नेपालगन्ज– बाँकेको कोहलपुरमा शुक्रबारदेखि कोहलपुर औद्योगिक व्यापार मेला तथा पर्यटन महोत्सव–२०७४ सुरु भएको छ।
महोत्सवको उद्घाटन गर्दै बाँके क्षेत्र नं. १ का सभासद महेश्वर गहतराजले कोहलपुर पश्चिम नेपालकै प्रमुख व्यापारिक केन्द्रका रुपमा विकसित हुँदै गएको बताए।
भारतको राजधानी नयाँदिल्लीदेखि कोहलपुरसम्म फराकिला सडक निर्माण भइसकेको बताउँदै सभासद गहतराजले कोहलपुरदेखि हुम्लाको सिमीकोट, हिल्सा हुँदै चिनको तिब्बतसम्म सडक बिस्तार हुनासाथ कोहलपुर नेपालकै सम्वृद्ध सहर बन्ने बताए।
महोत्सवमा बाँके तथा बर्दिया राष्ट्रिय निकुन्ज र कैलाश मानसरोबर जाने प्रवेशद्वारका कारण कोहलपुरमा पर्यटन उद्योगको प्रचूर सम्भावना रहेकाले त्यसका लागि आवश्यक पूर्वाधार निर्माणमा बाँकेका जनप्रतिनिधिले सामूहिक पहल गर्ने प्रतिबद्धता जनाएका छन्।
नेपालगन्जदेखि कोहलपुरसम्मको क्षेत्र औद्योगिक करिडोरका रुपमा विकसित हुँदै गएकाले कोहलपुर औद्योगिक क्षेत्रको केन्द्र बन्दै गएको छ।
कोहलपुर नगरपालिकाका मेयर लुटबहादुर रावतले आर्थिक विकासका लागि यस्ता प्रदर्शनी तथा महोत्सवले विकासका लागि महत्वपूर्ण भूमिका निवार्ह गर्ने बताए।
कार्यक्रममा बोल्दै कोहलपुर औद्योगिक व्यापार मेला तथा पर्यटन महोत्सव–२०७४ मूल समारोह समितिका संयोजक चक्रबहादुर अधिकारीले महोत्सवपछि संकलन हुने आर्थिक स्रोतले कोहलपुर उद्योग वाणिज्य संघको आधुनिक भवन बनाउने लक्ष्य रहेको जानकारी दिए।
कार्यक्रममा ज्येष्ठ व्यवसायी मेजरमान श्रेष्ठ, सफल व्यवसायी देवानन्द अर्याल, सफल उद्यमी मिना गौडेल, अपाङ्ग व्यवसायी दिपक दरै र एकल महिला व्यवसायी भारती खनाललाई सम्मान गरिएको थियो।
फागुन ८ सम्म सञ्चालन हुने महोत्सवमा सूचना प्रविधिका १५; अटोरिक्सा अन्तर्गतका दुई पाङ्ग्रे, तीन प्राङ्ग्रे र चार पाङ्ग्रे सबारी साधनका ८; कृषि, फलफूल, जडीबुटी, सेवा एवं शिक्षामूलक र महिला उद्यमीका ५०; होलटका १८; थारु गाउँका ११ सहित ३ सय स्टल छन्।
करिब ३ लाख दर्शकले अवलोकन गर्ने र महोत्सव अवधिभर करिब ६ करोड बराबारको कारोबार हुने आयोजकको अनुमान छ। महोत्सवबाट ८९ लाख रकम वचत गर्ने लक्ष्य लिएको कोहलपुर उद्योग वाणिज्य संघका महासचिव तेजप्रसाद अधिकारीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
