नयाँ दिल्ली, भारतको सर्वोच्च अदालतले उत्तर प्रदेश, राजस्थान र हरियाणा राज्य सरकारविरुद्ध गाई संरक्षणको नाममा घटेका घटना रोक्न असफल भएको भन्दै सोमबार मानहानीको सूचना जारी गरेको छ।
सर्वोच्चले हिन्दु धर्मावलम्वीद्वारा पवित्र मान्ने गाईको कथित तस्करी वा हत्याको आरोपमा ती राज्यमा केही नागरिकलाई कुटेर हत्यासमेत गरिएका हालैका घटनालाई महत्वपूर्ण रूपमा उठाएको छ।
भारतको खासगरी हिन्दु समुदायको ठूलो जनसङ्ख्याले गाईलाई पूजा गर्ने गर्छ। तर गाई बचाऊ अभियानका घटना मुख्यतया मुसलमान नागरिकमाथि लक्षित बनेका थिए। गाईको संरक्षणको नाममा केही समयपहिले ती राज्यमा भएका घटनाले अराजकता निम्ताएको अदालतले ठहर गरेको छ।
भारतीय एक उच्च अदालतले गत बर्षको सेप्टेम्बर ६ मा २६ वटै भारतीय राज्यलाई केन्द्रित गर्दै कानूनी शासनको प्रत्याभूतीका लागि कथित गाई अधिकारवादीद्वारा गराइएको ‘हिंसा’ रोक्न अधिकारीलाई राजमार्ग तथा मुख्य सडकमा खटाउन निर्देशन दिएको थियो।
सन् २०१५ मा उत्तर प्रदेशको दाद्री क्षेत्रमा गाईको कथित तस्करी तथा हत्याको पहिलो घटना भएको थियो। उक्त घटनामा मोहम्मद अखलाक भन्ने एक वृद्धलाई कुटेर हत्या गरिएको थियो। सन् २०१७ को जुलाईमा पनि सोही आरोपमा गुजरातमा ‘तल्लो जात’ का ४ जनालाई एक कारमा बाँधी मरणासन्न अवस्थामा पुग्ने गरी कुटपिट गरिएको थियो।
यस्तै घटनामा राजस्थानको अलवार जिल्लामा ५५ वर्षे डेरी सञ्चालक पेहलु खानलाई गाईको तस्करी गरेको आशङ्कामा कुटपिट गरी हत्या गरिएको थियो।
खानलाई गाईहत्या विरोधी अभियानका केही मानिसले घाँटीमा समाती जमिनमा पछारेको भिडियो सामाजिक सञ्जाल तथा सञ्चारमाध्यमबाट प्रकाशमा आएको थियो। यस घटनाको विरोधमा देशभर विराध प्रदर्शन भएको थियो । रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
