रसुवा– रसुवामा पहिलो पटक आर्थिक गणना गरिने भएको छ। जिल्लाको समग्र आर्थिक क्रियाकलाप पत्ता लगाउन आगामी बैसाख १ गतेदेखि तीन महिनासम्म आर्थिक गणना गरिने भएको हो।
सोमबार सदरमुकाम धुन्चेमा आयोजित कार्यक्रममा जिल्ला आर्थिक गणना कार्यालय रसुवाका गणना अधिकृत मोहन पुडासैनीले गणना गर्न जिल्लामा कार्यालय स्थापना गरी आवश्यक प्रक्रिया सुरु गरिएको बताए।
‘चार महिनाको लागि अस्थायी कार्यालय सञ्चालन गरिसकेका छौं’, पुडासैनीले भने, ‘सुरुमा हामी गणकहरु नियुक्ति गरी तालिम दिन्छौं। त्यसपछि सामग्रीसहित उनीहरुलाई गाउँगाउँमा परिचालन गर्छौं।’
२०७५ असार मसान्तसम्ममा गणना सक्नेगरी बैसाख १ देखि ८ जना गणकहरु परिचालन गर्ने तयारी गरिरहेको गणना अधिकृत पुडासैनीले बताए। उनका अनुसार, गणना कार्यमा फारमको प्रयोग गरी गाउँगाउँमा गणकहरुलाई परिचालन गरिनेछ।
बैसाखदेखि सुरु हुने गणनामा खानी तथा उत्खनन, औद्योगिक उत्पादन, घरजग्गा कारोबार, प्रशासनिक तथा सहयोगी क्रियाकलाप, वित्तीय तथा बिमा सम्बन्धी क्रियाकलाप, पेशागत, वैज्ञानिक तथा प्राविधिक क्रियाकलाप, निर्माण लगायतका विवरण संकलन गरिने जिल्ला आर्थिक गणना कार्यालय रसुवाले जनाएको छ।
कार्यक्रममा सहायक प्रमुख जिल्ला अधिकारी स्मिता पौडेलले गणनाले स्थानीय तहलाई नीति तथा कार्यक्रम तय गर्न सघाउ पुग्ने बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
