बुटवल– नेपाली कांग्रेसका युवा नेता गगन थापाले बुधबार बुटवलको एक होटलमा पौने दुई घन्टा कार्यकर्ताको असन्तुष्टिमिश्रित प्रश्नको सामना गरे।
कांग्रेस बुटवल उपमहानगर कमिटिले आयोजना गरेको कार्यकर्ता भेलामा नगर सभापति खेलराज रेग्मीले स्वागत गरेपछि प्रमुख अतिथि थापाले सम्बोधन गर्ने कार्यतालिका थियो। तर, कांग्रेस कार्यकर्ता मीनबहादुर कार्कीले ‘मञ्चमा बसेकाको मात्र होइन, तल बसेकाको पनि कुरा सुन्नुपर्छ’ भनेपछि २० मिनेट फ्लोर खुला गरियो। त्यस क्रममा कार्यकर्ताले असन्तुष्टि र आक्रोश पोख्नुका साथै कांग्रेसले निर्वाचनमा पराजय भोग्नुको कारण नेता थापालाई सोधे।
कांग्रेस कार्यकर्ता प्रकाश पाठकले ‘देशको राजनीतिक परिवर्तनसँगै युवाहरुलाई समेट्नेबारे पार्टीको योजना के छ’ भनेर सोधे। लगत्तै अर्का कार्यकर्ताले भने, ‘शेरबहादुर देउवा, रामचन्द्र पौडेल भन्दै गुट–उपगुट गर्ने कि कांग्रेसलाई कांग्रेस नै रहन दिने? के कांग्रेस कुनै व्यक्तिको हो?’
२० मिनेटको समयमा १४ भन्दा बढी कार्यकर्ताले कांग्रेसको अबको राजनीति र निर्वाचनमा पराजयबारे आफ्ना कुरा राखेका थिए।
गणेश क्षेत्रीले कांग्रेसको नेतृत्वकै कारण पार्टीले पराजय बेहोर्नुपरेकाले यसको जिम्मा नेतृत्व पंक्तिले दिनुपर्ने बताए। कुलबहादुर केसीले निर्वाचनको पराजयको मुख्य कारण प्रधानन्यायाधीश सुशीला कार्कीमाथिको महाअभियोग र आइजी प्रकरण रहेको बताए।
मनोज खड्काले सोधे– ‘हामी युवा कांग्रेसका पछाडि किने लाग्ने?’
कार्यक्रममा महिलाहरुलाई अवसर नदिएको भन्दै गुनासोहरु पनि व्यक्त भएका थिए।
कार्यकर्ताको प्रश्न र सुझाव सुनेपछि बल्ल बोल्ने पालो पाएका नेता थापाले महासमितिको बैठक बोलाएर निर्वाचनमा पराजयको कारण खोज्ने र अबको पाँच वर्षमा कांग्रेसलाई कस्तो बनाउने भन्ने रणनीति बनाउनुपर्ने बताए।
नेता थापाले देशका सातै प्रदेश र केन्द्रीय सरकारमा अब पाँच वर्ष कांग्रेस सरकारमा नजाने भएकाले स्थानीय तहमा जितेका ठाउँमा राम्रो काम गर्ने र अन्यत्र बलियो प्रतिपक्षको भूमिका निर्वाह गर्न जरुरी रहेको विचार राखे।
उनले कांग्रेसका अग्रजहरुलाई सम्मान गर्दै अब नेतृत्वमा परिवर्तन आवश्यक रहेको समेत बताए।
‘अग्रजकै कारण पार्टी यहाँसम्म आयो, अब पार्टीको नेतृत्व युवालाई दिने र पार्टी चलाउन नजाने सिकाउने बेला आएको छ’, थापाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
