काठमाडौं । चालु आर्थिक वर्ष २०८३/८४ सुरु भएयता ४ सचिवसहित ४६४ निजामती कर्मचारीले राजीनामा दिएका छन् ।
राष्ट्रिय किताबखाना (निजामती)का अनुसार साउन १ गतेदेखि हालसम्म राजपत्राङ्कित २०७ र राजपत्र अनङ्कित २५७ कर्मचारीले पदबाट राजीनामा दिएका हुन् ।
किताबखानाका निर्देशक तथा सूचना अधिकारी सुदन ख्वाखली श्रेष्ठका अनुसार राजीनामा दिने राजपत्राङ्कित कर्मचारीमा ४ सचिव, ३३ सहसचिव, ७२ उपसचिव र ९८ शाखा अधिकृत छन् ।
त्यस्तै, राजपत्र अनङ्किततर्फ १३७ जना खरिदार तथा नायब सुब्बा तहका कर्मचारी र १२० जना श्रेणीविहीन कर्मचारीले राजीनामा दिएका छन् ।
सरकारले प्रतिनिधिसभामा दर्ता गरेको निजामती कर्मचारीसम्बन्धी विधेयकमा सेवा अवधि र उमेरसम्बन्धी नयाँ व्यवस्था प्रस्ताव गरिएपछि कर्मचारीहरूले धमाधम राजीनामा दिएको बताइएको छ । विधेयकमा व्यवस्था कार्यान्वयनमा आउने बेला पहिलो पटक ३० वर्ष सेवा अवधि पूरा गरेका वा ५५ वर्ष उमेर पुगेका कर्मचारीले राजीनामा दिनुपर्ने प्रावधान राखिएको छ ।
यद्यपि, राजीनामा दिने कर्मचारीले आफ्नो राजीनामा पत्रमा घरायसी कारण उल्लेख गरेको किताबखानाले जनाएको छ ।
किताबखानाका अनुसार राजीनामा दिएका सबै कर्मचारीको राजीनामा सरकारले स्वीकृत गरिसकेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
