रौतहट- राष्ट्रपति विद्यादेवी भण्डारीले कलाकारद्वय धुर्मुस–सुन्तलीले समुदायको विकासका लागि अतुलनीय काम गरेको बताएकी छन्।
धुर्मुस सुन्तली फाउन्डेसनले रौतहटको चन्द्रपुरमा निर्माण गरेको सन्तपुर एकीकृत नमुना दलित बस्तीको उद्घाटन गर्दै राष्ट्रपति भण्डारीले देशलाई समृद्ध बनाउने काम सरकारको भए पनि धुर्मुस–सुन्तलीले राज्यले गर्नुपर्ने काम गरेको भन्दै प्रशंसा गरिन्। 'यो एकदमै अतुलनीय काम हो,' उनले भनिन्, 'प्रदेश नं २ मा विकासका धेरै आधार भएकाले सरकारले स्रोत र साधनलाई यसरी नै उपयोग गर्दै जानुपर्छ।'
फाउन्डेस नले बस्ती निर्माण गरेर समतामूलक समाज निर्माणका लागि कल्याणकारी कामको अनुपम उदाहरण दिएको उनको भनाइ छ। कलाकारको प्रयासबाट यस्तो नमुना बस्ती बनेकामा आफू गौरवान्वित भएको भन्दै राष्ट्रपतिले सामुदायिक हितका लागि यस्ता काम सरकारले गर्नुपर्ने बताइन्।
राष्ट्रपति भण्डारीले सरकारले विद्यालय जानबाट वञ्चित बालबालिकालाई विद्यालयमा ल्याउने प्रयास गर्नुपर्ने बताउँदै रौतहटलाई कृषिको भण्डारका रुपमा समेत विकास गर्न आग्रह गरिन्।
उनले बस्तीको साँचो नमुना बस्ती निर्माण समितिका अध्यक्ष सत्यनारायण माझीलाई हस्तान्तरण गरेकी छन्।
उद्घाटन समारोहमा अतिथिका रुपमा उप्थित हास्य कलाकार महजोडीले पनि नमुना बस्तीको खुलेर प्रशंसा गरे। फाउन्डेसनका अध्यक्ष सीताराम कट्टेलले सो बस्ती निर्माण सबै सहयोगी हातबाट भएको बताए।
कलाकार कट्टेल र कुञ्जना घिमिरेद्वयको पहलमा सन्तपुरमा बाढीपीडित दलित परिवारका लागि भूकम्प प्रतिरोधात्मक सुविधासम्पन्न ४७ घर निर्माण भएको छ। गत असोज ४ गते शिलान्यास भएको बस्तीमा सामुदायिक भवन, मन्दिर, क्लब, दृश्यावलोकनस्तम्भ निर्माण भएका छन्।
साउनमा आएको बाढीले सो गाउँका दलित परिवारका घर डुबानमा परेको थियो। करिब रु ५ करोड ९५ लाखको लागतमा निर्मित सो बस्ती निर्माणमा कलाकार कट्टेल दिनरात आफैं खटेका थिए। चन्द्रपुर नगरपालिका वडा नं ८ सन्तपुरमा निर्मित यो बस्ती धुर्मुस–सुन्तली फाउन्डेसनको चौथो परियोजना हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
