काठमाडाैं- देशभर निर्माण भएका साना तथा ठूला गरी विमानस्थलको संख्या ५५ पुगेको छ। तर, कालोपत्र विमानस्थलको संख्या भने ३४ वटा मात्रै रहेको नेपाल नागरिक उड्डयन प्राधिकरणले जनाएको छ।
प्राधिकरणले २१औं वार्षिक उत्सव समारोहमा विमानस्थलको स्तरोन्नती तीव्रगतिमा भएको जनाएको हाे। प्राधिकरणका अनुसार ओखलढुंगाको खिजि चन्डेश्वरी विमानस्थलको निर्माण कार्य सम्पन्नभएसँगै विमानस्थलको संख्या ५५ पुगेको हाे। उक्त विमानस्थलकाे २३ डिसेम्वर २०१९ मा परीक्षण उडान सम्पन्न भएको थियो।
हवाई क्षेत्रको सुधारका लागि नेपाल नागरिक उड्डयन प्राधिकरणलाई सेवा प्रदायक र नियमक गरी विभाजन गर्ने कानुनको मस्यौदा पनि तयार गरी मन्त्रिपरिषद्मा पठाएको प्राधिकरणका महानिर्देशक राजन पोखरेलले जानकारी दिए। वार्षिक उत्सव समारोहमा संस्कृति, पर्यटन तथा नागरिक उड्डयनमन्त्री योगेशकुमार भट्टराई, मन्त्रालयका सचिव केदारबहादुर अधिकारीलगायतको उपस्थिति रहेको थियो।
सोही अवसरमा मन्त्री भट्टराईले नेपाल नागरिक उड्डयन प्राधिकरणलाई फरक-फरक दुई निकाय बनाउने गरी तयारी भएको ऐनको मस्यौदा मन्त्रिपरिषद्मा पेस भएको र अबको केही दिनमै संसदमा विधेयकको रुपमा प्रस्तुत हुने जानकारी गराए प्राधिकरण विभाजन गर्न नहुने भन्दै कर्मचारीहरुले गर्दै आएको विरोधप्रति मन्त्री भट्टराईले अब कसैले पनि प्राधिकरणलाई सेवा प्रदायक र नियमक निकाय फरक-फरक गर्ने काममा रोक्न नहुने बताए। कसैले चाहेर पनि त्यो कामबाट सरकार पछि नहट्ने मन्त्री भट्टराईको भनाइ छ।
सन् २०१९ को नोभेम्बरसम्मकोे अवस्था हेर्दा त्रिभुवन अन्तर्राष्ट्रिय विमानस्थलमा अन्तर्राष्ट्रियतर्फ कूल ३७ लाख ६७ हजार ९१३ को यात्रुको आवागमन भएको छ। यो बर्ष करिब ४१ लाखको हाराहारीमा हवाई यात्रुको आवागमन हुने अनुमान छ।आन्तरिकतर्फ अक्टोवर २०१९ सम्म कूल २७ लाख ३७ हजार १७२ यात्रु आवागमन हुँदा यो बर्ष करिब ३३ लाख हवाई यात्रु आवागमन हुने अनुमान रहेको छ।
अन्तर्राष्ट्रिय उडानमा हवाई यात्रु घट्नुको पछाडि नेपालमा उडानरत केही ठूला वायुसेवा कम्पनीको उडान बन्द हुनु, मलेसियाको श्रम रोजगारमा समस्या देखिनु र त्रिभुवन अन्तर्राष्ट्रिय विमानस्थलमा धावनमार्ग तथा ट्याक्सीमार्ग मर्मत सम्भारका कारण संचालन समय प्रभावित हुनु प्रमुख कारण रहेको प्राधिकरण महानिर्देश्क पोखरेलेको भनाइ छ। त्रिभुवन विमानस्थलमा कूल हवाई यात्रु आवागमन वर्ष २०१८ भन्दा यस वर्ष करिब २ लाखले वृद्धि हुने अनुमान रहेको उनको भनाइ छ।
गौतमबुद्ध अन्तर्राष्ट्रिय विमानस्थललाई व्यावासायिक तथा दक्षता पूर्वक संचालन गर्न विश्वमा ठूला विमानस्थल संचालनको लागि अपनाइएको अवधारणा अनुरुप सरकार–सरकारबीचको सम्झौताबाट ख्याती प्राप्त विदेशी विमानस्थल संचालक संस्था म्युनिख अन्तर्राष्ट्रिय विमानस्थल कम्पनीसँग संचालन र व्यवस्थापनको लागि प्रकृया अघि बढाइएको समेत पोखरेलले जानकारी दिए। पोखरा अन्तर्राष्ट्रिय विमानस्थलको निर्माण काम अत्यन्त सन्ताेषजनक रुपमा अगाडि बढेको र अहिले आयोजनाको भौतिक प्रगति करिब ५४ प्रतिशत रहेकोले निर्धारित समयभन्दा अगावै काम सम्पन्न हुने स्थितीमा रहेको प्राधिकरणको भनाइ छ।
सार्वजनिक निजी सहभागिताको मोडेलमा निजगढ अन्तर्राष्ट्रिय विमानस्थल निर्माण गर्ने निर्णय गरे अनुरुप नेपाल लगानी बोर्डमार्फत् स्वीट्जरल्याण्डको ज्युरिच एयरपोर्ट इन्टरनेशनल छनौट भई विस्तृत प्रस्ताव माग्ने तयारीको चरणमा रहेकोे छ। विमानस्थलको वातावरणीय प्रभाव मूल्यांकन वन तथा वातावरण मन्त्रालयबाट स्वीकृत भई अहिले विमानस्थल क्षेत्रको दक्षिण तर्फबाट १९०० हेक्टरमा पहिलो चरणको विमानस्थल निर्माण कार्यका लागि आवश्यक पर्ने रुख विरुवा कटान गर्न वन तथा वातावरण मन्त्रालयमा अनुरोध भएको पोखरेले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
