काठमाडौं- अर्को सातादेखि सुरु हुने नाडा अटो शोमा अप्रिलियाका विभिन्न ४ मोडलका स्कुटर प्रदर्शनीका लागि राखिने भएको छ। इटालियन सवारी उत्पादक कम्पनी अप्रिलियाको नेपालका लागि आधिकारिक बिक्रेता दुगड ब्रदर्स एन्ड सन्सले नाडा अटो शोमा विभिन्न स्कुटर राख्ने भएको हो।
कम्पनीले अप्रिलिया एसआर स्ट्रोम १२५, एसआर १२५, एसआर १५० डिजिटल तथा एसआर १५० रेस डिजिटल प्रदर्शनी गर्ने जनाएको छ।
कम्पनीले अप्रिलिया एसआर स्ट्रोम १२५ को मूल्य २ लाख २४ हजार ९ सय, एसआरको १२५ को २ लाख ४० हजार ९ सय, एसआर १५० को २ लाख ८१ हजार ९ सय र अप्रिलिया एसआर १५० रेसको २ लाख ९३ हजार रुपैयाँ तोकेको छ।
अप्रिलिया एसआर स्ट्रोम १२५ मा एयरकुल्ड सिंगल सिलिन्डर इन्जिन दिइएको छ। यसले, ७२५० आरपिएममा ९.५ हर्ष पावर र ६ हजार २५० आरपिएममा ९.८ एनएम टर्क उत्पादन गर्छ। यसमा कार्बरेटर फ्युल, सेल्फ स्टार्ट मेकानिज्म, अटोमेटिक क्लच लगायतका विशेषता दिइएको छ। यो स्कुटर कम्पनीले केही समयअघि नेपाली बजारमा सार्वजनिक गरेको थियो।
अप्रिलियाले अटो शोमा राख्ने भएको एसआर–१२५ मा उपलब्ध इञ्जिनले ७ हजार २५० आरपिएममा ९.५२ एचपी पावर र ६२५० आरपिएम मा ९.९ एनएम टर्क उत्पादन गर्छ। यसले काठमाडौंमा ४० र हाइवेमा ४५ किलोमिटर माइलेज दिने कम्पनीले दाबी गर्दै आएको छ।
यसमा ११८ मिलिमिटर ग्राउन्ड क्लियरेन्स, युरो ४ इञ्जिन, १४ इञ्चको टायर, एरोडाइनामिक सस्पेन्सन, युएसबी केवल कनेक्टर लगायतका विशेषता दिइएको छ। यस्तै, स्टाइलिस लुक्स भएको एसआर १५० र एसआर १५० रेस भर्सनमा सेल्फ तथा किक स्टार्ट सुविधा उपलब्ध रहेको छ।
स्कुटरको फ्रन्टमा डिस्क तथा रियरमा ड्रम ब्रेक उपलब्ध रहेको छ। यसमा उपलब्ध १५४.८ सिसीको सिगंल सिलिन्डर, ३ भल्भको इन्जिनले ६७५० आरपिएममा १०.२ पिएस पावर तथा ५००० आरपिएममा १०.९ एनएम टर्क जेनेरेट गर्छ। एसआर १५० मा हेडल्याम्प हेलोजिन र टेलल्याम्प बल्ब दिइएको छ।
नेपाली बजारमा पछिल्लो समय स्कुटरको उपयोग बढ्दै गइरहेको छ। सबैजसो दुईपांग्रे सवारी बिक्रेताले स्कुटर ल्याउँदै आएका छन्। अप्रिलियाका स्कुटर युवा पुस्ताको रोजाइमा पर्ने गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।