काठमाडौं– फिल्म 'सपना तिम्रो मेरो'बाट नेपाली रजटपटमा पाइला टेकेकी अभिनेत्री तथा मोडल जान्वी बोहरा पछिल्लो समय पर्दामा हराइरहेकी नायिका हुन्। सपना तिम्रो मेरोमा मुख्य भूमिकामा थिइन् उनी। यतिबेला के गर्दैछिन् त जान्वी? नेपाल लाइभका मनोज न्यौपानेले प्रश्न गरेका छन्।
केमा व्यस्त हुनुहुन्छ आजकाल?
घरपरिवार, साथीभाइसँगको भेटघाट अनि फिल्म 'भैरे'को सुटिङका लागि व्यस्त भइरहेको छु। यसअघि फिल्म 'शेरबहादुर'का लागि पनि म व्यस्त रहेँ, जुन चाँडै प्रर्दशनमा आउँदैछ। मेरा केही वैदेशिक प्रोजेक्टहरु तय भइरहेका छन्, त्यसैको तयारीम, फिटनेस, डान्स, म्युजिक भिडियो सुटिङहरुमै बिजी छु।
अभिनय यात्रामा तपाईंको प्रवेश चाहिँ कसरी भयो?
सानै उमेरबाट म असाध्यै गीत गाउन रुचाउथेँ तर हुर्कँदै गएपछि गीतभन्दा डान्स र अभिनयमा रुचि बढ्दै गयो। औपचारिक रुपमा कक्षा ९ मा अध्ययन गर्दागर्दै एक नाटकमा काम गर्ने मौका मिलेको थियो। यसैबाट मेरो अभिनय यात्रा सुरु भयो। त्यसपछि भने म सडक नाटकमा व्यस्त हुन पुगेँ। भाग्यवश मैले डबली र गुरुकुल जस्ता चर्चित थिएटरमा अभिनय सिक्ने र काम गर्ने मौका समेत पाएँ। त्यसपछिको यात्रा आजसम्म पनि जारी नै छ।
तपाईंले अभिनय गर्नुभएका प्रोजेक्टहरु कस्ता रहे त?
नामसहित त याद छैन तर संख्यामा भने भन्न सक्छु कि। मैले ३ सयभन्दा बढी सडक नाटकमा सहभागी भएर नेपालका विभिन्न ५० जिल्लाका साथ भारतको दिल्लीसम्म पुगेकी छु। ८ वटा रंगमञ्चमा नाटक गरेँ, ३ दर्जन म्युजिक भिडियो, सर्ट मुभी, टेली सिरियलमा पनि काम गरेकी छु। सपना तिम्रो मेरो, तोरी लाहुरे, शेरबहादुर लगायत फिल्ममा पनि मैले अवसर पाएँ।
जान्वी बोहरालाई दर्शकले निकै बोल्ड र ओपन रुपमा दर्शकले देख्दै आएका छन्। तपाईंको यो बोल्डनेस र हट अवतार रहर हो या कथाको माग?
खै, मैले खासै बोल्डनेस दिएको जस्तो त लाग्दैन। जति पनि अभिनय गरेकी छु त्यसमा कथाको माग र निर्देशककको निर्देशन पालना गरेकी हुन्छु। मैले बोल्डनेस मात्र पनि त दिएकी छैन। कतिपय फिल्म, सिरियल र नाटकमा सिम्पल केटी, सारी चोलि र फिरियामा हुन्छु। सायद कथाले जस्तो क्लाइमेक्सको माग गर्छ, कलाको सम्मानस्वरुप त्यतै ढल्कनुपर्ने हुन्छ। यो कलाकारको धर्म पनि हो।
भ्यालेन्टाइन्स डे नजिकिँदैछ। के छ अफएयर/अनएयर योजनाहरु?
