जनकपुर- तराईबासी अहिले पूर्णरुपमा छठ पर्वको तयारी र किनमेलमा जुटेका छन्। छठ पर्वको पूजा सामग्री जोरजाम तथा किनमेल गर्न यतिबेला बजारमा घुइँचो लागेको छ।
बजारको हरेक क्षेत्रका रेडिमेड कपडाको पसलदेखि किरानाका पसलहरु सबैमा उतिकै भीड देखिएको छ।
बजारमा पान, सुपारी, उखु, भोगटे, केरा लगायतका हरेक प्रकारका फलफूल पसलहरुमा खरिद गर्नेहरुको व्यापक भीडभाड देखिएको छ।
त्यसैगरी सूर्य भगवानलाई अर्घ्य दिन तराई तथा मधेश क्षेत्रका नदी, तलाउ, पोखरी, इनार, जलासयका किनारमा घाटलाई सिँगारिने काम तीब्र गतिमा चलिरहेको छ। खास गरी जनकपुरको धार्मिक तथा ऐतिहासिक महत्व बोकेका पोखरी तथा तलाउ गंगासागर, धनुसागर, अंगराजसागर, दशरथ तलाउ लगायतलाई नवदुलहीझैं सजाएर झकिझकाउ बनाउने कार्य जारी छ।
सूर्य भगवानलाई अर्घ्य दिन सहज होस् भनि भक्तजनहरुका लागि नदी किनारमा पान्डाल बनाइएको छ। नुहाउने क्रममा सुरक्षित रहनका लागि बाँसको किला ठोकी निश्चित क्षेत्र छुट्टाइएको छ। भीड नियन्त्रणका लागि आवश्यक स्वयमंसेवक तथा सुरक्षाकर्मीको समेत व्यवस्था मिलाइएको सम्बन्धित नदी तथा तलाउमा गठन गरिएका छठ पूजा समितिले जनाएका छन्।
जनकपुरका मुख्य-मुख्य चोकहरुमा आकर्षक प्रवेश द्वारहरु निर्माण गरिएको छ।
अहिले यस क्षेत्रका गाउँघर, सहर, बजार, गल्लीमा गुञ्जिरहेको छठ पर्वको सुमधुर लोकगीतले सारा जनकपुर, मिथिलाञ्चल लगायत तराई क्षेत्र नै उल्लासमय वातावरणमा रमेको छ।
जनकपुरमा छठको तयारीबारे नेपाल लाइभकर्मी अजय शाहले केही तस्बिरहरु कैद गरेका छन्।
जनकपुर बजारमा देखिएको चहलपहलका केही दृश्यहरुः
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।