काठमाडौं- ‘तेरेको बहुत टाइम दिया। में नेपाल आना पडा, तु ने पैसा नहि दिया, अब तेरा पैसा नैचाहिए। पैसाका बदला तेरा बेटा मार्ना पडेगा,' नेपालमा रहेकी एक महिलालाई ह्वाटस् एपमार्फत् आएको धम्कीमा भनिएको थियो, 'सरी, तेरा बेटा स्कूल जाएगा, मगर घर नही आएका। समझले तु तो यैसा हि मरगई, साथमे तेरा बेटा भी गया।’
भारतीय नम्बर ००९१-८५८६०५७१३१ बाट ती महिलालाई बारम्बार म्यासेज आएको थियो।
ती महिलालाई ३० लाख रुपैयाँ दिनुपर्ने नभए छोरा र आमा दुवैको ज्यान लिने धम्की म्यासेजमार्फत् आउने गरेको थियो।
लामो समयदेखि ह्वाटस् एपमा र मोबाइल नम्बरमा म्यासेज आएपछि ती महिलाले सिआइबीमा उजुरी दिइन्।
राष्ट्रिय प्रजातन्त्र पार्टी (राप्रपाका) महामन्त्री प्रतिनिधिसभा सांसद राजेन्द्र लिङदेनलाई समेत सोही नम्बर र नेपालको अर्को नम्बरबाट यस्तै प्रकारको धम्की आउने गरेको थियो।
भ्वाइस म्यासेज र टेक्स्ट गर्दै धम्की दिने र ५० लाख रकम माग गर्ने र सो रकम नदिए मार्नेसम्मको धम्की आएपछि गत वर्षको चैतमा लिङदेनका तर्फबाट सिआइबीमा उजुरी परेको थियो।
यसरी धम्क्याउँदै म्यासेज पठाउने गरेको आरोपमा सिआइबीले झापाको कचनकवल गाउँपालिका–३ पथरियाका २९ वर्षीय तिलकदास पराजुलीलाई चैत २५ गते पक्राउ गरेको थियो।
उनी पक्राउ परेपछि उनकै सूचनाका आधारमा हुम्लाको सर्केगाड गाउँपालिका–१ का १९ वर्षीय प्रदीप रोकायासमेत पक्राउ परेका थिए।
रोकायले सिम निकालेर पराजुलीलाई दिएको आरोप लागेको थियो। सोही सिमकार्ड प्रयोग गर्दै पराजुलीले हत्यासम्मको धम्की दिने गरेका थिए।
उनले नेपालका २ वटा सिम र भारतको एउटा सिमकार्ड प्रयोग गर्दै सर्वसाधारणदेखि सांसद र प्रधानमन्त्रीसम्मको हत्या गर्ने भन्दै म्यासेज पठाएको पाइएको छ।
हाल जेल चलान भएका पराजुलीले आफू अन्डरवर्ल्ड डन दाउद इब्राइमको मान्छे भएको र हत्याका लागि ५० लाखको सुपारी लिएको भन्दै धम्की दिने गरेका थिए।
म्यासेजमा पराजुलीले प्रधानमन्त्री केपी ओलीसम्मको हत्या गर्ने र कृष्ण सिटौलालाई मन्त्री बनाउन समेत आफूले सक्ने र यो कामका लागि कति रकम दिने भन्दै म्यासेज समेत पठाएको पाइएको छ।
.jpg)
त्यस्तै मन्त्री बन्न चाहनेले आफूलाई ५० लाख दिए बनाइदिने भन्दै पराजुलीले म्यासेज पठाउने गरेका थिए।
यस्ता खालका म्यासेज पठाउँदै धम्की दिने पराजुलीविरुद्ध जिल्ला अदालत काठमाडौं साढे ८ वर्ष कैदको फैसला सुनाएको छ।
न्यायाधीश श्रीकृष्ण भट्टराईको इजलासले गत बिहीबार उनलाई सो फैसला सुनाएको हो। आपराधिक लाभमा ५ वर्ष कैद र ५० हजार जरिवाना, विद्युतीय कारोबार ऐनअन्तर्गत १ वर्ष ६ महिना कैद र उनको साथबाट नक्कली सवारी चालक अनुमतिसमेत पाइएकाले उक्त कसुरमा २ वर्ष कैद र ५० हजार जरिवाना सुनाइएको हो।
त्यस्तै उनीसँगै पक्राउ परेका रोकालाई १ महिना कैद र १ हजार रुपैयाँ जरिवानाको फैसला गरिएको छ।
यसरी धम्की दिने युवकले आफू वैदेशिक रोजगारीका लागि विदेश गएको, १९ लाख ५० हजार रुपैयाँ डुबेकाले उक्त रकम उठाउने धम्की दिने गरेको बयान दिएका थिए।
दुबईमा ४ महिना बसेर नेपाल आएपछि टर्की, मंगोलियालगायतका देशमा मान्छे पठाउने काम गरेको र विदेश जानेले दिएको रकम लिएर अर्कै व्यक्ति फरार भएपछि उक्त रकम उठाउन धम्की दिनुपरेको उनको भनाइ छ।
त्यसका लागि उनले भारतसम्म पुगेर फोन, म्यासेज, भ्वाइस म्यासेजसमेत पठाउने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