म सानैबाट हक्की स्वभावकी केटी हुँ। खुलेर कहिलै कसैसँग पनि माया या लभ परेन। न मलाई कसैले खुलेर रातो गुलाफका साथ प्रपोज गर्ने हिम्मत नै राख्यो न त मैले नै राखेँ। सायद, आउँदै गरेको भ्यालेन्टाइन्स डे मेरा लागि फिक्का नै हुन्छ होला।
परिवारका भाइ-बहिनीहरुको विवाह भइसकेको सन्दर्भमा पनि तपाईंमा जिम्मेवारी बढ्दो छ। अब बिहे चाहिँ कहिले गर्ने योजनामा हुनुहुन्छ?
पारिवारपक हिसाबमा म निकै जिम्मेवार छु। तर यो होइन कि अन्य सदस्यहरुले विवाह गर्दैमा मैले पनि बिहे गरिहाल्नुपर्छ। मेरा पनि केही उद्देश्य र लक्ष्य छन्। यी प्राप्तिपछि अवश्य मेरो नयाँ जीवन सुरु हुनेछ। अहिले नै बिहेको योजना बनिसकेको छैन।
आफू कलाकार भएको नाताले फिल्म त निकै हेर्नुहुन्छ होला। जीवनमा धेरै पटक हेरेका ५ फिल्म कुनकुन हुन्?
थिएटरकी कलाकार भएर होला नयाँभन्दा पुरानf फिल्मले नै मलाई छुने गर्छन्। नयाँ फिल्म साथीभाइसँगको भेटघाटमा हेरे पनि अभिनय र केही कुरा सिक्नका लागि म पुराना फिल्म नै हेर्छु। ठ्याक्कै नाम नै लिँदा बलिदान, सम्झना, लाहुरे, कुसुमे रुमाल जस्ता फिल्म भने मैले कैयौं पटक दोहोर्याएर हेरेकी छु।
तपाईंलाई लागेका उत्कृष्ट ५ अभिनेता र अभिनेत्रीको नाम लिन सक्नुहुन्छ?
सबै आ–आफ्नै ठाउँमा उत्कृष्ट हुनुहुन्छ। तर मलाई मन पर्ने अभिनेतामा पहिलो नम्बरमै पर्नुहुन्छ सौगात मल्ल। उहाँसँग एकसाथ स्क्रिन शेयर गर्ने मेरो ठूलो सपना छ। भुवन केसी, शिव श्रेष्ठ, गौरव पहाडी, दयाहाङ पनि राम्रो अभिनेता हुनुहुन्छ। अभिनेत्रीहरुमा गौरी मल्ल, जल शाह, कृष्टि मैनाली, प्रियंका कार्की, रेखा थापा मेरा आँखामा उत्कृष्ट हुनुहुन्छ।
दर्शकहरुले भविष्यमा जान्वीलाई अझ फरक भूमिकामा कसरी देख्न पाउनेछन्?
म तत्काल फिल्म 'शेरबहादुर'मा क्यामियो क्यारेक्टरमा आउँदैछु। त्यसपछि म्युजिक भिडियो र फिल्म भैरेमा पनि मलाई दर्शकहरुले देख्न पाउनुहुनेछ। आउँदो मार्चमा अस्ट्रेलिया, युके लगायतका देशमा विशेष कार्यक्रमको तयारीमा समेत छु। केही समयपछि आफ्नै फिल्म या अन्य प्रोजेक्ट लिएर आउने सोचमा छु।
अन्तमा, बिर्सनै नसक्ने कुनै क्षण सम्झनामा छ?
म सानो हुदाँ गाउन, नाच्न एकदमै रहर लाग्थ्यो। गाउँमा बेलुका विभिन्न नाचगानका कार्यक्रम हुन्थे तर घरबाट बाबाले जानै दिनुहुन्नथ्यो। मलाई भने नगई नहुने। त्यसका लागि बहिनी र म बाबाका आँखा छलेरै भए पनि झ्यालबाट भागेर पुग्थ्यौं।
ती क्षण अहिले पनि ताजै लाग्छन्। लाग्छ, त्यही गाउने, नाच्ने रहरले नै आज मलाई जान्वी बोहरा बनाएको हो। बाबा ममीका केही सपना पूरा गर्न सकेकी छु। देशविदेश घुम्न पाएको छु र यही कलाकारिताले नै आफ्नो खुट्टामा उभिन सकेकी छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
