नयाँदिल्ली- ओमार लुलुको रिलिज हुने तयारीमा रहेको मलयालम फिल्म ‘ओरु अदार लभ’ यतिबेला चर्चामा छ। किनकि फिल्म रिलिजअघि नै यसभित्रको गीत ‘मनिक्या मलाराया पुभी’ निकै हिट भइसकेको छ। गीतमा समावेश एक दृश्य सामाजिक सञ्जालमा भाइरल बनिरहेको छ।
सो दृश्यमा फिल्मकी नायिका प्रिया प्रकाश वारियर र नायक रोशन अब्दुल रहुफले आँखाको इसारामै रोमान्स गरेको देख्न सकिन्छ। कक्षामा रहेका बेला उनीहरुले इसाराले नै आफ्ना कुरा एकअर्कामा व्यक्त गरेका छन्।
गत फेब्रुअरी ९ मा रिलिज सो गीतलाई हालसम्म युट्युबमा करिब २ करोड ४३ लाखले हेरिसकेका छन्। गीत भाइरल भएपछि फिल्म निर्माण युनिटले टिजर सार्वजनिक गरेको छ। मंगलबार सार्वजनिक टिजरमा पनि दुवै नायक-नायिकाको प्रेमाकर्षणलाई देखाइएको छ।
नायिका प्रियाले आफ्नो चुम्बनलाई गोली हानेको स्वरुपमा नायक रोशनतिर प्रहार गरेकी छन्। ‘चुम्बनवाला गोली’ प्रहारपछि रोशनले गोली लागेर ढलेको अभिनय गरेका छन्। टिजर हालसम्म एक करोड ८ लाखभन्दा बढीले हेरिसकेका छन्।
फिल्म निर्देशक ओमार लुलुले हालसम्म हेप्पी वेडिङ (२०१६) तथा चुन्क्ज (२०१७) फिल्म निर्देशन गरिसकेका छन्। ३३ वर्षकै उमेरमा २ वटा ‘ब्लकबस्टर’ हिट दिएका युवा निर्देशक लुलुको आगामी जुनमा रिलिज हुने फिल्म र चर्चामा रहेको सोही गीतको पेरीफेरीमा उनीसँग अनुभा जर्जले स्क्रोल डट इनका लागि गरेको कुराकानीः
फिल्मको शीर्षकले के अर्थ दिन्छ?
मलयालम भाषामा ‘ओरु अदार लभ’ भन्नाले असाधारण माया भन्ने बुझिन्छ। युवाहरुका लागि लक्षित गरी बनाइएको सो फिल्म सांगीतिक प्रेम कहानीमा आधारित छ। यसमा ८ वटा गीत समावेश छन्। ११/१२ कक्षामा पढिरहेका स्कुले विद्यार्थीको बसाइ, प्रेम तथा मित्रतामा आउने उतारचढावलाई फिल्ममा उतारिएको छ। जसमध्ये एक कहानीले भने असाधारण मायाको प्रतिबिम्बित गरेको छ। त्यही नै वास्तविक ‘ओरु अदार लभ’ हो।
फिल्ममा यसबाहेक अन्य विभिन्न प्रकारले गरिने मायालाई प्रस्तुत गर्न खोजिएकोले दर्शकले आफ्नो स्वादअनुसार उत्कृष्ट छान्न सक्नेछन्। फिल्ममा ५ नायक तथा ४ नायिकाको अभिनय देख्न सकिन्छ। फिल्म आगामी इदलाई लक्षित गरी जुनमा रिलिज हुँदैछ।
हाल चर्चित भएको गीतको बारेमा बताउनुस् न?
‘मनिक्या मलराया पुभी’ भनेको मोती फूल हो जसलाई अमूल्य ठानिन्छ। मुस्लिम समुदायमा चर्चित गीत ‘मपिला पट्टु’ दक्षिण भारतस्थित मलाबर क्षेत्रको धार्मिक तथा सांस्कृतिक कार्यक्रमहरुमा प्रसिद्ध छ। यो गीत इस्लाम धर्मका प्रवर्तक मोहम्मद र उनकी श्रीमती खादिजाको प्रेम कथामा आधारित छ। मेरी आमालाई यो गीत असाध्यै मन पर्छ। यो गीत मेरो बालापनको एक अंशको रुपमा रहेको छ। यसकारण पनि यही गीतको आधारमा नै ‘मनिक्या मलराया पुभी’ तयार गरिएको छ।
यो गीत यति चर्चित होला भन्ने सोच्नुभएको थियो?
