काठमाडौं– इन्भेस्टमेन्ट कम्पनीको नाममा ‘मिटरब्याज’ को काम गर्दै आएका व्यापारीहरुलाई प्रहरीले बैंकिङ कसुर मुद्दा चलाउने भएको छ।
नेपाल राष्ट्र बैंक तथा सहकारी विभागबाट वित्तीय कारोबारको अनुमती नलिई बचत तथा कर्जा प्रवाह गरेकाले बैंकिङ कसुर मुद्दा चलाउन लागिएको हो। प्रहरीको केन्द्रीय अनुसन्धान ब्युरो (सिआइबी) ले आइतबार मोरङ र सुनसरीका ८ जना व्यापारीलाई पक्राउ गरेको छ। उनीहरुविरुद्ध बैंक तथा वित्तीय संस्था सम्बन्धी ऐन अनुसार कारबाही गरिने सिआइबीका डिएसपी श्याम ओलियाले बताए।
को-को पक्राउ परे?
पक्राउ परेकामध्ये इटहरीस्थित आपन इन्भेस्टमेन्ट कम्पनीका भीमप्रसाद चौधरी र श्याम थारुले स्थानीयबाट २ करोड ३९ लाख ४७ हजार ६ सय ६० रुपैयाँ बचत लिएको प्रहरीले जनाएको छ।
धरानस्थित हलेसी इन्भेस्टमेन्ट कम्पनीका सञ्चालकहरु चन्द्रबहादुर विक र अनिता विकलाई प्रहरीले पक्राउ गरेको छ। उनीहरुले ६ करोड ९९ लाख ८० हजार ७ सय ३७ रुपैयाँ संकलन गरेको सिआइबीले जनाएको छ।
विराटनगरमा चौतारी इन्भेस्टमेन्ट प्रालिका सञ्चालक राजु साहले ८ लाख ६१ हजार, इहटरीस्थित इन्भेस्टमेन्ट प्राइभेट लिमिटेडका सञ्चालक सुनिल गुरागाईंलाई पनि सिआइबीले पक्राउ गरेको छ। उनीहरुले स्थानीयबाट करिब ५० लाख रुपैयाँ संकलन गरेका थिए।
इटहरीमा इन्भेस्टमेन्ट प्रालि कम्पनी चलाउने डिल्ली आचार्य र प्रकाश आचार्य पनि पक्राउ परेका छन्। उनीहरुले हालसालै बचत तथा ऋणको काम सुरु गरेका थिए।
सेयर लगानीको उद्देश्यले भनेर कम्पनी रजिस्टार कार्यालयमा दर्ता गरी उनीहरुले बचत तथा ऋणको काम गर्दै आएको सिआइबीका डिएसपी ओलियाले बताए। उनीहरुले सहकारी संस्थाले भन्दा धरै ब्याज दिने भन्दै प्रलोभनमा पारी पैसा जम्मा गर्न लगाउने र त्यही पैसा तेब्बर बढी ब्याजदरमा कर्जा लगानी गर्दै आएका थिए।
प्रारम्भिक अनुसन्धानमा उनीहरुले १० प्रतिशत ब्याजदरमा बचत लिने र ३० प्रतिशतसम्म ब्याज लिएर कर्जा लगानी गर्दै आएका थिए। अवैध रुपमा घर/जग्गा तथा सुन धितो राखेर उनीहरुले कर्जा लगानी गर्दै आएका हुन्। प्रहरीले पक्राउ परेका व्यक्तिहरुको कम्पनीको बैंक खाता रोक्का राखी अनुसन्धान अघि बढाएको छ।
ती संस्थामा पैसा जम्मा गरेका सर्वसाधरणको पैसा के हुने भन्ने अन्योल छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773582775.jpg)
-1773578720.png)
-1764146706.png)
