रको हारले हामीलाई फाइदा भएकै छ। आर्मी क्लबको खेलकुद केन्द्रका केन्द्रपति शशिकिरण रायमाझी करसाबको जन्मदिन भएकाले आजको तीन अंक हामीले उहाँलाई उपहार दिएका छौँ। अब आउने खेल पनि महत्वपूर्ण छ। हामीले राम्ररी अगाडि बढ्दै जानुपर्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
