काठमाडौं- गत साउनदेखि अवैधानिक रुपमा पदमा बसेको भनी न्यायपरिषद्को पत्रपछि राजीनामा दिएका पूर्वप्रधानन्यायाधीश गोपाल पराजुलीविरुद्धको अवहेलना मुद्दा दर्ता हुने वा नहुने विवादमा सर्वाेच्चले कैफियत प्रतिवेदन झिकाउने आदेश गरेको छ। न्यायाधीश हरिकृष्ण कार्कीको एकल इजलाशले निवेदन दर्ता नहुनुको कारण उल्लेख भएको प्रतिवेदन पेश गर्न आदेश गरेको हो।
गत आइतवारदेखि पेशीमा चढेको निवेदन बिहीबार मात्र सुनुवाइ भएको छ।
मनोज अधिकारीले प्रधानन्यायाधीशको पदमै रहँदा मुद्दा प्रभावित गर्ने प्रयास गरेको भन्दै अवहेलना निवेदन पेश गरेका थिए। तर सर्वोच्च प्रशासनले उक्त निवेदन दर्ता गर्ने प्रमाण अपुग भएको भन्दै दरपीठ गरिदिएको थियो। दरपीठविरुद्ध अधिकारीले फागुन २५ गते इजलाशमा निवेदन दिएका थिए। उक्त मुद्दा दर्ता हुने वा नहुने विषयमा सर्वोच्चले प्रशासनको दरपीठ प्रतिवेदन हेरेपछि मात्र निर्णय गर्नेछ।
उक्त अवहेलना निवेदन दर्ता गर्न आदेश भएमा न्यायिक इतिहासमा पहिलो पटक पदमा रहँदा सम्पादन गरेको कामका कारण प्रधानन्यायाधीशविरुद्ध अदालतको अवहेलना मुद्दा चल्नेछ। डाक्टर गोविन्द केसीको मुद्दा मिलाउन उनका वकिललाई धम्की दिनेसम्म काम गरेर पराजुलीले अदालतको अवहेलना गरेको जिकीर अधिकारीको निवेदनमा गरिएको छ।
पराजुलीको कुन कार्य अवहेलना भयो त्यो कार्यको पुष्टि हुने आधिकारीक प्रमाण नल्याएको भन्दै सर्वोच्चका सहरजिष्ट्रार नारायण पन्थीले उक्त निवेदन दरपीठ गरेका थिए। पत्रिकामा आएका समाचारका आधारमा अवहेलना मुद्दा नलाग्ने दरपीठमा भनिएको थियो। पराजुली पदमै हुँदा केसीका कानुन व्यवसायी सुरेन्द्र भण्डारीलाई धम्की दिएको निवेदनमा उल्लेख थियो। त्यस्तै कीर्ते नागरिकता र फरकफरक शैक्षिक प्रमाणपत्रको आधारमा न्यायाधीश हुँदै पराजुलीले अदालतको अवहेलना गरेको जिकीर निवेदनमा गरिएको छ।
डाक्टर केसीले प्रधानन्यायाधीशलाई भ्रष्ट र माफिया भन्दै राजीनामा मागेपछि उनीविरुद्ध सर्वोच्च अदालतले अवहेलना मुद्दा दायर गरेको थियो। त्यही मुद्दाको सुनुवाइमा 'डाक्टर केसीले माफी मागेमा वा आवेशमा आएर बोलेको हुँ भनेमा मुद्दा फिर्ता गर्ने'सम्मको प्रलोभन प्रधानन्यायाधीशले दिएको अभिव्यक्ति केसीका मुख्य वकिल सुरेन्द्र भण्डारीले सार्वजनिक गरेका थिए। आफूले नमानेपछि पराजुलीले मार्नेसम्मको धम्की दिएको भन्दै उनले जिल्ला प्रशासन कार्यालयमा सुरक्षा माग्दै निवेदन समेत दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
