काठमाडौं– नयाँ जीवन बिमा कम्पनीहरुले सञ्चालनमा आएको एक वर्ष नपुगी साधारण सेयर (आइपिओ) जारी गर्न पाउने भएका छन्।
बिमा समितिले कम्पनीहरु सञ्चालनमा आएको आर्थिक वर्ष पूरा भएपछि आइपिओ जारी अनुमति दिन नियामक निकायसँग आग्रह गरेको बिमा समितिका एक अधिकारीले बताए। उनले बिमा कम्पनीलाई असार मसान्तपछि आइपिओ निष्कासन पक्रिया अगाडि बढाउन दिने तयारी बिमा समितिले गरेको जनाए।
उनले भने, ‘कम्पनीहरुको तोकिएको चुक्ता पुँजी २०७५ असार मसान्तसम्म पुर्याउनुपर्ने भएकाले बिमा समितिले बोर्डलाई चालु आर्थिक वर्षको अन्त्यपछि कम्पनीहरुलाई आइपिओ निष्कासन अनुमति दिन आग्रह गरेको हो।’
असार मसान्तपछि पनि यो समय तीन महिना थप गर्न सक्ने बिमक दर्ता तथा बिमा व्यवसाय सञ्चालन सम्बन्धी निर्देशिका, २०७३ मा उल्लेख छ। उक्त निर्देशिकाको दफा १० बमोजिम जीवन बिमा कम्पनीहरुको चुक्ता पुँजी दुई अर्ब रुपैयाँ हुनुपर्नेछ।
तर, नियामक निकाय नेपाल धितोपत्र बोर्डको नियमावली अनुसार कम्पनीहरु सञ्चालनमा आएको एक वर्ष नपुगी आइपिओ जारी गर्न नपाउने व्यवस्था छ। यस्तो अवस्थामा नियामकको आग्रहमा केही सयम थपघट हुनसक्ने बोर्डका सहायक प्रवक्ता निरञ्जय घिमिरे बताए।
उनले भने, ‘सम्बन्धित संस्थाको नियामकको आग्रह र नियम अनुसार यो समय केही घटाई आइपिओ निष्कासन प्रक्रिया अगाडि बढाइनेछ।’
बिमक दर्ता तथा बिमा व्यवसाय सञ्चालन सम्बन्धी निर्देशिका, २०७३ निर्देशिकामा तोकिएको समयमा चुक्ता पुँजी कायम गर्न नसक्ने भए सो को अवधि समाप्त हुनुभन्दा कम्तीमा सात दिन अगावै त्यसको कारण उल्लेख गरी म्याद थपको लागि समिति समक्ष निवेदन दिन सक्ने उल्लेख छ। समितिलाई कारण उचित लागेमा बढीमा तीन महिनासम्मको म्याद थपिदिन सक्नेछ।
अधिकांश बिमा कम्पनीका साधारणसभाबाट आइपिओ निष्कासन अनुमति पारित
सञ्चालन अनुमति पाएका ९ वटा जीवन बिमा कम्पनीमध्ये ८ वटा कम्पनी सञ्चालनमा आएका छन्। तीमध्ये अधिकांशको पहिलो वर्षको साधारणसभा सम्पन्न भएको छ। साधारणसभाले सर्वसाधारण लगानीकर्ताका लागि आइपिओ निष्कासन गर्ने प्रस्ताव पनि पारित गरेको छ। कतिपयले आइपिओ जारी गर्न बिक्री प्रबन्धक समेत तोकिसकेका छन्।
कुन बिमा कम्पनीको चुक्ता पुँजी कति?
सञ्चालनमा रहेका जीवन बिमा कम्पनीहरुले २०७५ असार मसान्तसम्म २ अर्ब रुपैयाँ चुक्ता पुँजी पुर्याउनुपर्ने भएपछि कम्पनीहरुले आइपिओ जारी गर्न दिनका लागि नियामक निकायलाई आग्रह गरेका छन्। उनीहरुले बिमा समितिमा पत्र नै पठाएर आइपिओ जारी गर्न अनुमति मागेका छन्।
बिमा समितिले तोकेको पुँजी समयमै पुर्याउन कम्पनीहरुले आइपिओ जारी नगरी सम्भव नभएकाले जतिसक्दो चाँडै आइपिओ निस्कासन अनुमति दिन नियामकसँग आग्रह गरेको एक नयाँ जीवन बिमा कम्पनीका सञ्चालकले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
