मस्को– रसियाको दक्षिणपश्चिमी प्रान्त साइबेरियाको केमेरोभो सहरमा एक ‘सपिङ्ग मल’(किनमेल केन्द्र) मा भएको आगलागीमा परी ज्यान गुमाउनेको संख्या ६४ पुगेको छ।
उक्त ‘सपिङ्ग मल’को चौथो तलाबाट आगो लाग्न सुरु भएको रसियाली अनुसन्धान समितिले जानकारी दिएको छ। स्थानीय समयानुसार आइतबार अपराह्नबाट नै सुरु भएको सो आगलागी सोमबार बिहान मात्र नियन्त्रणमा आएको थियो।
आगलागीमा परेर मारिएकामा १३ जना बालबालिकासहित २५ व्यक्तिको मात्र परिचय खुलेको रुसका स्वास्थ्यमन्त्री भेरोनिका स्कभोर्तसोभाले बताए।
परिचय खुलेका ती बालबालिका भने ४ देखि १३ बर्षसम्मका छन्। मलमा रहेको चलचित्र प्रदर्शनी हलमा चलचित्र हेर्न आएका बालबालिका आगलागीमा परेका प्रत्यक्षदर्शी र स्थानीय सञ्चारमाध्यमहरुले जनाएका छन्।
रसियाली संकटकालीन व्यवस्थापन मन्त्री भ्लादिमिर पुचकोभले आगलागीमा परी ज्यान गुमाउनेको संख्या ६४ पुगेको तर सबैको परिचय भने नखुलेको बताएका छन्।
यद्यपी यस आगलागीमा परी बेपत्ता भएका व्यक्तिको यकिन संख्या अझै पनि पुष्टि भएको छ्रैन। यसअघि आगलागीमा परि ६४ जना अझै बेपत्ता भएका र जसमध्ये ४१ जना बालबालिका रहेका बताइएको थियो।
आगलागीको बारेमा अनुसन्धान गर्न मल सञ्चालन गर्ने कम्पनीका प्रमुख, घर मालिकलगायत पाँच व्यक्तिलाई प्रहरीले हिरासतमा लिएको छ।
आपराधिक प्रकृतिको हेलचक्र्याईँले आगलागी– राष्ट्रपति पुटिन
रुसी राष्ट्रपति भ्लादिमिर पुटिनले आपराधिक प्रकृतिको हेलचक्र्याईँले यस्ता आगलागीका घटना हुने गरेको बताएका छन्। रुसको केमेरोभो सहरमा आइतबार राति भएको आगलागीको घटनाको स्थलगत निरीक्षणपछि उनले सो प्रतिक्रिया दिएका हुन्।
उनी मङ्गलबार बिहान सो घटनास्थलको निरीक्षणका लागि पुगेका थिए। सो क्रममा आफ्नो संक्षिप्त प्रतिक्रिया दिँदै उनले भने,‘यसमा हेलचक्र्याइँ त छ नै, त्यो पनि आपराधिक प्रकृतिको छ। त्यसकारणले यो दुर्घटना भएको हो।’
यस्ता प्रकृतिका दुर्घटनाहरु अब हुन नदिन सतर्क रुपमा काम गर्न पनि उनले निर्देशन दिए।
उनले दुर्घटनामा ज्यान गुमाउने व्यक्तिका परिवारप्रति गहिरो समवेदना प्रकट गरे।
आगलागीमा परि घाइते भएका र ज्यान गुमाएका व्यक्तिका परिवारजनलाई समेत आवश्यक सहयोग गर्ने प्रतिवद्धता जनाएका छन्। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
