‘तपाईंलाई हिरो बन्नु छ कि अभिनेता?’ केही समयअघि मैले अभिनेता पुष्प खड्कालार्इ प्रश्न गरेको थिएँ।
पुष्पको सरल उत्तर थियो,‘मलाई हिरो र अभिनेताको कुनै तर्क थाहा छैन। अर्थ पनि त्यति जान्दिन। सानैदेखि मेरो लगाव हिरो बन्ने थियो। अभिनय राम्रो गर्ने प्रयास गर्छु तर बन्नु हिरो नै छ।’
उनी हिरो बने कि बनेनन्, त्यो उनै जानुन्। फिल्म ‘मंगलम्’ हेरेपछि महशुस भयो उनी अभिनेता भने बनिसकेछन्। अहिले कि अभिनय राम्रो भएका, कि अनुहार मात्रै चकलेटी रहेका हिरोहरु छन् नेपाली फिल्ममा। यी दुवैको गठजोड भएको एउटा उत्तम विकल्पका रुपमा उनले यसै फिल्ममा आफूलार्इ प्रस्तुत गरेका छन्।
चकलेटी अनुहारधारी पुष्प फक्रिन थिएटरको मलजलले काम गरेको हो। नेपाली कला क्षेत्रमा संघर्ष गरिरहँदा रंगकर्मी अनुप बरालको एक्टर्स स्टुडियोमा अभिनय सिकेको उनले फिल्ममा भरपुर उपयोग गरेका छन्।
‘म्युजिक भिडियोमा अवसर पाउनुअघि मैले लामै समय संघर्ष गरिसकेको थिएँ। डान्स कल्चरमा डान्स सिकेर त्यहीँ सिकाउने भइसकेको थिएँ।’,उनले आफ्ना पुराना दिन सम्झिदै भने,‘सानैदेखि कराँते खेलाडी थिएँ। अभिनय पनि सिकें। यसले गर्दा ‘चान्स पाएपछि देखाइदिन्छु’ भन्ने मनोबल थियो।’
तर, खोजेजस्तो चान्स पाउनै समय लाग्यो। फिल्ममा ‘देर’ गरेर दुरुस्त आएका उनी म्युजिक भिडियोका भने चर्चित अनुहार हुन्। ‘पिलायो साथीले’, ‘तिम्रो मौन इसारा’, ‘हेलो मञ्जरी’लगायत हिट गीतले उनको परिचय स्थापित भएको छ।
पुष्पले निर्देशक आलोक नेम्वाङलाई मोडलिङमा आफुलाई चिनाइदिने मान्छे रुपमा लिन्छन्। उनलार्इ संघर्ष सिकाउने पनि आलोक नै हुन्। उनी भन्छन्,‘आलोक सरजस्ता व्यावसायिक म्युजिक भिडियो निर्देशक नभइदिएको भए सायद म उहिल्यै काठमाडौँ छाडेर गइसकेको हुन्थेँ।’
आलोकलार्इ भेट्नुअघि त्यतिबेला चलेका सबै म्युजिक भिडियो निर्देशक भेटिसकेका थिए उनले। उनी सम्झिन्छन्, ‘कतिसँग त एक चान्सका लागि रोएर याचना गरेको थिएँ। आशा देखाए पनि कहिल्यै अवसर नआएपछि निराश थिएँ।’ त्यहीबेला उनले एकपल्ट ओलोक नेम्वाङलाई भेट्ने निधो गरे।
‘उहाँले ‘फोन नम्बर र तस्बिर छाडेर जानू, हेरौँला’ भन्नुभयो।’ प्रायःले यस्तै भन्ने गरेका थिए। ‘विश्वास लागेको थिएन’, उनी भन्छन्,‘तर, तीन दिनपछि गायक हेमन्त शर्माको फोन आयो। आलोक सरले निर्देशन गर्ने म्युजिक भिडियोमा सानो भूमिका छ भनेर।’
उनको काम देखेपछि निर्देशक नेम्वाङले भनिरहन्थे– म तिम्रो लेभल बनाइदिन्छु। त्यसैले नेम्वाङले सुरुमै केकी अधिकारी, प्रियंका कार्की, नीता ढुंगानादेखि झरना बज्राचार्यसँग म्युजिक भिडियोमा पुष्पलाई अभिनय गराए।
