सुर्खेत- पहिलो पटक सुर्खेत झरेकी मुगुबाट निर्वाचित नेपाली कांग्रेसका सांसद झोवा विकले अहिलेसम्म पनि डेरा पाएकी छैनन्।
यहाँ आइपुग्दा ठाउँ र सांसद दुवैको नौलो अनुभूति लागेको उनलाई यहाँको भूगोल र सामाजिक वातावरण नयाँ संसार जस्तो लागिरहेको छ। गाउँले परिवेशबाट संसद् भवनमा छिर्दा गर्वको अनुभूति भएको प्रतिक्रिया सांसद विकले दिइन्।
'सांसदमा निर्वाचित भएपछि मात्र म माघ ६ गते पहिलो पटक सुर्खेत झरेँ, अहिले लोकप्रिय होटेलमा बसेकी छु। यहाँको बारेमा मलाई केही थाहा छैन। चिनेका साथीभाइलाई एउटा फ्ल्याट खोजिदिन भनेकी छु, पाइएको छैन' उनले भनिन्, 'साथीभाइको सहयोगमा बल्लतल्ल पाइएको तीन कोठाको भाडा २० हजार रुपैयाँ भनेपछि लिन गाह्रो भयो।'
बढी पैसा तिरेर सुर्खेतमा झर्नुपर्दाको पीडा त छँदैछ, त्यसमा झन भाडामा बस्दा ढाड सेकिन्छ, जनप्रतिनिधि भइसकेपछि जनताका थुप्रै आशा छन् तर आशा पूरा गर्न बसाइँ व्यवस्थापन गर्न सकिएको छैन, अहिलेसम्म आफूसँग आउने पार्टी कार्यकर्ता र शुभचिन्तकलाई होटेलमा नै राख्दै आएको उनले गुनासो गरे।
त्यस्तै, जाजरकोट प्रदेश (ख) बाट निर्वाचित नेकपा एमालेका सांसद करवीर शाही प्रदेशसभा भवन नजिको बस्ती इत्राम क्षेत्रमा कोठा भाडा खोज्न गए। त्यहाँ सबै घर भाडामा बस्ने मान्छेले भरिभराउ थिए। उनका लागि एकाध घरमा कोठा पाइए तर भाडा सोध्दा सोचेकोभन्दा दोब्बर थियो। १० हजार रुपैयाँसम्म अनुमान गरेको कोठाका लागि १८ देखि २६ हजार रुपैयाँ भाडा भनेको सुन्दा उनी केही नभनी फर्किए।
'अहिले साथीभाइलाई कोठा खोज्न पठाएको छु र मैले पनि खोजिरहेको छु, मिल्दो भाडा र उपयुक्त कोठा पाइएको छैन', सांसद शाहीले भने। संसद् भवन नजिक कोठा नपाएपछि केही समयका लागि होटेलमा बसिरहेको उनले बताए।
सुर्खेत अस्थायी राजधानी तोकिएपछि कोठा पाउन गाह्रो र भाडामा चरम महँगी भएको उनको भनाइ छ। कोठा नपाउँदा एक महिनामा तिर्ने भाडा होटेलमा एक हप्तामै तिर्नुपरेको उनको दुःखेसो थियो।
यस्तै, रुकुम प्रदेश (ख) का सांसद गोपाल शर्मा पनि अहिलेसम्म होटेलमै बस्छन्। उनले पनि संसद् भवन नजिकै कोठा खोजिरहनु भएको छ। राष्ट्रियसभाको निर्वाचनपछि मात्र बसाइ व्यवस्थापन हुने सांसद शर्माको भनाइ छ।
डोल्पा (ख) का प्रदेश सांसद वीरबहादुर शाही पनि होटेलमै बास बसिरहेका छन्। राष्ट्रियसभाको चुनाव र संसद्को कामले गर्दा आफन्तको सहयोगमा कोठा खोजिरहेको उनले बताए। चिसो मौसममा सुर्खेत झर्ने अधिकांश डोल्पाका जनतालाई सेवा दिइरहनुपर्दा र डेरा नहुँदा होटेल खर्च बढेको उनले बताए।
अस्थायी राजधानी तोकिनु पूर्व सुर्खेतमा सामान्य कोठा भाडादर भए पनि अहिले भने भाडादर ह्वात्तै बढेको सांसद शाहीले बताउनुभयो। जनप्रतिनिधिका हैसियतले उनीहरुको माग सम्बोधन गर्नैपर्ने भएकाले व्ययभार थेग्न कठिन हुने प्रदेश सांसदहरुको भनाइ छ।
उनीहरू चार जना मात्र होइन प्रदेश नं ६ का अधिकांश सांसद्को अवस्था उस्तै देखिन्छ। डेरा नपाउनेहरू कोही आफन्तकहाँ त कोही होटेलमा बस्दै आएका छन्। तुलनात्मक रुपले काठमाडौंभन्दा सुर्खेतमा खाद्य वस्तुबाहेक अन्य चिजको मूल्य बढेको पाइन्छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
