काठमाडौं– त्रिवि चिकित्सा शास्त्र अध्ययन संस्थान (आइओएम) अन्तर्गतका मेडिकल कलेजहरुमा एमबिबिएस भर्ना चलिरहेको छ। मेडिकल कलेजहरुले विभिन्न शीर्षकमा तोकिएको भन्दा बढी शुल्क असुलेपछि विद्यार्थीहरु अान्दाेलनमा उत्रिएका छन् । उनीहरुले सोमबार माइतीघर मण्डलामा प्रदर्शन गर्दैछन् । निजी मेडिकल कलेजले मनाेमानी शुल्क असुल्न थालेपछि अाइअाेएमले अाइतबार मात्रै आइओएमले अतिरिक्त शुल्क लाग्ने शीर्षक नै तोकिदिएको छ। आइओएम डिन कार्यालयले जारी गरेको सूचना अनुसार कलेजहरुले परीक्षा शुल्क, छात्राबास शुल्क र खाना शुल्क मात्र थप लिन पाउनेछन्।
त्यसबाहेकका शीर्षक सरकारले निर्धारण गरेको शुल्कमै समेटिने बताइएको छ। सरकारले विद्यार्थीसँग उपत्यकाभित्रका मेडिकल कलेजमा ३८ लाख ५० हजार र उपत्यका बाहिर ४२ लाख ४५ हजार रुपैयाँ लिन पाउने व्यवस्था गरेको छ।
विद्यार्थीलाई कलेजले सार्वजनिक गरेको बैंक खातामा ५० प्रतिशत पहिलो किस्ता बापत जम्मा गरी अनलाइन प्रक्रियाद्वारा भर्ना हुन भनिएको छ।
तर, कलेजहरुले विभिन्न शीर्षकका नाममा अतिरिक्त रकम उठाइरहेको गुनासो विद्यार्थीले गरिरहेका छन्। आइओएममा प्रमाणसहित उजुरी परेको महाराजगञ्ज मेडिकल कलेजका स्ववियु सभापति डा मिलन गैरेले बताए। उनले भने, ‘हामीले डिन कार्यालयलाई कुन–कुन शीर्षकमा अतिरिक्त शुल्क लिन मिल्ने हो स्पष्ट पार्न भर्ना सुरु हुनुभन्दा अघि नै आग्रह गरेका थियौं।’
विद्यार्थीको दबाब र गुनासोपछि डिन कार्यालय शीर्षक नै तोकेर शुल्कबारे स्पष्ट पार्न वाध्य भएको हो।
सरकारी छात्रवृत्तिका विद्यार्थीसँग पनि मागियो ८ लाख
नेपाल सरकारको छात्रवृत्तिमा नाम निकालेका विद्यार्थीलाई कलेजहरुले ८ लाख रुपैयाँ भर्ना शुल्क मागेका छन्। यसअघि छात्रवृत्तिका विद्यार्थीबाट ५० हजारदेखि डेढ लाख रुपैयाँसम्म उठाउँदै आएका कलेजहरुले यसपल्ट ८ लाख रुपैयाँ जम्मा गर्न भनेका हुन्। कलेजले रकम माग गरेको भन्दै ९ जना छात्रवृत्तिका विद्यार्थीले डिन कार्यालय र शिक्षा मन्त्रालयमा निवेदन दिएका छन्। तीमध्ये अधिकांश विद्यार्थी गण्डकी मेडिकल कलेजका छन्।
यसैगरी, पोखरास्थित गण्डकी मेडिकल कलेजले सरकारले निर्धारण गरेको भन्दा ११ लाख रुपैयाँ थप माग गरेको विद्यार्थीले आइओएममा गुनासो गरेका छन्। चितिवनस्थित चितवन मेडिकल कलेजले तोकिएको शुल्कभन्दा थप ६ लाख रुपैयाँ माग गरेको उजुरी केही दिनअघि नै आइओएममा परिसकेको छ।
कलेजहरुले अतिरिक्त शीर्षक बनाएर विद्यार्थीबाट थप रकम लिन कोसिस गर्दै आएका छन्। कतिले वार्षिक शुल्क, सुरक्षा शुल्क, इन्टर्नसिप शुल्क, फिल्ड भिजिट जस्ता शीर्षक राखेर विद्यार्थीसँथ रकम मागेको डा गैरेले बताए।
आइओएम डिन कार्यालयले भने सबै शीर्षक निर्धारित शुल्कभित्रै पर्ने भएकाले अतिरिक्त शुल्क लिन नपाउने बताएको छ। आइओएमले भनेको छ, ‘सरकारले निर्धारण गरेको शिक्षण शुल्कका अतिरिक्त अन्य विभिन्न शीर्षक बापत थप रकम जम्मा गर्न विद्यार्थीलाई दबाब दिएको भन्ने व्यहोराका गुनासाहरु अभिभावक, विद्यार्थी र सञ्चार माध्याममाका आइरहेकाले संस्थानको ध्यानाकर्षण भएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