उनी कैलालीबाट काठमाडौं आउँदा मोडल वा हिरो बन्ने आफ्नो हैसियत छ भन्ने ठान्थेनन्। मनमा भने ‘कुनै दिन प्रयास गर्छु’ भन्ने लागिरहन्थ्यो उनलार्इ। त्यसैले कैलालीमा आईएस्सी सकेपछि आईटी पढ्न काठमाडौँ आए। कान्तिपुर टेक्निकल कलेजमा कम्प्युटर पढ्न सुरु गरे। यही समयमा उनले डान्स पनि सिक्न थाले।
यही क्रममा मोडलिङ र अभिनयको भोक बढ्न थालेपछि उनमा पनि हिरो बन्ने पुरानो सपना पुरा गर्ने मन भयो। त्यसैले उनी यही क्षेत्रमा मात्रै स्ट्रगल गर्न थाले।
आईटी पढेको मान्छे काम नगरेर यता भड्किएको कुरा उनका अभिभावकलाई स्वभाविक लागेन। जेठो सन्तान भएका कारणले पनि उनले जागिर गरेर घरव्यवहार सम्हाल्नुपर्ने स्थिति थियो। उनका बुबाले जागिर खोजिदिए पनि तर, जागिरमा उनको मनै बसेन। ‘मलाई त मोडल बन्नु थियो। हिरो बन्नु थियो। जिन्दगीमा फेरि मौका आउँछ कि आउँदैन, एकपल्ट ट्राइ गर्छु भनेर लागेँ। तर त्यही समयदेखि नै घरबाट हुने आर्थिक सहायता बन्द भयो’, उनले सम्झिए।
त्यसपछि उनको जीवनको वास्तविक संघर्ष सुरु भयो। ‘बुबा रिसाएर बोल्न छाड्नुभयो। दुई वर्ष बोलचाल भएन। म घर पनि गइनँ। के मुख लिएर जानु भन्ने भयो,’ उनले ती दिनका याद ताजा बनाए, ‘तीन वर्ष संघर्ष गर्दा पनि अवसरको छेउछाउ पुग्न नसकेपछि म घर फर्किने निधोमा पुगेको थिएँ। बुबालाई म फर्किदैछु, तपाईंले भनेकै काम गर्न भनेर फोन गर्न खोजेँ। तर, भन्ने आँट नआएर धेरै पटक फोन काटेको थिए।’
यही स्थितिमा उनको निर्देशक नेम्वाङसँग भेट भएको थियो। उनी म्युजिक भिडियोमा जम्न थाले र रमाउन थाले। उनलार्इ यही ठूलो कुरा पनि थियो।
बिस्तारै माथि उक्लिन थालेको करिअरमा एक्कासी ब्रेक मिल्यो। ब्रेक दिलाउन अगाडि आए निर्देशक तुलसी घिमिरे। घिमिरेको ‘दर्पण छायाँ– २’मा मुख्य अभिनेताका रुपमा अवसर पाउनु उनका लागि ठूलो सपना पूरा भए बराबर थियो। तर फिल्मको कमजोर व्यापारले उनलार्इ त्यो सपना नमिठोजस्तै विपना लाग्यो।
यो फिल्ममा मूख्य भूमीका निभाएपछि उनले छवि ओझा निर्मित फिल्म ‘मंगलम्’सँग जोडिएका हुन्। सो फिल्ममा निर्देशक नवल नेपालले पुष्पमा रहेको अन्तर्निहीत क्षमताको भरपुर उपयोग गरे। फिल्मले व्यवसायिक सफलता हासिल गरिररहेको छ भने दर्शकहरुबाट पुष्पको अभिनय क्षमताको तारिफ भइरहेको छ।
म्युजिक भिडियोमा हुँदासम्म नाम पुष्प थियो। ‘दर्पण छायाँमा–२’ मा नाम फेरेर उनी पुष्पल भए। तर ‘मंगलम्’सम्म आइपुग्दा फेरि उनी पुष्प भएका छन्। पुष्पलबाट पुष्पमा फर्किएका उनले मंगलम्बाट नेपाली फिल्म क्षेत्रमा फक्रिने संकेत गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763779811.png)
-1763718173.png)
-1763721444.png)
-1763559424.jpg)
-1763559424.jpg)
