इस्लामावाद– सन् २०१४ मा नोबेल शान्ति पुरस्कार प्राप्त गर्न सफल पाकिस्तानी नागरिक मलाला युशुफजाई बिहीबार पाकिस्तान फर्किएकी छन्।
हाल २० वर्ष पुगेकी युशुफजाइले १४ वर्षको उमेरमा उक्त पुरस्कार हात पार्न सफल भएकी थिइन्। उनी नोबेल पुरस्कार हात पार्ने पहिलो पाकिस्तानी र सबैभन्दा कम उमेरको व्यक्ति समेत हुन्। हाल उनले एक बाल अधिकारकर्मीका रुपमा काम गरिरहेकी छिन्।
उनलाई १४ वर्षको उमेरमा पाकिस्तानी तालिबान लडाकूहरूले गोली प्रहार गरी हत्याको प्रयास गरेका थिए। त्यसपछि गम्भीर घाइते उनको बेलायतमा उपचार भएको थियो।
मुस्लिम देश पाकिस्तानमा कट्टरपन्थी पाकिस्तानी लडाकू समूह(तालिवान)ले बालिका शिक्षालाई अनुमति नदिने गरेकोमा उनले भने बालिका शिक्षाको वकालत गर्दै आएकी थिइन्। उनले ११ वर्षको उमेरमा बिबिसी उर्दु सेवाका लागि अन्जान रुपमा ब्लग लेख्ने गर्थिन्। उनले ब्लगमा आफुनो जिवन र महिला शिक्षालाई सुरुवातदेखि नै जोड्दै आइरहेकी थिइन्।
यसरी पाकिस्तानमा बालिका शिक्षाको पक्षमा अभियान चलाएका कारण नै उनलाई तालिवान लडाकुहरुले सन् २०१२ मा गोली हानेका थिए। आफ्नो स्कुल जाँदै गरेको समयमा उनलाई स्कुल बसभित्रै गोली प्रहार भएको थियो। टाउकोमा गोली लागेर गम्भीर घाइते भएकी उनको बेलायतको बर्मिङ्घमको एक अत्याधुनिक अस्पतालमा उपचार भएको थियो। मलालामाथि गोली प्रहार भएको घटनाको विश्वभरबाट निन्दा गरिएको थियो।
घटनापछि उनको परिवार बेलायत नै बस्दै आएको छ। उनले अक्सफोर्ड विश्वविद्यालयमा अध्ययन गर्दै बालिका शिक्षासम्बन्धी अभियानलाई पनि जारी राख्दै आएकी छिन्। उनले आफ्नो बुवा जियाउद्दिनको सहयोगमा ‘मलाला फन्ड’ नामक च्यारिटी संस्थाको स्थापना गरी बालबालिकाको शिक्षामा काम गर्दै आएकी छिन्।
त्यस घटनापछि उनी पहिलो पटक पाकिस्तान फर्किएकी हुन्। उनी बुधबार राति इस्लामावादको बेनजिर भुट्टो अन्तर्राष्ट्रिय विमानस्थलमा उत्रीएकी हुन्।
सुरक्षा संवेदनशीलताका कारण उनको पाकिस्तान भ्रमणसम्बन्धी कार्यक्रमहरु भने गोप्य रखिएको छ।
उनलाई तालिवानहरुले अहिले पनि धम्की दिइरहेकोले भ्रमणका समयमा हुनसक्ने घटनालाई हृदयंगम गरी सुरक्षा सतर्कता अपनाइएको पाकिस्तानी प्रहरीले जनाइएको छ।
मलालाले पाकिस्तानी प्रधानमन्त्री शाहिद खकान अब्बासीसँग पनि भेटवार्ता गर्ने कार्यक्रम रहेको बताइएको छ। तर भेटको समय भने खुलाइएको छैन।
उनको पाकिस्तान आगमनसँगै सुरक्षा व्यवस्था निकै कडा बनाइएको छ। इस्लामावादस्थित बेनजिर भुट्टो अन्तर्राष्ट्रिय विमानस्थलमा उनी आफ्ना आमाबुबासँगै उत्रीएको दृश्य पाकिस्तानी टेलिभिजनहरुले प्रशारण गरेका थिए।
मलालाले विभिन्न अन्तर्वार्ताका क्रममा आफुलाई पाकिस्तानस्थित आफुनो घर फर्किन मन लागेको बताउँदै आएकी थिइन्। तर यसपटक उनी स्वात घाटीमा रहेको आफुनो घर जाने नजानेबारे केही बताइएको छैन। उनले स्वात घाटीलाई संसारको स्वर्गको संज्ञा दिने गरेकी थिइन्।
मलालाले आफ्नो अध्ययन सकेपछि पाकिस्तानको प्रधानमन्त्री बन्ने र यहाँका महिला र बालबालिकाको अधिकारमा काम गर्ने उद्देश्य रहेको बताउँदै आएकी छिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773992198-1773992913.jpeg)
-1764146706.png)
-1773837959.png)
