काठमाडौं– मालपोत कार्यालय सिमरामा कार्यरत नायव सुब्बा मदनप्रसाद गुप्ता र उनका परिवारका अन्य ३ जनासहित ९ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
अख्तियारले करिब १५ करोड भ्रष्टाचार भएको भन्दै मंगलबार विशेष अदालतमा मुद्दा दायर गरेको छ।
मालपोत कार्यालय कलैया दरबन्दी भई सिमरामा कार्यरत रहेका गुप्ताले गैरकानूनी रुपमा सम्पत्ति आर्जन गरेको भन्दै अख्तियारमा उजुरी परेको थियो।
उनले कमाएको अकुत सम्पत्ति गुप्ताले आफ्नो श्रीमती रीतादेवी¸ छोराहरु विक्की गुप्ता र रकी गुप्ता, अन्य व्यक्तिहरु कविता कुमारी¸ निरजकुमार गुप्ता¸ राजेशकुमार गुप्ता¸ जुगुली प्रसाद र जगतनारायण यादवको नाममा राखेको तथा विभिन्न ठाउँमा लगानी गरेको पाइएको अख्तियारले दायर गरेको आरोपपत्रमा उल्लेख छ।
उनीहरुले १४ करोड ८१ लाख ८९ हजार २३ रुपैयाँ भ्रष्टाचार गरेको अख्तियारले ठहर गरेको छ।
गुप्ता २०४७ असार २७ गते मालपोत कार्यालय मुस्ताङ्गबाट खरिदारको पदमा सेवा प्रवेश गरी २०६४ सालमा नायव सुब्बाको पदमा वढुवा भई मालपोत कार्यालय पर्सा हुँदै मालपोत कार्यालय सिमरामा निमित्त कार्यालय प्रमुखका रुपमा कार्यरत थिए।
उनले सेवा प्रवेश देखि आव २०७५/०७६ सम्मको अवधिलाई जाँच अवधि लिएर अनुसन्धान गर्दा पारिश्रमिक बचत आय/घर जग्गा बिक्री र विभिन्न बैंक तथा वित्तीय संस्थाहरुबाट कर्जा र छोरा रकी गुप्ताको आय र घर बहाल आय समेत गरी ४ करोड ५४ लाख ७२ हजार २ सय ४६ वैध आय आर्जन भए गरेको पाइएको अख्तियारले जनाएको छ।
गुप्ताले परिवारका सदस्यहरुका नाममा घर खरिद तथा निर्माणमा ४ करोड ८ लाख ५१ हजार, जग्ग्गा खरिदमा ९० लाख १४ हजार १ सय, बैंक तथा वित्तीय संस्थाहरुबाट लिइएका कर्जा र कर्जा चुक्ता समेतमा ३ करोड २७ लाख ४५ हजार १२ रुपैयाँ, पुँजीगत लगायतका कर शीर्षकमा ९ लाख ७० हजार २ सय ६० रुपैयाँ लगानी तथा खर्च गरेको पाइएको थियो। त्यसैगरी सवारी साधन खरिदमा २७ लाख ६२ हजार ५ सय, पार्वती स्टेसनरी र गायत्री निशान अटो कर्प प्रालि र नेपाल रोडसाइड एसिस्टेन्स समेतका व्यवसायहरुमा ७१ लाख, सापटी दिएको ४३ लाख ५ रुपैयाँ दिइएको पाइएको अख्तियारले जनाएको छ।
पारिवारिक लालनपालनलगायतका अतिरिक्त खर्च र शैक्षिक खर्च र सुन चाँदी खरिद र विद्युतीय उपकरण र छोरा विक्की गुप्ताको विवाह लगायतमा ६१ लाख, यसैगरी परिवारका सदस्यहरु बाहेकका अन्य व्यक्तिहरु कविता कुमारी र राजेश कुमार गुप्ता र इन्दिरा देवी काफ्ले लगायतका नाममा दर्ता कायम रहने गरी खरिद गरी राखेका घर र जग्गाहरुमा ५ करोड २७ लाख ८९ हजार ५ सय लगानी भएको अनुसन्धानबाट खुलेको छ।
परिवारको सदस्य बाहेकका अन्य व्यक्ति निरज कुमार गुप्ताको नाममा सवारी साधन जिप खरिदमा ४० लाख, राजेशकुमार गुप्ताको नाममा निशान ट्रेडर्स (पेट्रोल पम्प) मा लगानीमा ४० लाख लगानी, नायव सुब्बा मदनप्रसाद गुप्ता र संलग्न अन्य समेतका नाममा संचालित विभिन्न बैंक खाताहरुमा देखिएको मौज्दात २ करोड ८५ लाख २८ हजार ८ सय ९२ गरी १९ करोड ३६ लाख ६१ हजार १ सय १९ रुपैयाँ खर्च तथा लगानी गरेको पाइएको थियो।
यस अवधिमा उनको वैधानिक आम्दानी भने जम्मा ४ करोड ५४ लाख ७२ हजार २ सय ४६ रुपैयाँ मात्रै भएको पाइएको छ। यसरी उनले १४ करोड ८१ लाख ८९ हजार २३ रुपैयाँ भ्रष्टाचार गरेको कमाएको पाइएपछि अख्तियारले मुद्दा दायर गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
