काठमाडौं– हङकङबाट काठमाडौं आएका एक चिनियाँ नागरिक ६ सय ३५ ग्रामभन्दा बढी सुनसहित त्रिभुवन अन्तर्राष्ट्रिय विमानस्थलबाट पक्राउ परेका छन्।
पक्राउ पर्नेमा ४२ वर्षीय चिनियाँ नागरिक झाङ गोअक्वीङ रहेका छन्। उनलाई आइतबार राति विमानस्थल सुरक्षा प्रहरी कार्यालयले नियन्त्रणमा लिएको हो।
प्रहरीका अनुसार झाङ आइतबार राति साढे १० बजे क्याथे प्यासिफिक एयरलाइन्सको विमानबाट हङकङ हुँदै काठमाडौं आएका थिए। विमानस्थलमा जाँच गर्ने क्रममा उनले भित्री वस्त्रभित्र प्लास्टिकले बेरेर अर्धठोस अवस्थामा सुन लुकाएर ल्याएको फेला परेको थियो।
विमानस्थलका प्रहरी नायब उपरीक्षक (डीएसपी) ढुण्डिराज नेउपानेका अनुसार बरामद सुनको तौल ६३५.९६ ग्राम रहेको छ।
सुन लुकाएर ल्याएको अवस्थामा फेला परेपछि उनलाई पक्राउ गरी आवश्यक अनुसन्धान तथा कानुनी कारबाहीको प्रक्रिया अघि बढाइएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।