काठमाडौं– कालिका पावर कम्पनी लिमिटेडले साधारण सेयर (आइपिओ) सुरक्षित गर्ने आज अन्तिम दिन हो। कम्पनीले आयोजना प्रभावित स्थानीयवासीका लागि ६ करोड रुपैयाँ बराबरको ६ लाख कित्ता आइपिओ निष्कासन गरेको छ।
कम्पनीले निष्कासन गर्न लागेको आइपिओमा आयोजना प्रभावित गोरखाको अजिरकोट, भीमसेन, सुलिकोट, सिरानचोक गाउँपालिका र गोरखा नगरपालिकाका स्थानीयबासिन्दाले सेयर खरिदका लागि आवेदन दिन पाउनेछन्।
कम्पनीको सेयर निष्कासन तथा बिक्री प्रबन्धक काठमाडौं क्यापिटल मार्कोट्स लिमिटेड र ग्लोलब आइएमई क्यापिटल लिमिटेड रहेका छन्। आइपिओ खरिदका लागि न्यूनतम १० र अधिकतम ३ हजार कित्तासम्मका आवेदन दिन पाइने व्यवस्था छ।
आइपिओ बाँडफाँट भएको मितिले ३ वर्षसम्म उक्त सेयर बिक्री गर्न नपाइने कम्पनीले जनाएको छ। इक्रा नेपालले कम्पनीको सेयरलाई ग्रेड फोर रेटिङ प्रदान गरेको छ। यो रेटिङले कम्पनीको समग्र अवस्था हेर्दा आधारभूत पक्ष औसतभन्दा कमजोर रहेको संकेत गर्छ।
हाल ६ मेगावाटको दरौंदी कालिका हाइड्रोप्रोजेक्ट सञ्चालन गरिरहेको कम्पनीले कर्जा भुक्तानीका लागि आइपिओ जारी गर्न लागेको हो। कम्पनीले प्राथमिक सेयरबाट उठेको रकम ठकेदार र अल्पकालीन कर्जा भुक्तान गर्न प्रयोग गर्ने र केही रकम दीर्घकालीन कर्जा भुक्तानीका लागि प्रयोग गर्ने बताएको छ।
कम्पनीमा संस्थापकको ४२ करोड, आयोजना प्रभावितको ६ करोड र सर्वसाधारणका लागि १२ करोड रुपैयाँ हुनेगरी लगानी संरचना तयार पारिएको छ। जसअनुसार सर्वसाधारणको १८ करोड स्वामित्व हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
