पेरिस (एजेन्सी)– फ्रान्सका पूर्वराष्ट्रपति निकोलस सार्कोजी पक्राउ परेका छन्। राजनीतिक अभियानका लागि गरेको अर्थ संकलनको स्रोत नखुलेको भन्दै मंगलबार बिहान उनलाई प्रहरीले नियन्त्रणमा लिएको हो।
प्रहरीले उनीमाथि दिवंगत भइसकेका लिबियाली पूर्वशासक कर्णेल मुअम्मर गद्दाफीबाट अवैधानिक रुपमा ४२ मिलियन पाउन्ड लिएको आरोप लगाएको छ। सन् २००७ मा भएको राष्ट्रपति निर्वाचनका क्रममा सार्कोजीले सो रकम लिएको बताइएको छ।
फ्रान्समा निर्वाचनका बेला एक उम्मेदवारले बढीमा ६ हजार ३ सय पाउन्ड मात्रै नगद लिन पाउने व्यवस्था छ। सार्कोजीले लिएको रकमको कारोबार पनामा तथा स्विस बैंकबाट गरिएको खुलेको छ। कारोबारबारे आफ्ना विरोधीहरुको प्रश्नको जवाफ दिन र भ्रष्टाचार सम्बन्धी मुद्दाको सामना गर्न आगामी ४८ घन्टा उनीमाथि चर्को दबाव पर्ने देखिएको छ। उनलाई अनुसन्धानका लागि बिहीबारसम्म हिरासतमा राखिने भएको छ।
तत्कालीन समयमा गद्दाफी र सार्कोजीका बीचमा भएको अवैध आर्थिक लेनदेनको सम्झौतापत्र हालसालै पेरिसमा सार्वजनिक भएको हो।
सन् २००६ मा गद्दाफीका गुप्तचर प्रमुख मुसा कुसाद्वारा हस्ताक्षरित अरबी भाषाको सो पत्रमा राष्ट्रपति निर्वाचनका उम्मेदवार सार्कोजीको चुनावी अभियानमा सघाउन करिब ५० मिलियन युरो बराबरको रकम सहयोग गरिएको उल्लेख छ।
लिबियाको राष्ट्रिय संक्रमणकालीन परिषदका एक वरिष्ठ सदस्यले सो सम्झौतासम्बन्धी दस्तावेज फ्रान्सको अनुसन्धानसम्बन्धी समाचार संस्था ‘मिडियापार्ट’ लाई उपलब्ध गराएका थिए। सो क्रममा सार्कोजीका आर्थिक अपचलन सम्बन्धी अन्य सम्झौता पत्र समेत बाहिरिएको बताइएको छ।
सार्कोजी र उनका सहयोगीहरुले रकम लेनदेनको उद्देश्यले लिबियामा धेरै भ्रमण गरेको र सोही समयमा लिबिया सरकारले तयार पारेका छोटा दस्तावेजहरु मिडियापार्टले हात पारेको हो। सार्कोजीका एक साथीले भने सो लेनदेन सन् २००५ को अक्टोबर ६ मा नै भएको दाबी गरेका छन्।
राजनीतिक यात्राको सुरुवाती अवस्थामा सार्कोजी महत्वाकांक्षी नेताको रुपमा परिचित थिए। उनले बिस्तारै राष्ट्रपति निर्वाचनका लागि भन्दै विभिन्न अभियानमार्फत अर्थ संकलन गर्न सुरु गरेका थिए।
मिडियापार्टका अनुसार ५० मिलियन युरोमध्ये केही रकम सार्कोजीको पार्टी ‘युएमपी’की तत्कालीन प्रमुख नेता जिन फ्रान्कोइस कोपकी बहिनीको नाममा स्विस बैंकबाट निकालिएको छ। त्यसपछि सो रकमलाई अरब र फ्रान्सका दूतको रुपमा काम गर्दै आएका जियाद ताकिद्दिनेमार्फत बाँडिएको देखिएको छ।
सन् २००७ मा गद्दाफीले फ्रान्सको भ्रमण गरेका थिए। सो क्रममा उनलाई ‘दाइ नेता’को रुपमा फ्रान्समा उच्च सम्मान दिँदै एलसी प्यालेसमा राखिएको थियो।
सन् २०११ को ‘अरब स्प्रिंग’ अघिसम्म सार्कोजी र गद्दाफीको मित्रता सुमधुर रहेको बताइन्छ। तर, सोही वर्षको मार्चमा सुरु भएको लिबियामाथिको सैन्य हमलामा गद्दाफी नियन्त्रित सैनिक ट्यांकरमा पहिलो आक्रमण फ्रान्सले नै गरेको थियो।
फ्रान्समा उल्लेख्य सुधार नहुनु र लगातार आफ्नो शक्ति गुमाउँदै गएकाले सार्कोजीले सन् २०१२ को राष्ट्रपति निर्वाचनमा पराजय भोगेका थिए। पराजयपछि सार्कोजी आफ्नी तेस्रो श्रीमतीसँग पेरिसमा बस्दै आएका थिए। ५० वर्षीया श्रीमती पूर्व सुपरमोडल तथा पप गायिका कार्ला ब्रुनीसँग पेरिसमा रहँदा सार्कोजीले शक्तिमा आउने कोसिस गरे पनि सफल हुन सकेनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
