काठमडौं– काठमाडौंबाट बनेपासम्म सुविधासम्पन्न बस सेवा सुरु गरेको मयुर यातायातको इजाजत खारेजका लागि १३ वटा यातायात समितिले आन्दोलनको घोषणा गरिरहँदा धुलिखेल नगरपालिकाले भने मयुरलाई धुलिखेलसम्म चलाउन आग्रह गरेको छ। धुलिखेलका सर्वसाधरणको आग्रहमा धुलिखेल नगरपालिकाका मेयर अशोक ब्याञ्जुले धुलिखेलसम्मको रुट इजाजत लिएर सेवा सञ्चालन गर्न आग्रह गरेका हुन्।
मयुरले चैत १ बाट काठमाडौंदेखि बनेपासम्म २४ वटा सुविधासम्पन्न बस चलाउँदै आएको छ। पुराना बस व्यवसायीहरु त्यसविरुद्ध आन्दोलनमा उत्रिएका छन्। मयुरले निःशुल्क वाईफाईसहितको सुविधा सुरु गरेपछि पुराना समितिहरुको व्यापार खस्किएको छ।
सो रुटमा आफ्नो एकाधिकार कायम राख्न उनीहरुले आन्दोलनको घोषणा गरेका छन्। त्यसरी आफूले मात्र सवारी चलाउन पाउने माग राख्नु गलत भएको धुलिखेल नगरपालिकाका मेयर अशोक ब्याञ्जु बताउँछन्। ‘प्रतिस्पर्धात्मक ढङ्गले व्यवसाय गर्नुपर्छ,’ उनी भन्छन्, ‘आफ्नो मात्र एकाधिकार हुनुपर्छ भन्नु गलत हो, सेवा अवरोध गर्नु अराजकता हो, उनीहरुलाई कारबाही गर्नुपर्छ।’
कोटेश्वर पूर्व यातायात सञ्चालन गर्दै आएका १३ वटा यातायात समितिले आइतबारदेखि आन्दोलन सुरु गर्दै छन्। मयुर यातायातले आफूहरुको लगानी जोखिममा परेको भन्दै इजाजत खारेज गर्नुपर्ने उनीहरुको माग छ।
बनेपाका मेयर लक्ष्मी बादे श्रेष्ठ भने मयुर यातायातको विवादबारे आफूलाई औपचारिक रुपमा जानकारी प्राप्त नभएको बताउँछन्। तर, मयुर र साझाले ‘मखमली’ सडकमा मात्र यातायात सेवा दिनु गलत भएको उनको भनाइ छ। ‘उनीहरुले मखमली सडकमा मात्र रोजेर बस चलाउनु उचित होइन,’ उनले भने।
आफ्नो नगपालिकामा बस सेवा सञ्चालन हुँदा आफूलाई त्यसको जानकारीसमेत नदिइएको उनको भनाई छ।
अरनिको राजमार्गमा लामो समयदेखि अरनिको यातयात लगायतको सिन्डिकेट छ। पहिलोपटक मयूर यातायातले सिन्डिकेट तोडेर सुविधासम्पन्न बस सेवा सुरु गरेपछि अन्य यातायात व्यवसायीहरु आन्दोलनमा उत्रिएका हुन्। यातयात व्यवसायी महासंघका अध्यक्ष योगेन्द्र श्रेष्ठ आफैं पनि सिन्डिकेटको पक्षमा उभिएका छन्।
तर, यातायात व्यवस्था विभाग र गृह मन्त्रालयले सिन्डिकेटविरुद्ध कडा रुपमा प्रस्तुत हुने जनाएका छन्। प्रधानमन्त्री कार्यालयले यातायात व्यवस्था विभाग र जिल्ला प्रशासन कार्यालयलाई सिन्डिकेटविरुद्ध कारबाही गर्न गत साता नै पत्राचार गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
