काठमाडौं- राष्ट्रियसभामा मनोनीत भएका अर्थमन्त्री डा युवराज खतिवडासहित ३ सांसदहरुको मुद्दा सोमबार न्यायाधीशद्वय दीपककुमार कार्की र शारदाप्रसाद घिमिरेको इजलाशमा तोकिएको छ।आइतबार प्रतिनिधिसभा र राष्ट्रियसभाका अन्य सांसदले सपथ लिए पनि उनीहरु सर्वोच्च अदालतको अन्तरिम आदेशका कारण सपथ लिनवाट वञ्चित भए।
हिजो हेर्न नमिल्ने न्यायाधीशको इजलाशमा पेशी परेपछि उनीहरुको मुद्दा सुनुवाइ नभई सरेको थियो। उक्त मुद्दा कार्की र घिमिरेको इजलाशको ख नम्बरमा पालो रहेको छ। उक्त मुद्दा सुनुवाइ भई अन्तरिम आदेश जारी भएमा उनीहरुलाई सांसदको सपथ लिन बाटो खुला हुनेछ। यसअघि जारी भएको अन्तरिम आदेश निरन्तर भएमा उनीहरुले मुद्दाको फैसला नभएसम्म सपथ लिन पाउनेछैनन्।
सोमबार संसदको पहिलो बैठक ४ बजे बस्दैछ। त्यसअघि नै आदेश जारी भएर सपथ लिँदै संसद बैठकमा भाग लिने दाउँमा अर्थमन्त्री खतिवडा लगायतका सांसद छन्।
न्यायाधीशद्वय हरिकृष्ण कार्की र प्रकाश राउतको इजलासमा आइतबार पेशी तोकिएको थियो। तर, बहस सुरु नहुँदै कानुन व्यवसायीले दुवै न्यायाधीशहरुले मुद्दा हेर्न नमिल्ने भनी प्रश्न उठाएपछि पेशी सरेको थियो।
संघीय संसद सचिवालयका प्रवक्ता भरतराज गौतमले आइतबार अर्थमन्त्री खतिवडासहित ३ जनालाई सपथ ग्रहण गर्न दिनु भनी अदालतबाट आदेशको पत्र नआएका कारण उनीहरुलाई सपथ लिने निम्तो सचिवालयले नपठाएको र आदेश आएमा आज पनि सपथ खुवाउन सकिने बताए।
प्रधानमन्त्री देउवाले आफू सरकारबाट बाहिरिने समयमा गोपाल बस्नेत, कृष्णप्रसाद पौडेल र चाँदनी जोशीलाई राष्ट्रियसभामा सिफारिस गरेका थिए। सरकारले राष्ट्रियसभाका लागि ३ जना सिफारिस गर्न पाउने संविधानको व्यवस्था अनुसार देउवाले उनीहरुको नाम अनुमोदनका लागि राष्ट्रपति विद्यादेवी भण्डारीसमक्ष पठाएका थिए। तर, राष्ट्रपति भण्डारीले उनीहरुको नाम अनुमोदन नगरी तामेलीमा राखेकी थिइन्।
सरकार परिवर्तन भए लगत्तै ओली सरकारले उनीहरुको नाम फिर्ता लिएको थियो। लगत्तै उक्त स्थानमा डा युवराज खतिवडा, रामनारायण बिडारी र विमला पौड्याल राईलाई सिफारिस गरेको थियो। त्यही सिफारिसलाई राष्ट्रपति भण्डारीले अनुमोदन गरिदिएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
