काठमाडौं- नेपाल कम्युनिस्ट पार्टी (नेकपा)मा भुगोलका जिम्मेवारी नपाएका दुई मन्त्रीलाई विभागको जिम्मेवारीसमेत दिइएको छैन। कानुन, न्याय तथा संसदीय मामिला मन्त्री भानुभक्त ढकाल र युवा तथा खेलकुद मन्त्री जगत विश्वकर्माले पार्टीको भुगोल तथा विभाग कुनैको पनि जिम्मेवारी पाउन सकेका छैनन्।
मन्त्री भएकालाई सोही अनुसारका विभागको जिम्मेवारी दिइएको अवस्थामा पार्टीको कानुन विभाग प्रमुखको जिम्मेवारी रघुजी पन्तले पाएका छन् भने युवा तथा खेलकुद विभागमा टोपबहादुर रायमाझीलाई जिम्मेवारी दिइएको छ।
संस्कृति, पर्यटन तथा नागरिक उड्डयन मन्त्री योगेश भट्टराईलाई पर्यटन प्रवर्द्धन तथा नागरिक उड्ययन विभाग दिइएको छ।
मन्त्री रघुविर महासेठलाई पनि उनकै मन्त्रालयसँग सम्बन्धित भौतिक पूर्वाधार तथा यातायात व्यवस्था विभाग प्रमुखको जिम्मेवारी दिइएको छ। वन तथा वातावरणमन्त्री शक्ति बस्नेतलाई वन तथा वातारण विभागको प्रमुख नियुक्त गरिएको छ।
उद्योग, वाणिज्य तथा आपूर्ति मन्त्री मातृका यादवलाई उपभोक्ता हित तथा आपूर्ति विभाग, कृषि तथा पशुपंक्षी मन्त्री चक्रपाणि खनाललाई कृषि तथा भूमिसुधार विभाग छुट्याइएको छ।
खानेपानी तथा सरसफाइ मन्त्री बिना मगरलाई खानेपानी तथा सरसफाइ विभाग र ऊर्जा, जलस्रोत तथा सिँचाइ मन्त्री वर्षमान पुनलाई जलस्रोत, सिँचाइ तथा उर्जा विभाग दिइएको छ।
शिक्षामन्त्री गिरिराजमणि पोखरेलले शिक्षा तथा मानवस्रोत विभाग पाए भने श्रम, रोजगार तथा सामाजिक सुरक्षा मन्त्री गोकर्ण विष्टले श्रम तथा रोजगार विभाग प्राप्त गरे। संघीय मामिला तथा सामान्य प्रशासन मन्त्री लालबाबु पण्डितलाई सामान्य प्रशासन विभाग प्रमुखको जिम्मेवारी दिइएको छ।
यसअघि भुगोलको जिम्मेवारी पाएका मन्त्रीहरुलाई विभाग तोकिएको छैन। सञ्चार तथा सूचना, प्रविधि मन्त्री गोकुल बाँस्कोटाले काभ्रेको इन्चार्ज पाएका थिए। भूमि व्यवस्था तथा गरिबी निवारण मन्त्री पद्मा अर्याल स्याङ्जाको इन्चार्ज बनेकी छन्।
विभागमा पूर्व एमालेका भागमा १८ र पूर्व माओवादी केन्द्रका भागमा १४ प्रमुख पद परेका छन्। तीमध्ये प्रभावशाली विभागमा भने पूर्व एमालेकै वर्चस्व छ।
३२ विभागमा दुई जना मात्रै महिला प्रमुख!
पार्टीका ३२ वटा विभागमा महिलाले दुई वटा विभागको नेतृत्व गर्ने अवसर पाएका छन्। उद्योग तथा वाणिज्य विभाग प्रमुखमा राधा ज्ञवाली र खानेपानी तथा सरसफाइ विभागमा बिना मगरले प्रमुखको जिम्मेवारी पाएका छन्।
चार महिलालाई विभिन्न विभागको उपप्रमुख बनाइएको छ। खानेपानी तथा सरसफाइ विभागमा प्रमुखसहित उपप्रमुख पनि महिला छन्। उक्त विभागमा ममता गिरी उपप्रमुखमा चयन भएकी छन्। विज्ञान तथा प्रविधि विभाग उपप्रमुखमा उर्मिला अर्याल, स्वास्थ्य तथा जनसंख्या विभागको उपप्रमुखमा अन्जना विसंखे र सामान्य प्रशासन विभागको उपप्रमुखमा रेखा शर्माले अवसर पाएका छन्।
नेतृत्व व्यवस्थापन गर्न बढाइयो प्रदेश सह-इन्चार्जको संख्या
जिम्मेवारी बाँडफाँटका क्रममा भाग नपुग्ने अवस्थालाई मध्यनजर गर्दै प्रदेश सह-इन्चार्जको संख्या बढाइएको छ। यसअघि एकमात्रै सह-इन्चार्ज बनाएर पठाइए पनि नेतृत्व व्यवस्थापन गर्न यसपल्ट सबै प्रदेशमा थप दुई/दुई जनाका दरले जिम्मेवारी थप गरिएको छ।
थपिने सह-इन्चार्जमा प्रदेशक १ मा नरेश खरेल र शेरधन राई छन्। यसअघि सावित्री कुमार काफ्लेलाई मात्रै उक्त जिम्मेवारी तोकिएको थियो। प्रदेश २ मा विश्वनाथ साहसँगै अब नागेन्द्र चौधरी र महेन्द्र पाशवान सह-इन्चार्ज भएका छन्। प्रदेश ३ मा काशिनाथ अधिकारी र हितमान शाक्य थपिएका छन्। हितबहादुर तामाङ यसअघि नै सह-इन्चार्ज थिए।
गण्डकी प्रदेशमा यसअघि खगराज अधिकारीलाई सह-इन्चार्ज मात्रै तोकिए पनि किरण गुरुङ र यशोदा सुवेदी गुरुङलाई आजको बैठकले सोही पदको जिम्मेवारी दिएको छ।
प्रदेश ५ मा दलबहादुर रानासँगै कुलप्रसाद केसी र वैजनाथ चौधरी सह-इन्चार्ज हुनेछन्। कर्णाली प्रदेशमा यमलाल कँडेल, कालीबहादुर मल्ल र प्रकाश ज्वाला सह-इन्चार्ज भएका छन् भने सुदुरपश्चिम प्रदेशमा खगराज भट्ट र भानुभक्त जैसी थपिएका छन्। यसअघि लक्ष्मणदत्त जोशीलाई मात्रै सह-इन्चार्ज तोकिएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।