काठमाडौँ- नेकपा (एमाले) ले निर्वाचन मण्डलका सदस्य तथा पार्टीको तर्फबाट निर्वाचित सबैलाई राष्ट्रियसभा निर्वाचन सम्पन्न नभएसम्म देशबाहिर र प्रदेशबाहिर नजान निर्देशन दिएको छ। स्थायी कमिटीको आजको बैठकले राष्ट्रियसभा निर्वाचनमा मतदाता रहेका निर्वाचित सदस्यहरुलाई यस्तो निर्देशन दिएको हो।
पार्टीको केन्द्रीय कार्यालय धुम्बाराहीमा एमाले अध्यक्ष केपी शर्मा ओलीको अध्यक्षतामा बसेको बैठकले निर्वाचन मण्डलका सदस्यहरु, पार्टीका तर्फबाट निर्वाचित सदस्यहरु, प्रदेशसभा सदस्य, महानगरपालिका, उपमहानगरपालिका, नगरपालिकाका प्रमुख, उपप्रमुख गाउँपालिका अध्यक्ष, र उपाध्यक्षहरू राष्ट्रियसभाको निर्वाचन सम्पन्न नभएसम्म देश बाहिर र प्रदेशबाहिर नजान निर्देशन दिएको हो।
बैठकले राष्ट्रियसभा सदस्य पदको निर्वाचनमा प्रयोग हुने एकल संक्रमणीय निर्वाचन प्रणालीका सम्बन्धमा सम्पूर्ण मतदातालाई अनिवार्य रुपमा मतदानसम्बन्धी तालिम दिन जरुरी भएको ठान्दै प्रदेश संगठन कमिटीका संयोजकबाट केन्द्रीय निर्वाचन विभागसँग समन्वय गरी प्रशिक्षणको व्यवस्था गर्ने निर्णय गरेको छ।
त्यसका लागि माघ २१ गते राति १२ बजेदेखि मौन अवधि सुरु हुनुअगावै प्रशिक्षणको व्यवस्था गरिने भएको छ।
राष्ट्रियसभाका लागि तय भएका एमाले र नेकपा (माओवादी केन्द्र) का साझा उम्मेदवारहरूलाई विजयी बनाउन पारस्परिक सल्लाहका आधारमा दुवै पार्टीको तर्फबाट संयुक्त रुपमा प्रचारप्रसार, मतदाता शिक्षा, व्यवस्थापन लगायतका कार्य गर्नेसमेत बैठकले निर्णय गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