यो गीतलाई सन् १९७८ मा पिएमए जब्बरले लेखेका हुन्। जसमा थलासेरी के रफिकले संगीत भरेका छन्। जब मैले यो गीतको कपिराइट खरिद गरेँ, मलाई लागेको थियो कि यो सबैतिरका श्रोतासँग जोडिन्छ।
शान रहमानले पुनः संगीत दिएपछि यो गीतले नयाँ स्वाद पायो र फिल्ममा समावेश गरिएको हो। गीतमा स्वर दिएका विनीत श्रीनिवासनाले सुमधुरता भर्न निक्कै मेहनत गरेका छन्। रहमानले करिब ३/४ घन्टाकै अन्तरालमा संगीत दिएर मलाई इमेल गरेका थिए। त्यसपछि जब गीत सुनेँ, विश्वले मन पराउनुपूर्व नै यो गीत मलाई असाध्यै मन परेको थियो।
मुस्लिम समुदायको लोकगीतलाई फिल्ममा समेट्नुभएको छ। हालसालै त गीतलाई लिएर विरोधको आवाज पनि सुनिएको छ नि?
भारतभित्र तथा विश्वभरका मानिसहरुले यो गीतलाई माया गरेका छन्। तर पनि केही पुरातन सोच राख्ने मुस्लिम समुदायभित्र भने यसलाई फरक अर्थमा लिइएको छ। उनीहरुले मोहम्मद र उनकी श्रीमतीको प्रेमकथामा आधारित लोकगीत फिल्ममा समेट्नुलाई अपमान गरेको रुपमा बुझेका छन्। तर त्यो संख्या निकै कम मात्र छ। तर मलाई भने यो लाग्छ कि गीतमार्फत मोहम्मद र उनकी श्रीमतीको ऐतिहासिक प्रेमकथा धेरै श्रोताका माझमा पुग्न सकेको छ।
फिल्मकी नायिका प्रिया प्रकाश वारियरबारे के भन्नुहुन्छ?
सुरुमा फिल्ममा सानो भूमिकाका लागि मात्रै प्रियाले अडिसन दिन आएकी थिइन्। सो भूमिकाका लागि उनलाई पनि छानेका हौँ। उता स्क्रिनमा प्रियासँगै रोमान्स गरेका रोशन अब्दुल रहुफले पनि अडिसनमा निकै राम्रो अभिनय गरेका थिए।
जब मैले यी दुवैलाई एकैसाथ देखेँ, तब यिनीहरुको जोडी निकै सुन्दर लाग्यो। मैले दुवैलाई आँखाले इसारा गर्न भनेँ। मेरो आशामा उनीहरु खरो उत्रिएपछि हामीले त्यो सिन सुट गर्यौं।
यो कुनै पूर्वनिर्धारित योजना थिएन। छोटो समयको छलफलमा नै यसलाई टुंग्याएका थियौँ। यो दृश्य मेरो व्यक्तिगत चाहना मात्रै थियो भन्दा पनि हुन्छ।
३३ वर्षको उमेरमै २ वटा हिट फिल्म दिइसक्नुभएको छ। तपाईंको फिल्ममा के हुन्छ, जसले दर्शकलाई तान्छ?
पछिल्ला दुवै फिल्ममा नयाँ अनुहारहरु छन्। मलाई लाग्छ आजकल दर्शकहरुले पर्दामा नयाँ चेहरालाई हेर्न रुचाइरहेका छन्। यसका अलावा मेरा फिल्म युवाहरुकै लागि बनेको हुन्छ, जो पहिलो शो हेर्नका लागि हलसम्म पुग्छन्।
युवाहरु मनोरञ्जनका लागि बढी मात्रामा फिल्म हेर्ने गर्दछन्। मलयालम फिल्महरु भने सामान्यतया सत्यकथामा आधारित हुन्छन्। तर मनोरन्जनप्रधान फिल्म हेर्नेको जमात पनि बाक्लो छ। म व्यक्तिगत रुपमा बलिउडका बादशाह शाहरुख खानको प्रशंसक हुँ। मलाई उनको फिल्म ‘चेन्नई एक्सप्रेस’ असाध्यै मन पर्छ।
इन्साअल्लाह! ‘ओरु अदार लभ’ले पनि मनोरञ्जनको बजारमा आफूलाई प्रमाणित गर्नेछ।
(अनुवादः विमर्श कँडेल)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
