धनगढी– प्रदेश ७ का मुख्यमन्त्री त्रिलोचन भट्टले भारतीय राजदूत मञ्जीव सिंह पुरीसँग शिष्टाचार भेट गरेका छन्। बिहीबार दिउँसो आफ्नो कार्यकक्षमा भएको भेटमा मुख्यमन्त्री भट्टले सीमा नाकालाई व्यवस्थित र सहज बनाउन आग्रह गरेका थिए।
'राजदूतले नाकाको विषयमा आफूले भारतको केन्द्रीय सरकारसँग कुरा गर्ने बताउँनुभयो,' भट्टले नेपाल लाइभसँग भने।
मुख्यमन्त्रीले कृषि र पर्यटनको विषयमा पनि राजदूत पूरीसँग छलफल गरेका थिए। उनले भारतले विभिन्न क्षेत्रमा गरिरहेको सहयोगलाई बढाउन समेत आग्रह गरेका थिए।
'कुनै योजनावद्ध र विषयगत भेट होइन,' भट्टले भने, 'उहाँ व्यक्तिगत कामका लागि महेन्द्रनगर आउनुभएको रहेछ। त्यसैबेलामा बधाई दिन भनेर यता पस्नुभएको हो। परराष्ट्र मन्त्रालयबाट पनि जानकारी आयो। त्यसैले भेटघाट भयो।'
राजदूत पुरीले भने भारतसँग सिमाना जोडिएको प्रदेश भएकाले पारस्परिक सहयोगबाट अघि बढ्दा दुवैको हितमा हुने बताएका थिए।
भेटघाट करिब २० मिनेट चलेको भट्टले जानकारी दिए।
रेलवे विस्तारमा भारतको तयारी
नेपाल-भारत मैत्री संघ कैलालीले धनगढीमा आयोजना गरेको स्वागत कार्यक्रममा बोल्दै राजदुत पुरीले प्रदेश ७ को आर्थिक विकासका लागि दुई देशका सीमावर्ती प्रदेशहरूबीच व्यापारिक सम्बन्ध बढाउनुपर्नेमा पनि जोड दिएका थिए।
‘नेपालको ७ नम्बर प्रदेशसँग भारतका उत्तराखण्ड र उत्तर प्रदेश राज्यको सिमा जोडिएको छ,' राजदूत पुरीले भने, ‘भारतका यी दुई सिमावर्ती राज्यसँग नेपालको प्रदेश नम्बर ७ ले व्यापारिक सम्बन्ध बढाएमा तीव्र आर्थिक विकास सम्भव छ।’
राजदूत पुरीले नेपाल र भारतको सीमामा सडक सञ्जाल तथा रेल्वे विस्तार लगायतका काम आवश्यक रहेको बताए। ‘दुई नागरिकको आवतजावतका लागि त सडक छँदैछ। तर व्यापारका लागि रेल्वे सेवा आवश्यक हुन्छ’, उनले भने, ‘यसका लागि भारतीय सरकारले उत्तराखण्ड राज्यबाट चाँदनी–दोधारासम्म रेलवे विस्तार गर्ने तयारीमा रहेको छ।’
राजदूत पुरीले भारत सधैं नेपालको आर्थिक विकासका लागि तत्पर रहेको चर्चा गरे। उनले थपे, ‘दुई देशबीचको व्यापारिक सम्बन्ध अझै फराकिलो बनाउन नेपाल सरकारबाट कुनै योजना तथा कार्यक्रम आएमा भारतले सहयोग गर्नेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
