काठमाडौं- राष्ट्रिय जनता पार्टी नेपाल (राजपा)ले २ नम्बरको प्रादेशिक सरकारमा आलोपालो गर्ने प्रस्ताव संघीय समाजवादी फोरम नेपाल समक्ष राखेको छ।
सरकार गठनका विषयमा मंगलबारबाट औपचारिक छलफल सुरु गरेका दुई मधेसकेन्द्रित दलको बैठकमा राजपाले यस्तो प्रस्ताव गरेको हो। प्रदेशसभामा दुवै दलको हैसियत केही सिटले मात्र तल-माथि रहेकाले प्रदेश सरकारको नेतृत्व समेत आलोपालो रुपमा गर्ने प्रस्ताव राजपा अध्यक्ष मण्डलका नेताहरुले राखेका थिए।
फोरम अध्यक्ष उपेन्द्र यादवले आलोपालो सरकार गठन गर्ने राजपाको प्रस्ताव स्वीकार गर्न नसकिने बताएका थिए। चुनाव अगाडि भएको सहमति अनुसार पहिलो बन्ने दलले मुख्यमन्त्री र दोस्रो दलले सभामुख लगायतको पद बाँडफाँट गर्नुपर्ने धारणा यादवले राखेका थिए।
‘यसअघि नै आलोपालोको प्रस्तावमा मैले नाइँ भनिसकेको छु, सरकारको नेतृत्व बाँडफाँट गर्ने विषयमा सहमति हुन सक्दैन’, यादवले नेपाल लाइभसँग भने।
राजपाले पार्टीभित्र छलफल गरेर अघि बढ्ने प्रस्ताव गरेपछि जनकपुरमा मंगलबार बसेको दुई दलको बैठक निष्कर्षविहीन भएको थियो। निर्वाचन भएको झन्डै दुई महिनापछि दुई
मधेसकेन्द्रित दल प्रदेश नम्बर २ को सरकार गठनमा औपचारिक छलफलमा जुटेका हुन्।
सरकार गठनका लागि राजपाले यसअघि राख्दै आएको छलफलको प्रस्तावलाई फोरमले टार्दै आएको थियो।
फोरमले आइतबार रातिसम्म प्रदेश कमिटीको बैठक बसेर लालबाबु राउतलाई संसदीय दलको नेता चयन गरेको थियो। प्रदेश २ को प्रादेशिक सरकारको नेतृत्वमा फोरमको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
