काठमाडौं- निर्वाचन आयोगले राष्ट्रियसभा सदस्यको निर्वाचनमा शान्तिपूर्ण र उत्साहजनक रूपमा मतदान कार्य सुरु भएको जनाएको छ।
निर्वाचन हुने ६ वटा प्रदेशमा बिहान १० बजेबाट शान्तिपूर्ण मतदान सुरु भएको आयोगको भनाइ छ।
आयोगले प्रदेश नम्बर २ मा ८ जना सदस्य निर्विरोध निर्वाचित भएकाले मतदान गर्न नपरेको जनाएको छ। कुल ५६ सदस्यका लागि हुने मतदानमा २४ जना निर्विरोध भएकाले ३२ सदस्यका लागि ५२ जना उम्मेदवार प्रतिस्पर्धामा रहेका छन्।
६ वटा प्रदेशमा स्थापना गरिएका निर्वाचन अधिकृतको कार्यालयका अनुसार प्रदेश नम्बर १ को मोरङको विराटनगरस्थित वीरेन्द्र सभा गृहमा, प्रदेश नम्बर ३ को ललितपुरको जावलाखेलस्थित चिडियाखाना नजिक ललितपुर महानगरपालिका वडा ४ को कार्यालयमा र प्रदेश नम्बर ४ को कास्कीको पोखरास्थित लोकसेवा आयोगको पश्चिाञ्चल क्षेत्रीय निर्देशनालय भवन केन्द्रमा मतदान भइरहेको छ।
त्यस्तै, प्रदेश नम्बर ५ को दाङको घोराहीस्थित कर्मचारी मिलन केन्द्र रहेको भवन, प्रदेश नम्बर ६ को सुर्खेतको वीरेन्द्रनगरपालिकास्थित जिल्ला निर्वाचन कार्यालय भवन परिसर र प्रदेश नम्बर ७ मा डोटीको दिपायल सिलगढी नगरपालिका वडा नं. ६ मा रहेको पदम पब्लिक मुक्तिनारायण मावि भवन मतदान केन्द्रमा मतदान जारी रहेको आयोगका उपसचिव महेशराज तिम्सिनाद्वारा जारी गरिएको विज्ञप्तिमा उल्लेख छ।
प्रत्येक प्रदेशबाट निर्वाचित हुने ८ जनामा महिला ३, दलित १, अपाङ्गता भएका व्यक्ति वा अल्पसङ्ख्यक समुदायबाट १ र अन्य ३ जना निर्वाचित हुनेछन्। महिला ३ र अन्य ३ सदस्यका लागि एकल सङ्क्रमणीय मत प्रणालीअनुसार मतदान हुनेछ भने दलित १, अपाङ्गता भएका व्यक्ति वा अल्पसङ्ख्यक समुदायबाट १ गरी २ सदस्यका लागि राष्ट्रियसभा सदस्य निर्वाचन अध्यादेश अनुसार सबैभन्दा बढी मत प्राप्त गर्ने उम्मेदवार निर्वाचित हुनेछन्।
मतदान कार्य आज दिउँसो ३ बजेसम्म हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
