बुटवल- प्रदेश नं ५ को पहिलो बैठक सकिएसँगै मन्त्रीमण्डलमा आफू पर्नका लागि सांसदहरुको दौडधुप सुरु भएको छ।
पहिलो बैठकले फागुन २ गतेका लागि सभामुख निर्वाचनको मिति तय गरेको छ। प्रदेश नं ५ मा वाम गठबन्धनको स्पष्ट बहुमत रहेको छ। यो प्रदेशले ११ वटासम्म मन्त्रालय बनाउने सम्भावना छ। यद्यपि टुंगो भने नलागेको एमालेका प्रमुख सचेतक भूमिश्वर ढकालले जानाकारी दिए।
नियम अनुसार सांसद संख्याको २० प्रतिशत नबढ्ने गरी मन्त्रालय गठन गर्नुपर्छ। यो प्रदेशमा भने १० प्रतिशत रहने गरी ११ मन्त्रालय बनाउने तयारी भएको बताइएको छ। त्यस कारणले पनि वाम गठबन्धनको भाडबण्डा अनुसार ७०/३० को अनुपातमा मन्त्रीमण्डल गठन हुनेछ।
भागबण्डामा आफू पनि छिर्नका लागि शीर्ष तहका नेताहरुलाई भेटेर माहोल आफ्नो पक्षमा पार्न नेताहरु लागिपरेका छन्।
दाङबाट प्रदेशसभामा विजयी शंकर पोखरेल मुख्यमन्त्री बन्ने पक्का छ। त्यस कारण अन्य शक्तिशाली मन्त्रालय लुम्बिनीबाट हुनुपर्ने नेताहरुले बताएका छन्। मुख्यमन्त्री एमालेले पाउने भएपछि सभामुख माओवादी केन्द्र र उपसभामुख एमालेको हुने सहमति छ।
सभामुखमा गुल्मीका सुदर्शन बराल र रुकुमका पूर्ण घर्तीमगरको चर्चा छ। उपसभामुख एमालेको बन्ने भए पनि अहिलेसम्म कसैको चर्चा छैन।
यता, मन्त्री बन्न एमाले सांसदहरूबीच नै प्रतिस्पर्धा छ। नवलपरासीका बैजनाथ चौधरीलाई मन्त्री बनाउन दबाब सुरु भएको छ। रूपन्देहीबाट लीला गिरी र भोजप्रसाद श्रेष्ठ दुवैले मन्त्री बन्ने इच्छा देखाएका छन्। महिलामा विमला पन्थीको नाम चर्चामा छ।
माओवादी केन्द्रबाट रूपन्देहीका दधिराम न्यौपाने मन्त्री बन्ने लाइनमा अगाडि छन्। गठबन्धनसँगको तालमेलमा रुपन्देहीबाट न्यौपाने मात्र विजयी भएका थिए। त्यस कारणले पनि
उनी राम्रो मन्त्रालय नपाए सभामुख नछोड्ने दाउमा छन्। मन्त्री हुने लाइनमा दाङकी माओवादी नेत्री दामा शर्माको नाम सर्वसम्मत जस्तै छ। सहिद परिवारकी उनी लामो समयदेखि राजनीतिमा छिन्।
यस्तै बाँकेबाट प्रत्यक्षमा चुनाव जितेकी कृष्ण केसीले पनि दाबेदारी पेस गरेकी छन्। गुल्मीका सुदर्शन बराल, प्युठानका कृष्णध्वज खडका र रोल्पाबाट निर्वाचित कुलबहादुर केसीले पनि मन्त्री बन्न लबिङ सुरु गरिसकेको एक माओवादी नेताले बताए।
माओवादी नेता तथा प्रदेश सांसद दधिराम न्यौपानले संसदीय दलको नेताका लागि धेरै आकांक्षी भएकाले नेता चुन्न ढिला भएको बताएका छन्। उनले सहमतिमै संसदीय दलको नेता छान्ने बताए।
नेकपा एमालेले माघ ७ गते नै संसदीय दलको नेता छानिसके पनि माओवादी केन्द्रले भने चयन गरेको छैन।
प्रदेश ५ मा तेस्रो दल बनेको कांग्रेसले पनि अहिलेसम्म संसदीय दलको नेता छान्न सकेको छैन।
प्रदेश ५ मा प्रत्यक्ष र समानुपातिक गरी ८७ सांसद रहेका छन्। एमालेका ४१, कांग्रेसका १९, माओवादीका २०, संघीय समाजवादी फोरमाका ५, राष्ट्रिय जनता पार्टी र राष्ट्रिय जनमोर्चाका १/१ सांसद रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
